গুৱাহাটীবাসীয়ে কাইলৈ নিজৰ ভোটাধিকাৰ সাব্যস্তৰ সমান্তৰালকৈ বিনামূলীয়াকৈ বাইক টেক্সি সেৱাৰ সোৱাদ লোৱাৰো সুযোগ লাভ কৰিছে। এই সুযোগ আগ বঢ়াইছে দেশৰ বৃহত্তম বাইক টেক্সি সেৱা ৰেপিডোই।
চলিত লোকসভা নিৰ্বাচনৰ তৃতীয় পৰ্য্যায়ৰ ভোটগ্ৰহণৰ দিনটোত অৰ্থাৎ কাইলৈ (২৩ এপ্ৰিল) গুৱাহাটীত ৰেপিডো বাইক টেক্সিয়ে ভোটাৰক ঘৰৰ পৰা ভোটকেন্দ্ৰলৈ বিনামূলীয়াকৈ লৈ যাব।
তাৰ বাবে এজন ভোটাৰে ৰেপিডো এপটোত গৈ (যদি এপটো নাই Play Store-ৰ পৰা download কৰিব পাৰে) বাইক বুক কৰোতে কুপন ক’ড IVOTE (আটাইকেইটা আখৰ ডাঙৰ হৰফৰ) ব্যৱহাৰ কৰিব লাগিব।
সুবিধাটো কেৱল কাইলৈৰ বাবে আৰু গুৱাহাটী সমষ্টিৰ ভিতৰতে সীমাবদ্ধ। পুৱা ৭ বজাৰ পৰা আবেলি ৫ বজালৈ এই সেৱা উপলব্ধ থাকিব, জনালে ৰেপিডো বাইক টেক্সিৰ গুৱাহাটীৰ কৰ্তৃপক্ষই।
বৃহত্তৰ গুৱাহাটীত এই বিনামূলীয়া সেৱাৰ বাবে প্ৰায় ২৫০০খনৰ পৰা ৩০০০খন বাইক দিনটোৰ বাবে সাজু থাকিব বুলি কৰ্তৃপক্ষই জানিবলৈ দিয়ে।