কংগ্ৰেছ সাংসদ তথা লোকসভাৰ বিৰোধী দলপতি ৰাহুল গান্ধী আজি অসম আৰু মণিপুৰ ভ্ৰমণলৈ আহিব। প্ৰথমে তেওঁ শিলচৰলৈ যাব আৰু তাৰ পিছত তেওঁ মণিপুৰ ভ্ৰমণ কৰিব। ৰাহুল গান্ধীয়ে অসমৰ বানাক্ৰান্ত লোকক সাক্ষাৎ কৰিব।
বানপানীৰ বাবে অসমত পৰিস্থিতি বিপৰ্যস্ত হৈ পৰিছে। তেওঁ ইয়াৰ কেইবাটাও সাহায্য শিবিৰ পৰিদৰ্শন কৰিব। এই পৰ্যন্ত অসমত বানত ৭৮ জন লোকৰ মৃত্যু হৈছে। ৰাহুলে সন্ধিয়া অসমৰ ৰাজ্যপালক সাক্ষাৎ কৰিব।
অসমৰ পাছত ৰাহুলে মণিপুৰলৈ ৰাওনা হ’ব। মণিপুৰৰ সাহায্য শিবিৰ পৰিদৰ্শন কৰাৰ লগতে প্ৰদেশ কংগ্ৰেছৰ নেতাসকলকো সাক্ষাৎ কৰিব। লোকসভা নিৰ্বাচনত জনসাধাৰণক সহায় আগবঢ়োৱাৰ বাবে ধন্যবাদ জনাব।
শেহতীয়া লোকসভা নিৰ্বাচনত মণিপুৰৰ দুয়োখন আসন কংগ্ৰেছে দখল কৰিছে। এয়া তেওঁৰ মণিপুৰলৈ তৃতীয়টো আৰু বিৰোধী দলৰ নেতা হিচাপে উত্তৰ-পূৰ্বাঞ্চললৈ প্ৰথমটো ভ্ৰমণ।
অসমত বানপানীৰ বাবে পৰিস্থিতি অত্যন্ত শোচনীয়। ৰাজ্যখনৰ ৩০ খন জিলাত মুঠ ২৪ লাখতকৈও অধিক লোক বানত ক্ষতিগ্ৰস্ত হৈছে। নিমতিঘাট, তেজপুৰ, গোৱালপাৰা আৰু ধুবুৰীত বিপদৰ সীমাৰ ওপৰেৰে বৈ আছে ব্ৰহ্মপুত্ৰ নদী। ইয়াৰ উপনৈসমূহো বহু ঠাইত বিপদৰ সীমাৰ ওপৰেৰে বৈ আছে। বানপানীৰ ফলত ডুব গৈছে হাজাৰ হাজাৰ হেক্টৰ ভূমিৰ শস্য। ৰাহুল গান্ধীয়ে লক্ষীপুৰৰ বান সাহায্য শিবিৰ পৰিদৰ্শন কৰি তাত আশ্ৰয় লোৱা ৰাইজৰ সৈতে কথা পাতিব।
অসমৰ পাছতে ৰাহুল গান্ধীয়ে মণিপুৰ ভ্ৰমণ কৰিব। তেওঁ জিৰিবাম, চুৰাচান্দপুৰ আৰু ইম্ফলত হিংসাত ক্ষতিগ্ৰস্ত লোকৰ সৈতে কথা পাতিব। প্ৰায় এবছৰ ধৰি বিক্ষিপ্ত হিংসাৰ কবলত পৰিছে মণিপুৰ। শেহতীয়া হিংসাত্মক ঘটনা সংঘটিত হৈছিল ৬ জুনত। ৰাহুলে লোকসভাত মণিপুৰৰ হিংসাৰ বিষয়টোও উত্থাপন কৰিছিল। প্ৰধানমন্ত্ৰী মোডীক লক্ষ্য কৰি ৰাহুলে কৈছিল যে প্ৰধানমন্ত্ৰী মোডী সকলোতে গৈছে যদিও মণিপুৰলৈ যোৱা নাই।
লগতে পঢ়কঃদ্বিতীয়খন মেচতেই ৰাজকীয় প্ৰত্যাৱৰ্তন টিম ইণ্ডিয়াৰ; জিম্বাবুৱেই দেখিলে চকুৰে সৰিয়হ ফুল
উল্লেখ্য যে যোৱা বছৰৰ ৩ মে’ত গোষ্ঠীগত হিংসাৰ ফলত মণিপুৰত ২০০ৰো অধিক লোক নিহত হোৱাৰ লগতে হাজাৰ হাজাৰ লোক গৃহহীন হৈ পৰে। মেইটেই জনগোষ্ঠীক অনুসূচিত জনজাতি (এছটি)ত অন্তৰ্ভুক্ত কৰাৰ দাবীৰ প্ৰতিবাদত ৰাজ্যখনৰ পাহাৰীয়া জিলাসমূহত জনজাতীয় সংহতি সমদলৰ আয়োজন কৰাৰ সময়তে এই হিংসাত্মক পৰিস্থিতিৰ সৃষ্টি হৈছিল।
