চৈয়দ আব্দুল মালিক, ইমৰাণ শ্বাহ যদি অসম সাহিত্য সভাৰ সভাপতি হ’ব, তেন্তে তেওঁলোকৰ দৰে মুছলমান এজন মুখ্যমন্ত্ৰী কিয় হ’ব নোৱাৰে কিয়? এই প্ৰশ্ন অজিত কুমাৰ ভূঞাৰ।
শনিবাৰে শিৱসাগৰৰ প্ৰেছ ক্লাৱত অনুষ্ঠিক মত বিনিময় অনুষ্ঠানত সদ্য নিৰ্বাচিত ৰাজ্য সভাৰ সাংসদ অজিত কুমাৰ ভূঞাই এইদৰে।
কবি সাহিত্যিক চামচুল বাৰিকে আঁতধৰা উক্ত মত বিনিময় অনুষ্ঠানত অজিত কুমাৰ ভূঞাৰ লগতে মনজিৎ মহন্ত, লাচিত বৰদলৈ আৰু ৰাছেল হুছেইন উপস্থিত থাকে।
মত বিনময় অনুষ্ঠানত সাংসদ অজিত কুমাৰ ভূঞাই বিজেপি চৰকাৰক তীব্ৰ সমালোচনা কৰি কয়, ‘বৰ্তমান নিৰ্বাচন সমাগত। গতিকে বিজেপিয়ে পুনৰ গাদী দখল কৰিবলৈ ৰাজনৈতিক ৰণকৌশল হিচাপে উজনিত হিন্দু হিন্দু আৰু নামনিত মুছলমান মুছলমান চিঞৰি ৰাজনীতি আৰম্ভ কৰিছে।’
‘নিৰ্বাচন আহিলেই দাড়ি আৰু টুপি দেখুৱাই ভোট লোৱাৰ বাহিৰে তেওঁলোকৰ আন এজেণ্ডা নাই।’ সাংসদ ভূঞাৰ মন্তব্য।
বৰ্তমান সময়ত আজমলৰ বাহিৰে বিজেপিৰ আন একো এজেণ্ডা নাই। স্বাস্থ্যত কি হ’ল, শিক্ষাত কি হ’ল, নিৱনুৱা সমস্যা সমাধানত কি হ’ল, মূল্যবৃদ্ধি ৰোধত কি হ’ল? সেইবোৰৰ উত্তৰ নাই। সকলো ফালে কেৱল আজমল আজমল আৰু আজমল।
তেওঁ লগতে কয়, ‘এনআৰচিৰ ভিত্তিবৰ্ষ যদি ১৯৫১ চন হয় তেতিয়াও বদৰুদ্দিন আজমল বিদেশী বুলি চিনাক্ত নহয়।’
তেওঁ কয়, বিজেপি চৰকাৰৰ দিনত যিমান বিলাক নিযুক্তি হ’ল সকলোতেই দুৰ্নীতি। আৰু এই দূৰ্নীতিৰ নায়কসকল বিজেপি আৰু আৰএচএচৰ নেতা।
‘আটাইতকৈ ভয়ংকৰ কথাটো হ’ল বিজেপি চৰকাৰে আৰক্ষী বিভাগটো গেৰুৱাকৰণ কৰিব বিচাৰিছে। সেইবাবেই নিযুক্তিৰ কেলেংকাৰীৰ নামত যি তদন্ত হৈছে সকলো ভেকুভাওনা।’ বিজেপি চৰকাৰক কটাক্ষ কৰি ভূঞাই কয়।
‘ৰাজ্যসভাৰ সাংসদ হোৱাটো মোৰ জয় নহয়। ই কা বিৰোধী শক্তিৰ জয়। সকলো কা বিৰোধী শক্তি একত্ৰিত হৈ মোক নিৰ্বাচিত কৰিছ।’ ভূঞাৰ মন্তব্য।
আঞ্চলিক দল সন্দৰ্ভত ভূঞাই কয়, ‘আজি অসমত কেইবাটাও আঞ্চলিক ৰাজনৈতিক দল গঠন হৈছে। ইয়াৰ বাবে অসমৰ ৰাইজ আজি বিভ্ৰান্ত আৰু অসন্তুষ্ট হৈছে। ২১ৰ নিৰ্বাচনত বিজেপিক পৰাস্ত কৰিবলৈ হ’লে উমৈহতীয়া কাৰ্যসূচীৰ ভিত্তিত সকলো ৰাজনৈতিক দল এক হৈ যুঁজিবলৈ আহ্বান জনায় অজিত কুমাৰ ভূঞাই।’
