ৰে’লৱে মন্ত্ৰী পীয়ুষ গোৱেলে উত্তৰ পূব সীমান্ত ৰে’লৱেৰ অন্তৰ্গত কেইটামান প্ৰাকৃতিক দৃশ্য থকা যাত্ৰাপথত নতুন ধৰণৰ ডবা সংলগ্ন কৰিবলৈ আগবাঢ়িছে। এই সন্দৰ্ভত ৰে’ল মন্ত্ৰীগৰাকীয়ে সংশ্লিষ্ট কৰ্তৃপক্ষক প্ৰয়োজনীয় নিৰ্দেশ জাৰি কৰিছে। উল্লেখ্য যে এই ভিষ্টাডোম ডবাসমূহৰ মূধচত কাঁচৰ স্বচ্ছ আচ্ছাদন লগোৱা থাকিব।
ৰে’ল মন্ত্ৰীগৰাকীয়ে উত্তৰ পূব সীমান্ত ৰে’লৱেৰ এখন ৰিভিউ মিটিঙত এই নিৰ্দেশ জাৰি কৰিছে। উত্তৰ পূব সীমান্ত ৰে’লৱেই মন্ত্ৰীগৰাকীৰ উদ্ধৃতিৰে প্ৰকাশ কৰিছে যে এই ডবাসমূহত ভ্ৰমণ কৰিলে মুকলি আকাশৰ দৃশ্য দেখা পোৱা যাব আৰু ইয়ে ৰ’লযাত্ৰাৰ আনন্দ বহু পৰিমাণে বঢ়াই তুলিব। পৰ্যটকসকলে উত্তৰ পূব ভাৰতৰ প্ৰাকৃতিক সৌন্দৰ্য উপভোগ কৰি ৰে’লযাত্ৰা কৰিব পাৰিব।
সম্পূৰ্ণ কাঁচেৰে নিৰ্মিত আচ্ছাদনৰ এই ভিষ্টাডোম ডবাসমূহ যাত্ৰীসকলক প্ৰাকৃতিক সৌন্দৰ্য উপভোগ কৰোৱাৰ সুযোগ দিয়াৰ বাবে ডিজাইন কৰা হৈছে। ইয়েই উত্তৰ পূৰ্বাঞ্চললৈ ভ্ৰমণ কৰা দেশী বিদেশী পৰ্যটকৰ সংখ্যা বৃদ্ধি কৰিব বুলি আশা কৰা গৈছে।
উল্লেখ্য যে উত্তৰ পূব সীমান্ত ৰে’লৱেই ইতিমধ্যে য়ুনেস্কো বিশ্ব ঐতিহ্য দাৰ্জিলিং হিমালয়ান ৰে’লৱেত এই ভিষ্টাডোম ডবা সংলগ্ন কৰিছে। এই ডবাসমূহ পৰ্যটকৰ মাজত অতি জনপ্ৰপিয় হৈ পৰিছে। দাৰ্জিলিং হিমালয়ান ৰে’লৱেত সংলগ্ন কৰা ভিষ্টাডোম ডবাসমূহত স্বয়ংক্ৰিয়ভাৱে বন্ধ হোৱা দৰ্জা, যাত্ৰীসকলক তথ্য আৰু আনন্দ দিয়াৰ বাবে টেলিভিশ্যন ছেট, দীব্যাংগসকলৰ বাবে বহল দৰ্জা, জিপিএছ ভিত্তিক তথ্য প্ৰণালী আৰু এলইডি লাইটকে ধৰি ভালেমান সুবিধা আছে।
কল্কা-শিমলা ৰে’লৱে, মুম্বাই-গোৱা আৰু বিশাখাপট্টনম-আৰাকুৰ মাজত চলাচল কৰা জনশতাব্দী এক্সপ্ৰেছতো এই ডবাসমূহ ইতিমধ্যে সংলগ্ন কৰা হৈছে। লামডিং-বদৰপুৰ পাৰ্বত্য শাখা, কুমাৰঘাট-আগৰতলা পাৰ্বত্য শাখা, উজনি অসমৰ কেতবোৰ অংশতো উত্তৰ বংগৰ প্ৰাকৃতিক দৃশ্য সমৃদ্ধ বিস্তীৰ্ণ সমভুমি এলেকাৰ মাজেৰে যোৱা ৰে’লপথসমূহত এই নতুন প্ৰযুক্তিৰ ডবাসমূহ সংলগ্ন কৰা হ’ব।
