‘ৰাষ্ট্ৰীয় ছাৰেণ্ডাৰ সংঘ’, ৰাম মাধৱৰ মন্তব্যক কেন্দ্ৰ কৰি সংঘ আৰু বিজেপিক টাৰ্গেট ৰাহুল গান্ধীৰ
ৰাষ্ট্ৰীয় স্বয়ংসেৱক সংঘৰ থিংক টেংক আৰু আন্তঃৰাষ্ট্ৰীয় সম্পৰ্ক কৌশলকে ধৰি বিজেপিৰ কাশ্মীৰ নীতিৰ সৈতে দীৰ্ঘদিন ধৰি জড়িত হৈ থকা ৰাম মাধৱৰ বক্তব্যক কেন্দ্ৰ কৰি মোডী চৰকাৰ আৰু বিজেপি শলঠেকত পৰিছে।
ৰাহুল গান্ধীয়ে ৰাম মাধৱৰ মন্তব্যক অস্ত্ৰ হিচাপে ব্যৱহাৰ কৰি তীব্ৰ আক্ৰমণ চলাইছে। শনিবাৰে আৰ এছ এছক ‘ৰাষ্ট্ৰীয় ছাৰেণ্ডাৰ সংঘ’ বুলি কটাক্ষ কৰে। তেওঁ নৰেন্দ্ৰ মোডীকো পোনপটীয়াকৈ ‘আত্মসমৰ্পণকাৰী’ বুলি অভিহিত কৰে।
শেহতীয়াকৈ আমেৰিকাৰ হাডছন ইনষ্টিটিউটৰ এক আলোচনা সভাত ৰাম মাধৱে আমেৰিকা প্ৰশাসনৰ প্ৰাক্তন বিষয়াসকলৰ সন্মুখত প্ৰায় বিৰোধীৰ সুৰতে কৈ পেলাইছিল যে ভাৰত চৰকাৰে তেল আমদানি সন্দৰ্ভত আমেৰিকাই আৰোপ কৰা চৰ্তসমূহ মানি লৈছে। ইৰাণ আৰু ৰাছিয়াৰ পৰা ভাৰতে তেল আমদানি কৰিব নোৱাৰিব বুলি আমেৰিকাই জাৰি কৰা চৰ্ত মানি লোৱা হৈছে।
তেওঁ লগতে কয় যে ভাৰতে ৫০ শতাংশ শুল্ক আৰোপ কৰাৰ সময়তো মানি লৈছিল। আনকি বাণিজ্য চুক্তিৰ চৰ্ত অনুসৰি ভাৰতে ১৮ শতাংশ শুল্কও গ্ৰহণ কৰে। এই সকলোবোৰৰ মাজতো আমেৰিকাৰ সৈতে ভাৰতৰ সম্পৰ্ক আৰু আমেৰিকা চৰকাৰৰ মনোভাৱ কিয় ইমান তিক্ত হৈ আছে সেইটো বুজিব পৰা নাই।
তেওঁৰ বক্তব্যত অস্বস্তিত পৰিছে বিজেপি। ৰাম মাধৱৰ ওপৰত যে যথেষ্ট চাপ দিয়া হৈছে সেয়া স্পষ্ট। কাৰণ তেওঁ নিজৰ বক্তব্যক ভুল আখ্যা দি কৈছে যে মই এনেকুৱা কথা কোৱা উচিত নাছিল। মই দুখ প্ৰকাশ কৰিছো। মই এনেকুৱা কথা ক’ব বিচৰা নাছিলো।
কিন্তু ইতিমধ্যে যি ক্ষতি হ’বলগীয়া সেয়া হৈ গৈছে। বিজেপিয়ে দীৰ্ঘদিন ধৰি অভিযোগ কৰি আহিছে যে ৰাহুল গান্ধীয়ে যেতিয়াই বিদেশলৈ যায় তেতিয়াই তাৰ বিভিন্ন অনুষ্ঠান-প্ৰতিষ্ঠান, সংগঠন, বিশ্ববিদ্যালয়, ৰাজহুৱা মঞ্চত ভাৰতক বদনাম কৰে, অপবাদ দিয়ে। তেওঁ ভাৰতৰ বিৰুদ্ধে প্ৰচাৰ চলায়।
বিজেপিৰ নিজা থিংক টেংকৰ সদস্য ৰাম মাধৱে আমেৰিকালৈ গৈ বিৰোধী দলৰ দৰে একে সুৰত কোৱা এনে কথাত প্ৰত্যাশিতভাৱেই অতি অস্বস্তিত পৰিছে বিজেপি আৰু মোডী চৰকাৰ। ৰাহুলে কয় যে অৱশেষত ৰাষ্ট্ৰীয় স্বয়ংসেৱক সংঘ আৰু বিজেপিৰ মুখা খোল খাইছে। নৰেন্দ্ৰ মোডী যে কিমান দুৰ্বল প্ৰধানমন্ত্ৰী সেয়া ৰাম মাধৱৰ কথাৰ পৰাই স্পষ্ট হৈ পৰিছে।
