দিল্লীৰ মুখ্যমন্ত্ৰী তথা আম আদমী পাৰ্টিৰ নেতা অৰবিন্দ কেজৰিৱালে ভাৰতীয় জনতা পাৰ্টিৰ বিৰু্দ্ধে এক গুৰুত্বৰ অভিযোগ আনিছে।
কেজৰিৱালে অভিযোগ কৰে যে ২৬ জানুৱাৰীৰ গণৰাজ্য দিৱসত লালকিল্লাত সংঘটিত হোৱা হিংসাত্মক কাণ্ডৰ পৰিকল্পিত আছিল।
দেওবাৰে উত্তৰ প্ৰদেশৰ মীৰাটত অনুষ্ঠিত কৃষি আইন বিৰোধী এখন সমাৱেশত অংশগ্ৰহণ কৰি তেওঁ কয় যে হিংসাত্মক কাণ্ড আৰু লালা কিল্লাত এখন বিশেষ পতাকা উত্তোলনৰ আঁৰত আছিল বিজেপিৰ দলীয় কৰ্মীসকল।
বিজেপি কৰ্মীসকলৰ পৰিকল্পনামতেই কৃষক আন্দোলনটোক বদনাম কৰিব বিচৰা বুলি তেওঁ কয়।
‘‘আজি, বিজেপিৰ কেন্দ্ৰীয় চৰকাৰে কৃষকসকলৰ বিৰুদ্ধে ৰাষ্ট্ৰদোহী আচাৰ-আচৰণৰ বাবে গোচৰসমূহ ৰুজু কৰিছে। আনকি ব্ৰিটিছৰো এই সাহস নাছিল। বিজেপিয়ে আমাৰ কৃষকসকলক সন্ত্ৰাসবাদী সজাইছে।’’ কেজৰিৱালে ক্ষোভ প্ৰকাশ কৰে।
কৃষি আইনকেইখন কৃষকৰ বাবে ‘‘মৃত্যুৰ দলিল’’ বুলি অভিহিত কৰি কেজৰিৱালে কয় যে চৰকাৰে কৃষকসকলৰ পৰা মাটিসমূহ কাঢ়ি ৩-৪ জন পুঁজিবাদীক গটাই দিব বিচাৰিছে।
কৃষি আইনকেইখনে কৃষকসকলক নিজৰ মাটিতে শ্ৰমিক হিচাপে পৰিগণিত কৰাব বুলি কেজৰিৱালে কয় যে পৰিস্থিতিটো কৃষকসকলৰ বাবে ‘হয় কৰিম নহয় মৰিম’ হৈ পৰিছে।
‘‘আনকি ব্ৰিটিছসকলেও আমাৰ কৃষকসকলক ইমান দমন কৰা নাছিল। এই চৰকাৰখনে ব্ৰিটিছসকলক পাছ পেলাই গৈছে।’’ কেজৰিৱালে কয়।
উল্লেখযোগ্য যে কৃষক আন্দোলনটোক আৰম্ভণীৰে পৰা আম আদমী পাৰ্টি তথা অৰবিন্দ কেজৰিৱালে সমৰ্থন জনাই আহিছে।
