অসমৰ তিনিবাৰকৈ মুখ্যমন্ত্ৰী হিচাপে দায়িত্ব পালন কৰা আৰু সাংসদ তথা কেন্দ্ৰীয় মন্ত্ৰী হিচাপে সমগ্ৰ দেশতে জনপ্ৰিয়তা অৰ্জন কৰা প্ৰয়াত নেতা তৰুণ গগৈৰ আজি ৯১ সংখ্যক জন্মদিন উপলক্ষে গুৱাহাটীৰ ৰাজীৱ ভৱনত এক অনুষ্ঠানৰ আয়োজন কৰা হয়। এই অনুষ্ঠানত দলীয় নেতা-কৰ্মীসকলে তেখেতক শ্ৰদ্ধাৰে স্মৰণ কৰে আৰু তেখেতৰ অৱদানৰ পৰ্যালোচনা কৰে। ৰাজীৱ ভৱনৰ লগতে অসমৰ বিভিন্ন জিলা কংগ্ৰেছ কাৰ্যালয়তো এই জন্মদিন উদযাপন কৰা হয়।
তৰুণ গগৈয়ে অসমৰ বিধ্বস্ত অৰ্থনীতিক পুনৰুজ্জীৱিত কৰাৰ লগতে নিবনুৱা সমস্যা সমাধান, স্বাস্থ্য খণ্ডৰ উন্নয়ন, বাট-পথ আৰু দলংৰ মেৰামতি তথা নিৰ্মাণৰ জৰিয়তে ৰাজ্যখনক এক নতুন দিগন্ত প্ৰদান কৰিছিল। তেখেতৰ এই অৱদানসমূহক স্মৰণ কৰি অসমৰ বিভিন্ন শ্ৰেণীৰ লোকে আজি তেখেতক শ্ৰদ্ধা জ্ঞাপন কৰে।
ৰাজীৱ ভৱনত অনুষ্ঠিত অনুষ্ঠানত দেৱব্ৰত শইকীয়া, প্ৰাক্তন সাংসদ ৰিপুন বৰা আৰু আব্দুল খালেকে অংশগ্ৰহণ কৰি প্ৰয়াত নেতাগৰাকীৰ জীৱনযোৰা সাধনা আৰু ৰাজ্যৰ উন্নয়নত কৰা কাম-কাজৰ বিষয়ে আলোচনা কৰে। দলৰ সাধাৰণ সম্পাদক বিপুল গগৈয়ে অনুষ্ঠানটোৰ আঁত ধৰে আৰু গুৱাহাটী মহানগৰ জিলা কংগ্ৰেছ, মহিলা কংগ্ৰেছ, যুৱ কংগ্ৰেছ আৰু এনএছইউআইৰ সদস্যসকলে অংশগ্ৰহণ কৰে। অনুষ্ঠানত বালিকা লাহন পেগুৱেও প্ৰয়াত নেতাগৰাকীক স্মৰণ কৰি বক্তব্য ৰাখে। ইফালে, অসম ভ্ৰমণত অহা কংগ্ৰেছৰ জ্যেষ্ঠ নেতা দিগ্বিজয় সিঙে তৰুণ গগৈক স্মৰণ কৰি তেখেতৰ প্ৰতি শ্ৰদ্ধা জ্ঞাপন কৰে।
