কোভিড-১৯ৰ সংক্ৰমণৰ আশংকা কামিন তাৰ পৰীক্ষা কৰাৰ বাবে যোৱা মাৰ্চ মাহত জিঅ’ই Covid-19 symptom checker tool মুকলি কৰিছিল।
এই চেকাৰ টুলক লৈয়েই এইবাৰ সৃষ্টি হৈছে এক গুৰুতৰ বিতৰ্কৰ।
অভিযোগ অনুসৰি, যিসকল গ্ৰাহকে তেওঁলোকৰ সংক্ৰমণৰ আশংকা পৰীক্ষা কৰিছে তেওঁলোকৰ ব্যক্তিগত সকলো তথ্য ফাদিল হৈ পৰিছে।
এই সন্দৰ্ভত এক চাঞ্চল্যকৰ প্ৰতিবেদন প্ৰকাশ পোৱাৰ পাছতেই ৰিলায়েন্স জিঅ’ই সেই সকলো তথ্য ইন্টাৰনেটৰ পৰা অঁতৰাই দিছে।
জানিব পৰা মতে, যোৱা ১৭ এপ্ৰিলৰ পৰা গ্ৰাহকসকলৰ ব্যক্তিগত তথ্য Covid-19 symptom checker toolত অন্তৰ্ভুক্ত আছিল।
যিসকল গ্ৰাহকে জিঅ’ৰ এই Covid-19 symptom checker tool ব্যৱহাৰ কৰিছে তেওঁলোকৰ অপাৰেটিং চিষ্টেম, ব্ৰাউজাৰৰ নাম, প্ৰফাইল নথি, উপসৰ্গ বিষয়ক প্ৰশ্নৰ উত্তৰ আদি মুকলি হৈ পৰিছে।
তদুপৰি, গ্ৰাহকৰ ঘৰ, তেওঁ কোন অঞ্চলৰ বাসিন্দা, নাম, বয়স, বিদেশ ভ্ৰমণকে ধৰি বহু ব্যক্তিগত তথ্য ফাদিল হৈ পৰে।
TechCrunch নামৰ ৱেব মিডিয়াত প্ৰকাশ পোৱা এক প্ৰতিবেদনৰ পাছতেই বিষয়টো ৰাজহুৱা হৈ পৰে।
বাতৰিটো পোহৰলৈ অহাৰ পাছতে মুম্বাইস্থিত জিঅ’ৰ কাৰ্যালয় তৎপৰ হৈ পৰে। ততাতয়াকৈ এটা বিবৃতি জাৰি কৰি জিঅ’ৰ মুখপাত্ৰ তুষাৰ পানিয়াই কয়,’’আমি লগে লগে ব্যৱস্থা গ্ৰহণ কৰিছো।‘’
কিন্তু কেনেকৈ গ্ৰাহকৰ এনেধৰণৰ ব্যক্তিগত তথ্য ফাদিল হৈ গ’ল?
এই সন্দৰ্ভত মুখপাত্ৰ গৰাকীয়ে কয়,’’ প্ৰকৃততে Login Serverত ৱেবছাইটৰ পাৰফৰমেন্স চোৱাচিতা কৰি থকা হৈছিল আৰু সেই সময়তে গ্ৰাহকসকলে কোভিড-১৯ৰ সংক্ৰমণৰ আশংকাত লক্ষণৰ কথা জনাই পৰীক্ষা কৰিছিল।‘’
ইন্টাৰনেট সুৰক্ষা বিশেষজ্ঞই ইতিমধ্যে আশংকা প্ৰকাশ কৰিছিল যে জিঅ’ৰ এই টুলত ত্ৰুটী আছে। কোনো পাছৱৰ্ড অবিহনে এই ডাটাবেছ ইন্টাৰনেটত চেভ আছিল। যিটো সাধাৰণতে নহয়। ইয়াৰ অৰ্থ হৈছে ইয়াত কোনো ত্ৰুটী আছে।
ইপিনে, গ্ৰাহকৰ ব্যক্তিগত তথ্য তেওঁলোকৰ অজানিতে ইন্টাৰনেটত ফাদিল হৈ পৰাৰ বাতৰিৰ পাছতে ৰিলায়েন্স জিঅ’ সেয়া ইন্টাৰনেটৰ পৰা অঁতৰাই দিছে। কিন্তু গ্ৰাহকসকলৰ সেই ব্যক্তিগত তথ্যসমূহ কোনো হেকাৰৰ হাতত পৰিছে নেকি তাক লৈ সৃষ্টি হোৱা আশংকা এতিয়াও দূৰ হোৱা নাই।
