দেশত চাকৰি নাই, নিবনুৱা সমস্যা দ্ৰুতগতিত বৃদ্ধি পাইছে। NEETৰ দৰে গুৰুত্বপূৰ্ণ পৰীক্ষাত প্ৰশ্ন ফাদিল হোৱাটো এতিয়া দৈনন্দিন ঘটনাত পৰিণত হৈছে। বিৰোধী দল কংগ্ৰেছে দেশৰ অৰ্থনীতি সন্দৰ্ভতো অশুভ সংকেতৰ কথা সোঁৱৰাই দিছে।
এই জটিল পৰিস্থিতিত কংগ্ৰেছে দেশৰ যুৱক-যুৱতীসকলক একত্ৰিত কৰি তেওঁলোকৰ হৃদয় জয় কৰিবলৈ এক বৃহৎ অভিযান আৰম্ভ কৰিব। কংগ্ৰেছৰ এই নতুন কাৰ্যসূচী ৰাহুল গান্ধীক আগত লৈ অহা ১৭ জুনৰ পৰা আৰম্ভ কৰা হ’ব।
কংগ্ৰেছৰ সাধাৰণ সম্পাদক কে চি ভেনুগোপালে কয় যে কংগ্ৰেছে দেশৰ ছাত্ৰ-ছাত্ৰী, চাকৰি প্ৰত্যাশী, যুৱক-যুৱতী আৰু শিক্ষাবিদসকলক একত্ৰিত কৰাৰ বাবে দেশজোৰা অভিযান আৰম্ভ কৰিব। ১৭ জুনত ৰাহুল গান্ধীৰ উপস্থিতিত কোটাৰ পৰা আৰম্ভ হ’ব এই কাৰ্যসূচী। তাৰ পিছত ১০ জুলাইত এলাহাবাদ, ১১ জুলাইত পাটনা আৰু ১৪ জুলাইত দিল্লীত এই কাৰ্যসূচী অব্যাহত থাকিব।
ভেনুগোপালৰ মতে এই কাৰ্যসূচীত ছাত্ৰ-ছাত্ৰী, পৰীক্ষাৰ্থী, যুৱ সংগঠন, শিক্ষাবিদ আৰু পৰীক্ষাৰ কেলেংকাৰীত প্ৰত্যক্ষভাৱে ক্ষতিগ্ৰস্ত হোৱা সকলোকে একত্ৰিত কৰা হ’ব। এই দেশজোৰা কাৰ্যসূচীত ৰাহুলে সমগ্ৰ দেশৰ ছাত্ৰ-ছাত্ৰীক একত্ৰিত কৰিবলৈ সকলো কংগ্ৰেছ সংগঠনক বাৰ্তা প্ৰদান কৰিছে।
ভেনুগোপালে কয় যে সকলো কংগ্ৰেছ কৰ্মী আৰু সংগঠনক বৃহৎ পৰিসৰত কেম্পাছ, কোচিং চেণ্টাৰ, বিশ্ববিদ্যালয়, বিদ্যালয় আৰু যুৱ কেন্দ্ৰলৈ গৈ মত বিনিময় কৰিবলৈ নিৰ্দেশ দিয়া হৈছে। ছ’চিয়েল মিডিয়া, লাইভ স্ক্ৰীনিং আৰু ছাত্ৰ-ছাত্ৰীৰ সৈতে প্ৰত্যক্ষ যোগাযোগৰ নিৰ্দেশ দিয়া হৈছে।
ভেনুগোপালে লগতে কয় যে এই কাৰ্যসূচীত ৰাহুল গান্ধীয়ে পূৰ্বে উত্থাপন কৰা দাবীসমূহ লৈ ৰাজপথলৈ ওলাই আহিব। যাৰ ভিতৰত আছে NEET প্ৰশ্ন ফাদিল, পৰীক্ষাৰ মাচুল বাতিল, প্ৰশ্নকাকত ফাদিল চক্ৰৰ সৈতে জড়িতসকলৰ বিৰুদ্ধে কঠোৰ আইনী ব্যৱস্থা আৰু কেন্দ্ৰীয় শিক্ষামন্ত্ৰীৰ পদত্যাগৰ লগতে শিক্ষা খণ্ডত চৰকাৰৰ শিথিল মনোভাৱ।
এই কাৰ্যসূচীৰ উদ্দেশ্য হৈছে দেশৰ যুৱক-যুৱতীসকল যাতে দুৰ্নীতি, অযোগ্যতা বা ৰাজনৈতিক উদাসীনতাৰ বলি নহয়। ছাত্ৰ-ছাত্ৰীৰ স্বাৰ্থৰ প্ৰতি লক্ষ্য ৰাখি কংগ্ৰেছৰ এই কাৰ্যসূচী সফল কৰি তুলিবলৈ দেশৰ যুৱক-যুৱতীসকলক আহ্বান জনোৱা হৈছে।
মন কৰিবলগীয়া যে শেহতীয়াকৈ এছ এছ চিৰ ৱেবছাইটত NEET প্ৰশ্নকাকত ফাদিলৰ সমস্যাৰ বাবে সমগ্ৰ দেশতে বিতৰ্কই তীব্ৰ ৰূপ ধাৰণ কৰিছে। বৃহৎ আন্দোলনৰ অন্তত কেন্দ্ৰই নতুনকৈ NEET পৰীক্ষা অনুষ্ঠিত কৰিছে।
এই বিষয়টোক অস্ত্ৰ হিচাপে ব্যৱহাৰ কৰি ইতিমধ্যে ককৰোচ পাৰ্টিয়ে ৰাজপথত নামিছে। শেহতীয়াকৈ দিল্লীৰ যন্তৰ মন্তৰত দেশৰ যুৱক-যুৱতীসকলে তেওঁলোকৰ কাৰ্যসূচীত বৃহৎ সংখ্যাত যোগদান কৰা দেখা গৈছিল। এই অৰাজনৈতিক সংগঠনটোৱে শিক্ষামন্ত্ৰীগৰাকীৰ পদত্যাগৰ তীব্ৰ দাবী জনাইছে। এতিয়া এই বিষয়টোক লৈ কংগ্ৰেছে ৰাহুল গান্ধীৰ নেতৃত্বত ৰাজনৈতিকভাৱে আন্দোলন আৰম্ভ কৰিবলৈ আগবাঢ়িছে।
