ন কোটি টকাৰ চেক বাউন্সৰ গোচৰত এইবাৰ অভিনেতা ৰাজপাল যাদৱৰ বাবে আহিছে এক অতি বেয়া খবৰ। দিল্লী উচ্চ ন্যায়ালয়ে অভিনেতাগৰাকীৰ জামিনৰ আবেদন খাৰিজ কৰি দিছে, যাৰ ফলত এতিয়া তেওঁ তিহাৰ জেলতে দিন কটাব লাগিব। এই গোচৰটোৰ পৰৱৰ্তী শুনানি অহা সোমবাৰে অনুষ্ঠিত হ’ব বুলি জানিব পৰা গৈছে।
ইতিমধ্যে অভিনেতাগৰাকীৰ গ্ৰেপ্তাৰৰ খবৰ বিয়পি পৰাৰ লগে লগে বলীউডৰ একাংশ অভিনেতা তেওঁক সহায় কৰিবলৈ আগবাঢ়ি আহিছে।
আদালতৰ সূত্ৰৰ পৰা জানিব পৰা মতে ৰাজপাল যাদৱে বাৰে বাৰে নিজৰ প্ৰতিশ্ৰুতি ভংগ কৰাৰ বাবে এইবাৰ আদালতে অতি কঠোৰ স্থিতি গ্ৰহণ কৰিছে। অভিনেতাগৰাকীয়ে নিজৰ ঘৰত বিয়াৰ অনুষ্ঠান থকাৰ দোহাই দি আদালতৰ ওচৰত জামিন বিচাৰিছিল যদিও উচ্চ ন্যায়ালয়ে সেই আবেদন গ্ৰহণ নকৰিলে। ওলোটাই আদালতে তেওঁক কঠোৰ ভাষাৰে ভৰ্ৎসনা কৰে আৰু ইয়াৰ ফলত তেওঁ অন্ততঃ আৰু চাৰিদিন জেলত থাকিবলৈ বাধ্য হ’ব।
উল্লেখ্য যে যোৱা পাঁচ ফেব্ৰুৱাৰীত ৰাজপাল যাদৱে তিহাৰ জেলত আত্মসমৰ্পণ কৰিছিল। ইয়াৰ আগতে ২০১৮ চনত আদালতৰ তৰফৰ পৰা তেওঁক ছমাহৰ কাৰাদণ্ড বিহা হৈছিল। তেতিয়া তেওঁ সেই ৰায়ৰ বিৰুদ্ধে উচ্চ ন্যায়ালয়ত আবেদন জনাইছিল আৰু কিছু টকাও পৰিশোধ কৰিছিল। কিন্তু এতিয়াও তেওঁৰ পৰা প্ৰায় ন কোটি টকা আদায় দিবলৈ বাকী থকাৰ কথা পোহৰলৈ আহিছে। ইয়াৰ পূৰ্বেও তেওঁ কিছুদিন জেলত কটাইছিল যদিও পিছত জামিনত মুক্তি লাভ কৰিছিল।
আচলতে এই গোটেই ঘটনাটো আৰম্ভ হৈছিল আতা পাতা লাপাতা নামৰ এখন ছবি নিৰ্মাণ কৰাৰ পৰা। অভিনেতাগৰাকীয়ে এই ছবিখনৰ বাবে মুৰলী প্ৰজেক্টছ আৰু চেণ্ট্ৰেল বেংকৰ পৰা পাঁচ কোটি টকা ঋণ লৈছিল। কিন্তু দুৰ্ভাগ্যজনকভাৱে ছবিখন বক্স অফিচত ফ্লপ হোৱাৰ বাবে তেওঁ সেই ঋণৰ ধন ঘূৰাই দিব পৰা নাছিল। পৰৱৰ্তী সময়ত এই বিষয়টো আদালতলৈ যায় আৰু আইনী জটিলতাত সোমাই অভিনেতাগৰাকীয়ে এতিয়া কাৰাবাস খাটিবলগীয়া হৈছে।
