RBI hikes repo rate by 50 basis pointsভাৰতীয় ৰিজাৰ্ভ বেংকে ৰেপো ৰেট বৃদ্ধি কৰিছে। আৰবিআই মুদ্ৰা নীতি সমিতিয়ে (মনিটাৰী পলিচি কমিটি) ৰেপো ৰেট ৫০ বেছিছ পইণ্ট বৃদ্ধি কৰি ৫.৪০% কৰিছে আৰু ষ্টেণ্ডিং ডিপজিট ফেচিলিটি (SDF) ৫.১৫% লৈ বৃদ্ধি কৰা হৈছে। ৰেপো ৰেটে প্ৰাক-কোভিডকালীন স্তৰো অতিক্ৰম কৰিলে।
ভাৰতীয় ৰিজাৰ্ভ বেঙ্কৰ মুদ্ৰা নীতি সমিতিয়ে তিনিদিনীয়া বৈঠকৰ পিছত এই সিদ্ধান্ত ঘোষণা কৰে।
শুকুৰবাৰে এক সংবাদমেলত ভাৰতীয় ৰিজাৰ্ভ বেংকৰ গভৰ্ণৰ শক্তিকান্ত দাসে এই সিদ্ধান্তৰ কথা সদৰী কৰে। এই বৈঠক যোৱা ৩ আগষ্টত আৰম্ভ হৈছিল। বিত্তীয় বৰ্ষ ২০২৩ৰ বাবে জিডিপি বৃদ্ধিৰ পূৰ্বানুমান ৭.২% নিৰ্দ্ধাৰণ কৰা হৈছে। একে সময়তে মূল্য বৃদ্ধিৰ হাৰ ৬.৭% থাকিব বুলি অনুমান কৰা হৈছে।
লগতে পঢ়ক: 5G আহিলে অচল হৈ পৰিব নেকি আপোনাৰ 4G স্মাৰ্টফোন?
ৰেপো ৰেট বৃদ্ধিৰ ফলত গাড়ী, গৃহ নিৰ্মাণকে ধৰি সকলো প্ৰকাৰৰ ঋণৰ সূতৰ হাৰ আৰু বৃদ্ধি হোৱাৰ সম্ভাৱনা আছে। তেনে ক্ষেত্ৰত ই.এম.আই বৃদ্ধিৰ ফলত সাধাৰণ নাগৰিকৰ ওপৰত চাপ বাঢ়িব। ২০১৯ চনৰ আগষ্টত কোভিড আৰম্ভ হোৱাৰ আগতে ৰেপো ৰেট আছিল ৫.১৫ শতাংশ।
একাংশ অৰ্থনীতিবিদৰ মতে মুদ্ৰাস্ফীতিৰ হাৰ হ্ৰাস কৰিবলৈ ভাৰতীয় ৰিজাৰ্ভ বেংকে ৰেপো ৰেট বৃদ্ধি কৰিছে।
উল্লেখ্য যে ৰিজাৰ্ভ বেংকে যোৱা জুনত ৰেপো ৰেট বৃদ্ধি কৰিছিল। ৰেপো ৰেট ৫০ বেছিছ পইণ্ট বৃদ্ধি কৰা হৈছিল। আৰবিআইয়ে দেশৰ বেংকবোৰক যি হাৰত হ্ৰস্বম্যাদী ঋণ দিয়ে সেইহাৰক ৰেপো ৰেট বুলি কোৱা হয়। এই ৰেপো ৰেট বৃদ্ধি পালে বেঙ্কৰ ব্যয়ো বৃদ্ধি হয়। তেতিয়া তাৰ বোজা সাধাৰণ মানুহৰ কান্ধত আহি পৰে।
সেয়েহে, অৰ্থনৈতিক বিশেষজ্ঞসকলে ভাৱে যে ৰাজহুৱা-ব্যক্তিগত গৃহ ঋণৰ সূতৰ হাৰ অতি সোনকালে বৃদ্ধি হ’ব। ৰেপো ৰেট বৃদ্ধিৰ ফলত ফ্ল’টিং ৰেটৰ ওপৰত দীৰ্ঘম্যাদী প্ৰভাৱ পৰিব। এইক্ষেত্ৰত গৃহ ঋণৰ দৰে দীৰ্ঘম্যাদী ঋণৰ ক্ষেত্ৰত গ্ৰাহকৰ ওপৰত চাপ যথেষ্ট বৃদ্ধি পাব।
