আকৌ হিণ্ডেনবাৰ্গ প্ৰতিবেদন ওলাইছে। এই প্ৰতিবেদনে নতুন বিতৰ্কৰ জন্ম দিছে।আমাৰ সকলোৰে মনত আছে ২০২৩ চনৰ জানুৱাৰী মাহত Hindenburg Researchৰ প্ৰতিবেদনে দেশত কেনে খলকনিৰ সৃষ্টি কৰিছিল। সেই প্ৰতিবেদনত আদানীৰ বিৰুদ্ধে বিত্তীয় জালিয়াতিৰ কেতবোৰ গুৰুতৰ অভিযোগ উত্থাপন কৰা হৈছিল। তাকলৈ সেই সময়ত সংসদৰ উভয় সদন উত্তাল হৈ পৰিছিল।
তেতিয়াই ঘটনা গৈ উচ্চতম ন্যায়ালয়ৰ মজিয়া পাইছিল।কিন্তু নানা ধৰণৰ যুক্তি-তৰ্কৰ মূৰকত উচ্চতম ন্যায়ালয়ে মত দিছিল যে Hindenburg Researchএটা বিদেশী সংস্থা। তাৰ কথাত আমি ইমান গুৰুত্ব দিয়া উচিত নহয়। চেবী এটা দেশীয় সংস্থা। চেবীৰ ওপৰত আমাৰ সম্পূৰ্ণ আস্থা আছে। গতিকে চেবীকে তেওঁলোকে সমগ্ৰ বিষয়টো অনুসন্ধান কৰি তাৰ এটা হেস্ত নেস্ত কৰিবলৈ নিৰ্দ্দেশ দিছিল। তাৰপিছত চেবীয়ে আজি ইটো কালি সিটো কৰি তেওঁলোকৰ অনুসন্ধান পিছুৱাই আছিল।
শেষত চেবীয়ে কৈছিল যে তেওঁলোকে আদানীৰ বিত্তীয় জালিয়াতিৰ কোনো শুংসূত্ৰ বিচাৰি নাপালে। উচ্চতম ন্যায়ালয়েও বাৰু বুলি সিমানতে সকলো সামৰি থ’লে।তেতিয়া কথা তাতেই শেষ হৈছিল। যদিও চেবী আৰু উচ্চতম ন্যায়ালয়ৰ সিদ্ধান্ত পক্ষপাতদুষ্ট আছিল বুলি বহুতেই মন্তব্য কৰিছিল। কিন্তু এতিয়া Hindenburg Researchএ আকৌ নতুন তথ্যপাতি সদৰি কৰিছে।
এইবাৰৰ প্ৰতিবেদনত কোৱা হৈছে যে চেবীৰ অধ্যক্ষ মাধবী পুৰী ব্যাস আৰু তেওঁৰ স্বামী ধোভাল ব্যাস দুয়ো বেনামী কম্পেনীৰ যোগেদি আদানীয়ে বিদেশত ধন সৰবৰাহ কৰা কাৰ্যত জড়িত।এই ভূৱা কম্পেনীবোৰৰ যোগেদি গৌতম আদানীৰ ককায়েক বিনোদ আদানীয়ে বিদেশত টকাৰ লেনদেন কৰিছিল। চেবীৰ মুৰব্বী নিজেই যদি আদানীৰ টকা পইছাৰ লেনদেনত জড়িত তেওঁ কেনেকৈ নিৰপেক্ষভাবে আদানীৰ বিত্তীয় জালিয়াতীৰ অনুসন্ধান কৰিব পাৰে?
সেইকাৰণেই ইমানদিনে চেবীয়ে আদানীৰ বিত্তীয় কেলেংকাৰীৰ অনুসন্ধানত হোহোকাপিছলা কৰি আছে আৰু আদানীৰ প্ৰতি ইমানদিনে উদাৰ মনোভাব লৈ আহিছে।বিদেশত থকা বেনামী সংস্থা সমূহৰ বিত্তীয় লেনদেনৰ প্ৰক্ৰিয়াটো অতি জটিল। কিন্তু আদানীৰ বিত্তীয় লেনদেনত যে এই বেনামী সংস্থা সমূহৰ এক বিশেষ ভূমিকা আছে সেইটো নিশ্চিত। এতিয়া বিভিন্নজনে কোৱাকুই কৰিছে যে চেবীৰ মুৰব্বী হিচাপে শ্ৰীমতী ব্যাসে পালন কৰিবলগীয়া দায়িত্ব আৰু তেওঁৰ নিজৰ বিত্তীয় স্বাৰ্থৰ মাজত এটা সম্পৰ্ক আছে। Hindenburg Researchৰ প্ৰতিবেদনত কোৱা হৈছে যে এতিয়ালৈ আদানীৰ বিত্তীয় কেলেংকাৰীৰ বিষয়ে চেবীয়ে অনুসন্ধান কৰি কি পাইছে তাক পৰীক্ষা কৰাটো অতি জৰুৰী।
হিন্দেনবাৰ্গ প্ৰতিবেদনৰ অভিযোগবোৰ ব্যাস দম্পত্তিয়ে এটা বিবৃতি দি ভিত্তিহীন বুলি কৈছে আৰু লগতে কৈছে যে তেওঁলোকৰ সকলো বিত্তীয় লেনদেন সম্পূৰ্ণ স্বচ্চ আৰু নিকা।তেওঁলোকে কৈছে যে ব্যাস ২০১৭ চনত চেবীৰ পূৰ্ণ কালীন সদস্য হোৱাৰ আগতে আৰু পৰৱৰ্তী সময়ত ২০২২ চনত চেবীৰ মুৰব্বী হিচাপে নিযুক্তি পোৱাৰ আগতেই তেওঁলোকে বিদেশী কোম্পানীত ২০১৫ চনতে ধন বিনিয়োগ কৰিছিল। Hindenburg Researchএ এই সন্দৰ্ভত নিজৰ প্ৰতিক্ৰিয়া প্ৰকাশ কৰি কৈছে যে ব্যাস দম্পত্তীয়ে যে ধন বিনিয়োগ কৰিছিল সেইটো তেওঁলোকে অন্ততঃ এতিয়া মানি ল’বলৈ বাধ্য হৈছে।ইয়াৰ উপৰিও তেওঁলোকৰ বক্তব্যই আৰু বহু নতুন গুৰুত্বপূৰ্ণ প্ৰশ্নৰ জন্ম দিছে।
প্ৰথম কথা, কোনোবাই কাৰোবাৰ বিৰুদ্ধে কিবা এটা অভিযোগ উত্থাপন কৰিলেই মোদী চৰকাৰে তেওঁলোকৰ বিৰুদ্ধে এজেন্সি লগাই অভিযোগ উত্থাপন কৰা হৈছে। তেওঁ বিৰোধী পক্ষৰ লোক হয়। কিন্তু অভিযুক্ত ব্যক্তি গৰাকী যদি চৰকাৰী পক্ষ বা চৰকাৰৰ সমৰ্থক হয় অভিযোগ যিমানেই গুৰুতৰ নহওক কিয় তাক যি কোনো প্ৰকাৰে ঢাকি ৰাখিবলে চেষ্টা কৰা হয়।এই ক্ষেত্ৰত উচ্চতম ন্যায়ালয়ৰ ভূমিকাও বৰ নিৰাশজনক।এতিয়া হিন্দেনবাৰ্গ ৰিচাৰ্চৰ শেহতীয়া প্ৰতিবেদন প্ৰকাশ পোৱাৰ পিছত চেবীৰ ভূমিকা সম্পৰ্কে বিৰোধী পক্ষই চেবীৰ অধ্যক্ষৰ পদত্যাগৰ দাবী তুলিছে আৰু বিষয়টোত উচ্চতম ন্যায়ালয়ৰ হস্তক্ষেপ বিচাৰিছে।দেখা যাওক চৰকাৰ আৰু উচ্চতম ন্যায়ালয়ে এতিয়া কি ভূমিকা লয়।
