মণিপুৰৰ হিংসাক লৈ সংসদৰ বৰ্ষাকালীন অধিৱেশনত বিৰোধীসকলৰ বিক্ষোভ অব্যাহত আছে। তাৰমাজতে ইউনিফৰ্ম চিভিল কোড (ইউচিচি) আৰু মণিপুৰৰ ঘটনাৰ প্ৰতিবাদত দেশজোৰা ধৰ্মঘটৰ আহ্বান জনোৱা হৈছে। ৰাষ্ট্ৰীয় আদিবাসী একতা পৰিষদে সোমবাৰে ভাৰত বন্ধৰ আহ্বান জনাইছে।
মণিপুৰত মহিলাৰ ওপৰত চলি থকা হিংসাৰ প্ৰতিবাদৰ উপৰিও ৰাষ্ট্ৰীয় আদিবাসী একতা পৰিষদে দেশৰ আদিবাসীসকলৰ সম অধিকাৰৰ দাবীতো সৰৱ হৈ পৰিছে।
ভাৰত বন্ধৰ আহ্বান জনাই এই সংগঠনৰ সভাপতি ভাৰতী সিং আৰু ৰাঁচী জিলাৰ সভাপতি ৰাজেশ টপ্পোৱে কয়, “আগতে ২৭ জুলাইত ৰাষ্ট্ৰীয় আদিবাসী একতা পৰিষদে ঝাৰখণ্ডৰ মোৰাবাদৰ পৰা ৰাজভৱনলৈ সমদল উলিয়াইছিল। মণিপুৰ কাণ্ডৰ বাহিৰেও ইউনিফৰ্ম চিভিল কোডৰ বিৰুদ্ধে প্ৰতিবাদ হৈছিল।”
লগতে পঢ়ক: নিয়ন্ত্ৰণ হেৰুৱাই দলঙৰ ৰেলিং ভাঙি নদীত পৰিল তীৰ্থযাত্ৰীৰ বাছ; কমেও ৩ জন নিহত, আহত ২৪
ৰাঁচীৰ সভাপতিগৰাকীয়ে লগতে কয়, “মণিপুৰত জনজাতীয় লোকৰ বিৰুদ্ধে ক’ব নোৱাৰা নিৰ্যাতন চলি আছে। তেওঁলোকৰ ঘৰ জ্বলাই দিয়া হৈছে। বৃহৎ সংখ্যক জনজাতীয় লোকক মণিপুৰৰ পৰা পলায়ন কৰিবলৈ বাধ্য কৰা হৈছে। সেইবাবেই আমি প্ৰতিবাদ কৰিছো।”
ৰাষ্ট্ৰীয় আদিবাসী একতা পৰিষদৰ সভাপতি ভাৰতী সিঙে কয়, “উন্নয়ন, পৰিৱেশ আৰু বন্যপ্ৰাণী সংৰক্ষণ আৰু সুৰক্ষাৰ নামত আদিবাসীক নিজৰ বাসস্থান এৰি যাবলৈ বাধ্য কৰা হৈছে। তেওঁলোকৰ জীৱিকা কাঢ়ি লোৱা হৈছে। আদিবাসীক সমান নাগৰিক অধিকাৰ দিব লাগিব। আদিবাসীসকলৰ পৰিচয় মচি পেলোৱাৰ প্ৰচেষ্টা চলি আছে। সংবিধানে জনজাতীয় লোকক যি অধিকাৰ দিছে তাক খৰ্ব কৰা হৈছে।”
এই বিষয়বোৰ সন্মুখত ৰাখিয়েই ৰাষ্ট্ৰীয় আদিবাসী একতা পৰিষদে সোমবাৰে ২৪ ঘণ্টীয়া ভাৰত বন্ধৰ আহ্বান জনায়।
লগতে পঢ়ক: মাৰপিটৰ গোচৰত বিজেপি সাংসদৰ ২ বছৰ জেল; ৰাহুল গান্ধীৰ দৰেই বাতিল হ’ব সাংসদ পদ?
ভাৰত বন্ধৰ আহ্বান ইতিমধ্যে টুইটাৰত ট্ৰেণ্ডিং আৰম্ভ হৈছে। হিংসাত্মক পৰিস্থিতিত বিধ্বস্ত মণিপুৰত জনজাতীয় মাতৃ-ভগ্নীৰ কাষত থিয় দি বহুতে ছ’চিয়েল মিডিয়াত উল্লেখ কৰিছে যে তেওঁলোকে এই বন্ধক সমৰ্থন কৰিছে।
মণিপুৰৰ অশান্তি কোনোপধ্যেই বন্ধ হোৱা নাই। হিংসা বিধ্বস্ত মণিপুৰত পুনৰ গুলীচালনাৰ ঘটনা ঘটিছে। বিষ্ণুপুৰ জিলাত গুলীচালনা আৰু সংঘৰ্ষত ২১ জন লোক আহত হয়। তাৰ পাছত শনিবাৰে তাতেই মণিপুৰৰ এজন আৰক্ষীক গুলীয়াই হত্যা কৰা হয়। একে সময়তে তিনিজন গাঁৱৰ মানুহৰ মৃত্যু হোৱা বুলিও জনা গৈছে। অভিযোগ অনুসৰি এই আক্ৰমণ কুকি উগ্ৰপন্থীয়ে সংঘটিত কৰিছিল। মৃত লোককেইজন মেইটেই সম্প্ৰদায়ৰ সদস্য বুলিও জানিব পৰা গৈছে।
লগতে পঢ়ক: ‘হিন্দীৰ দাসত্ব মানি নলওঁ’, চৰকাৰী ভাষা প্ৰসংগত অমিত শ্বাহক প্ৰত্যুত্তৰ ষ্টেলিনৰ
সূত্ৰ অনুসৰি, গুলীচালনাৰ উপৰিও তাত কেইবাটাও ঘৰত অগ্নি সংযোগ কৰা হয়। হিংসা আৰু উত্তেজিত জনতাক নিয়ন্ত্ৰণ কৰিবলৈ আৰক্ষীয়ে কন্দুৱা গেছৰ চেল প্ৰয়োগ কৰিবলগীয়া হৈছিল। ইণ্ডিয়া ৰিজাৰ্ভ বেটেলিয়নৰ বেটেলিয়নৰ মুখ্য কাৰ্যালয়ৰ পৰাও আগ্নেয়াস্ত্ৰ লুটি নিয়াৰ অভিযোগ উত্থাপন হৈছে।
