অ’ ফুলেশ্বৰি বুকুৰে লগৰী, বেলি গ’ল গধূলি হ’ল, মধুৰ মুৰতি, নামামী ব্ৰহ্মপুত্ৰ আদি জনপ্ৰিয় গীতেৰে অসমৰ সংগীত জগত খনক সমৃদ্ধ কৰা বিশিষ্ট গীতিকাৰ, সুৰকাৰ আৰু সংগীত পৰিচালক মন্মথ বৈশ্যৰ পৰলোকপ্ৰাপ্তি ঘটিছে।
সোমবাৰে নিশা ১১-৩০ বজাত গুৱাহাটীৰ হেল্থ চিটি হস্পিতালত তেওঁৰ পৰলোক প্ৰপ্তি ঘটে।
বিশিষ্ট গীতিকাৰ মন্মথ বৈশ্য যোৱা ১৫ আগষ্টৰ পৰা গুৱাহাটীৰ হেল্থ চিটি হস্পিতালত চিকিৎসাধীন হৈ আছিল।
শতাধিক গীত আৰু ঋণ মুক্তি আদিৰ দৰে উপন্যাস ৰচনাৰে অসমৰ সাহিত্য জগতলৈ আগবঢ়োৱা অৱদানৰ বাবে স্মৰণীয় হৈ ৰৱ গীতিকাৰ বৈশ্য।
তেখেতৰ মৃত্যু অসমৰ সংগীত জগতৰ এক অপুৰণীয় ক্ষতি।
উল্লেখ্য যে অসম সাহিত্য সভাৰ মুখপাত্ৰ ড০ সঞ্জীৱ কুমাৰ শৰ্মা, ৰামধেনুৰ আহ্বায়ক মানিক আহমেদ প্ৰমুখ্যে এটি দলে সোমবাৰে দিনৰ ভাগত স্বাস্থ্যৰ বুজ লোৱা উদেশ্যে চিকিৎসালয়খনত উপস্থিত হৈছিল।
অসমৰ সাহিত্য জগতলৈ আগবঢ়োৱা বিশিষ্ট অৱদানৰ পিছতো মন্মথ বৈশ্যই বিশেষ একো স্বীকৃতি নাপালে বুলিও দলটোৱে আক্ষেপ প্ৰকাশ কৰিছিল।
অসম সাহিত্য সভাকে ধৰি বিভিন্নজনে গীতিকাৰ বৈশ্যৰ বিদেহ আত্মাৰ চিৰ শান্তি কামনা কৰাৰ লগতে শোক সন্তপ্ত পৰিয়াল বৰ্গলৈ গভীৰ সমবেদনা জ্ঞাপন কৰিছে।
