ৰাজস্থান উচ্চ ন্যায়ালয়ৰ জোধপুৰ বিঞ্চে এগৰাকী নাবালিকাক যৌন নিৰ্যাতন চলোৱাৰ গোচৰত বিতৰ্কিত ধৰ্মগুৰু আশাৰাম বাপুক কোনো ধৰণৰ সকাহ দিবলৈ অস্বীকাৰ কৰিছে। আদালতে তেওঁৰ যাৱজ্জীৱন কাৰাদণ্ডৰ শাস্তি বাহাল ৰাখিছে। বুধবাৰে বিচারপতি অৰুণ মোংগা আৰু বিচারপতি যোগেন্দ্ৰ কুমাৰ পুৰোহিতৰ সংমণ্ডল বিঞ্চে এই গুৰুত্বপূৰ্ণ ৰায়দান কৰে। আদালতে আশাৰামকে ধৰি তিনিগৰাকী অভিযুক্তৰ আপিলৰ শুনানি গ্ৰহণ কৰি স্পষ্ট কৰি দিয়ে যে নিম্ন আদালতে প্ৰদান কৰা শাস্তিত কোনো সালসলনি কৰা নহয়। অৱশ্যে আদালতে তেওঁক দলবদ্ধ ধৰ্ষণৰ ধাৰাৰ পৰা দোষমুক্ত কৰিছে যদিও অন্যান্য গুৰুতৰ অভিযোগসমূহ বাহাল ৰাখিছে। ইয়াৰ লগতে আদালতে আশাৰামক অতি সোনকালে আত্মসমৰ্পণ কৰিবলৈ নিৰ্দেশ দিছে।
বৰ্তমান সময়ত আশাৰাম চিকিৎসাৰ বাবে লাভ কৰা অন্তৱৰ্তীকালীন জামিনৰ অধীনত জেলৰ বাহিৰত আছে। উচ্চতম ন্যায়ালয়ৰ নিৰ্দেশত উচ্চ ন্যায়ালয়ে তেওঁক স্বাস্থ্যজনিত কাৰণত এই ৰেহাই দিছিল আৰু ইয়াৰ সময়সীমা কেইবাবাৰো বৃদ্ধি কৰা হৈছিল। কিন্তু উচ্চ ন্যায়ালয়ৰ এই নতুন ৰায়ৰ পিছত তেওঁ এতিয়া পুনৰ জেল কৰ্তৃপক্ষৰ ওচৰত আত্মসমৰ্পণ কৰিব লাগিব। সুৰক্ষা আৰু আইন-শৃংখলা পৰিস্থিতিৰ প্ৰতি লক্ষ্য ৰাখি আদালত চত্বৰতো অতিৰিক্ত সতৰ্কতা অৱলম্বন কৰা হৈছে।
এই সমগ্ৰ গোচৰটো ২০১৩ চনৰ আগষ্ট মাহৰ আছিল, যেতিয়া জোধপুৰত অৱস্থিত আশ্ৰমখনত পঢ়ি থকা এগৰাকী নাবালিকা ছাত্ৰীয়ে আশাৰামৰ বিৰুদ্ধে ধৰ্ষণৰ অভিযোগ উত্থাপন কৰিছিল। গোচৰৰ শুনানিৰ পিছত বিশেষ পকচো আদালতে ২০১৮ চনৰ ২৫ এপ্ৰিলত আশাৰামক দোষী সাব্যস্ত কৰি আজীৱন কাৰাদণ্ডৰ শাস্তি বিহিছিল। ইয়াৰ বিৰুদ্ধে আশাৰামে ৰাজস্থান উচ্চ ন্যায়ালয়ত আপিল কৰিছিল। উচ্চ ন্যায়ালয়ত ২০^^২৬ চনৰ ১৬ ফেব্ৰুৱাৰীৰ পৰা ২০ এপ্ৰিললৈকে এই গোচৰৰ দৈনিক শুনানি চলিছিল আৰু ইয়াৰ পিছতে আদালতে নিজৰ ৰায় সুৰক্ষিত ৰাখিছিল।
শুনানিৰ সময়ত প্ৰতিৰক্ষা পক্ষই এই গোচৰটোক মিছা আৰু সাজি উলিওৱা বুলি দাবী কৰিছিল আৰু ভুক্তভোগী তথা তেওঁৰ পৰিয়ালৰ ভাষ্যত অমিল থকাৰ কথা দোহাৰিছিল। আনহাতে চৰকাৰী পক্ষই যুক্তি দিছিল যে পকচো গোচৰত ভুক্তভোগীৰ ভাষ্যই আটাইতকৈ ডাঙৰ প্ৰমাণ হিচাপে গণ্য কৰা হয়। ইয়াৰ উপৰিও আশাৰামে ২০২৩ চনৰ জানুৱাৰী মাহত গুজৰাটৰ গান্ধীনগৰ আশ্ৰমত এগৰাকী মহিলা অনুগামীক ধৰ্ষণ কৰা আন এটা গোচৰতো যাৱজ্জীৱন কাৰাদণ্ডৰ শাস্তি ভোগ কৰি আছে। ৮৬ বছৰীয়া আশাৰামে নিজৰ বৰ্ধিত বয়স আৰু অসুস্থতাৰ দোহাই দি কেইবাবাৰো ৰেহাই বিচাৰিছিল যদিও ৰাজস্থান উচ্চ ন্যায়ালয়ে এতিয়া স্পষ্ট কৰি দিলে যে তেওঁৰ শাস্তি বাহাল থাকিব আৰু তেওঁ আইনী প্ৰক্ৰিয়া মানি আত্মসমৰ্পণ কৰিবই লাগিব।
