বিধায়ক আবুল কালাম আজাদৰ বিৰুদ্ধে ধর্ষণৰ অভিযোগ : ২৭ জুনত জামিন আবেদনৰ শুনানি
ভৱানীপুৰ সমষ্টিৰ এ আই য়ু ডি এফৰ বিধায়ক আবুল কালাম আজাদৰ বিৰুদ্ধে ধৰ্ষণৰ গোচৰ ৰুজু হৈছে। আজিৰ পৰা ছবছৰ পূর্বে চাকৰি দিয়াৰ প্ৰলোভন দি দিচপুৰৰ বিধায়ক আৱাসৰ লগতে ভৱানীপুৰৰ বিধায়কজনৰ বাসভৱনতো এগৰাকী মহিলাক ধৰ্ষণ কৰাৰ অভিযোগ উত্থাপন হৈছে।
ভুক্তভোগী মহিলাগৰাকীয়ে এই সন্দৰ্ভত বৰপেটা থানাত দাখিল কৰা আবেদনৰ ভিত্তিত ভাৰতীয় দণ্ডবিধিৰ ৩৭৬/৫০৬ ধাৰাৰ অধীনত ২৫৬৬/২০১৮ নম্বৰৰ এটা গোচৰ ৰুজু কৰা হৈছে।
এই গোচৰৰ পৰা সকাহ বিচাৰি বিধায়ক আজাদে অন্তৰ্ৱতীকালীন জামিন বিচাৰি গুৱাহাটী উচ্চ ন্যায়লয়ত আবেদন জনায়। সোমবাৰে আদালতে শুনানি গ্ৰহণ কৰি ২৭ জুনত আৰক্ষীক কেছ ডায়েৰী দাখিলৰ নিৰ্দেশ দিয়ে। তদুপৰি, সেইদিনা জামিন সন্দৰ্ভত পুনৰ শুনানি গ্ৰহণ কৰা হ’ব।
আনহাতে, বিধায়কগৰাকীৰ বিৰুদ্ধে এজাহাৰ দাখিল কৰা অভিযোগকাৰী মহিলাগৰাকীয়ে জানিবলৈ দিয়ে যে ২০১৩ চনত তেওঁ বিধায়কগৰাকীৰ সংস্পৰ্শলৈ আহিছিল। তেওঁক এআইয়ুডিএফৰ টিকট দিয়াৰ আশ্বাস দি বিধায়কজন ঘনিষ্ঠি হৈ পৰিছিল। দলটোৰ পৰা তেওঁক ৬নং ৱাৰ্ডৰ প্ৰাৰ্থী হিচাপে টিকট দিছিল।
নিৰ্বাচনত পৰাজয় বৰণ কৰাৰ পাছত বিধায়কগৰাকীয়ে তেওঁক চতুৰ্থ শ্ৰেণীৰ চাকৰিৰ প্ৰলোভন দিচপুৰৰ বিধায়ক আৱাসলৈ লৈ গৈছিল বুলি অভিযোগকাৰীয়ে জানিবলৈ দিয়ে। মহিলাগৰাকীৰ অভিযোগ অনুসৰি, ২০১৩ চনৰ ৩ মাৰ্চ তাৰিখে বিধায়ক আৱাসত থকা বিধায়কগৰাকীৰ ৬৮ নং কোৱাৰ্টাৰত ৰাখি বিধায়ক আজাদে মহিলাগৰাকীৰ সন্মতি অবিহনে তিনিবাৰ ধৰ্ষণ কৰিছিল।
ইপিনে, বিধায়কগৰাকীয়ে তেওঁক ধৰ্ষণ কৰাৰ কথা প্ৰকাশ কৰিলে অপহৰণ তথা হত্যাৰ ভাবুকি দিয়া বুলিও মহিলাগৰাকীয়ে অভিযোগ কৰিছে। জীৱনৰ ভয়ত এইকথা কাৰো আগত প্ৰকাশ কৰা নাছিল বুলি জানিব দি অভিযোগকাৰীয়ে লগতে কয় যে বিধায়কগৰাকীয়ে ২০১৭ চনৰ ২ জুলাইত তেওঁৰ ভৱানীপুৰৰ বাসভৱনলৈ চাকৰি দিয়াৰ প্ৰলোভনেৰে মাতি নি ধৰ্ষণ কৰিছিল।
উল্লেখযোগ্য যে একাংশ সংবাদ মাধ্যমত সম্প্ৰচাৰিত হোৱা এ আই য়ু ডি এফৰ বিধায়ক আবুল কালাম আজাদৰ বিৰুদ্ধে এগৰাকী মহিলাই ধৰ্ষণ কৰাৰ অভিযোগৰ বাতৰিৰ পাছতে যোৱা বৰ্ষৰ ডিচেম্বৰ মাহত বিধায়ক আজাদে ভৱানীপুৰত এখন সংবাদমেল পাতি এয়া তেওঁৰ বিৰুদ্ধে এক ৰাজনৈতিক ষড়যন্ত্ৰ বুলি অভিহিত কৰিছিল।