বিখ্যাত পৰিচালক ৰীমা দাসৰ শেহতীয়া বোলছবি ‘নট এ হিৰো’ (Not a Hero)-ৰ ২০২৬ চনৰ বাৰ্লিন আন্তঃৰাষ্ট্ৰীয় চলচ্চিত্ৰ মহোৎসৱত প্ৰদৰ্শন হয়। ছবিগৃহত উপস্থিত থকা দৰ্শকৰ বিপুল সঁহাৰিৰ মাজত পৰিচালকগৰাকীৰ লগতে ছবিখনৰ কলা-কুশলীসকলে ৰেড কাৰ্পেটত খোজ দি এই বিশেষ মূহূৰ্তটো উদযাপন কৰে।
প্ৰদৰ্শনৰ পাছত নিজৰ অনুভৱ ব্যক্ত কৰি ৰীমা দাসে কয় যে এই ছবিখনে তৰুণ প্ৰজন্মৰ দৰ্শকৰ ওপৰত গভীৰ আস্থা প্ৰকাশ কৰিছে। তেওঁ কয়, “‘নট এ হিৰো’ ছবিখনে কিশোৰ-কিশোৰীসকলৰ মনৰ আৱেগিক জটিলতা আৰু অস্পষ্টতাক উপলব্ধি কৰিবলৈ তেওঁলোকক সুযোগ দিছে। ইয়াত কোনো অভিজ্ঞতাকেই সৰলীকৰণ কৰা হোৱা নাই বা কোনো সংঘাতক সহজতে সমাধান কৰা হোৱা নাই। মই কৃতজ্ঞ যে ছবিখনৰ প্ৰিমিয়াৰ ‘জেনেৰেচন’ (Generation) শাখাত অনুষ্ঠিত হৈছে; য’ত শিশুসকলক কেৱল এটা চিহ্ন বা শিক্ষাৰ আহিলা হিচাপে নহয়, বৰঞ্চ একো একোটা পূৰ্ণাংগ ব্যক্তিত্ব হিচাপে প্ৰদৰ্শন কৰা হয়।”
উল্লেখ্য যে ‘নট এ হিৰো’ ছবিখনৰ কাহিনী এজন কিশোৰক কেন্দ্ৰ কৰি গঢ়ি উঠিছে, যি চহৰীয়া বিলাসিতাৰ পৰা আঁতৰি নিজৰ পূৰ্বপুৰুষৰ গাঁৱলৈ যাবলগীয়া হয়। তাত সি এজনী সম্পৰ্কীয় মাহীয়েকক লগ পায়, এটা ঘোঁৰাৰ সৈতে বন্ধুত্ব কৰে আৰু স্থানীয় শিশুসকলৰ সৈতে দুঃসাহসিক অভিযানত নামি পৰে। এই যাত্ৰাতে সি অফলাইন বা ইণ্টাৰনেটবিহীন জীৱনৰ সৌন্দৰ্য আৰু নিজৰ ভিতৰত লুকাই থকা সাহসক আৱিষ্কাৰ কৰে।
ছবিখনৰ চিত্ৰগ্ৰহণকাৰী তথা কাৰ্যবাহী প্ৰযোজক আদিত্য বাৰ্মাই এই যাত্ৰাক ‘পৰিৱৰ্তনশীল’ বুলি অভিহিত কৰে। তেওঁ ৰীমা দাসৰ সংবেদনশীল দৃষ্টিৰ অধীনত কাম কৰি চিনেমাৰ বিশুদ্ধতা অনুভৱ কৰা বুলি জনায়। আনহাতে, অভিনেত্ৰী সুকন্যা বৰুৱাই কয় যে ৰীমা দাসে অভিনেতা-অভিনেত্ৰীসকলৰ বাবে এক সুৰক্ষিত আৰু স্বাভাৱিক পৰিৱেশ সৃষ্টি কৰে য’ত মৌনতাৰো এক বিশেষ মহত্ত্ব থাকে। সংগীত পৰিচালক পল্লৱ তালুকদাৰে জানিবলৈ দিয়ে যে এই ছবিখনত সংগীত এক চৰিত্ৰৰ দৰে হৈ পৰিছে।
বাৰ্লিন মহোৎসৱত ৰীমা দাসৰ এয়া তৃতীয়খন ফিচাৰ ফিল্ম। ইয়াৰ পূৰ্বে ২০১৯ চনত তেওঁৰ ‘বুলবুল কেন ছিং’ (Bulbul Can Sing) ছবিয়ে বিশেষ সন্মান লাভ কৰিছিল আৰু ২০২০ চনত তেওঁ একেটা বিভাগতে জুৰীৰ সদস্য হিচাপে কাৰ্যনিৰ্বাহ কৰিছিল। উল্লেখযোগ্য যে তেওঁৰ কালজয়ী ছবি ‘ভিলেজ ৰকষ্টাৰ্ছ’ (Village Rockstars) অহা ৬ মাৰ্চ, ২০২৬ ত ছবিগৃহত মুক্তি পাবলৈ সাজু হৈছে।
ৰীমা দাস এগৰাকী দুবাৰকৈ ৰাষ্ট্ৰীয় বঁটা বিজয়ী চলচ্চিত্ৰ নিৰ্মাতা। ২০২৪ চনত তেওঁ ‘একাডেমী অৱ মোচন পিকচাৰ আৰ্টছ এণ্ড চাইন্সেছ’ৰ সদস্য পদ লাভ কৰে। ‘ভিলেজ ৰকষ্টাৰ্ছ’ (২০১৭), ‘বুলবুল কেন ছিং’ (২০১৮), ‘তৰাছ হাজবেণ্ড’ (২০২২) আৰু ‘ভিলেজ ৰকষ্টাৰ্ছ ২’ (২০২৪) আদি ছবিৰে তেওঁ বিশ্বৰ ১৫০ তকৈও অধিক চলচ্চিত্ৰ মহোৎসৱত অংশগ্ৰহণ কৰি ৭৫ তকৈও অধিক আন্তঃৰাষ্ট্ৰীয় বঁটা আজুৰি আনিবলৈ সক্ষম হৈছে।
