ব্ৰিটেইনৰ ৰাজনীতিত বৰ্তমান তীব্ৰ উত্তেজনা আৰু উথল-থথল দেখিবলৈ পোৱা গৈছে। সংবাদ মাধ্যমৰ খবৰ অনুসৰি ব্ৰিটেইনৰ প্ৰধানমন্ত্ৰী কীৰ ষ্টাৰমাৰে তেওঁৰ ঘনিষ্ঠ সতীৰ্থসকলৰ আগত প্ৰকাশ কৰিছে যে তেওঁ নিজৰ পদ এৰিবলৈ সাজু হৈছে। ডেইলি মেইলৰ এক প্ৰতিবেদনত কেবিনেটৰ এজন সদস্যৰ উদ্ধৃতি দি এই ডাঙৰ দাবী কৰা হৈছে। এই প্ৰতিবেদনত কোৱা হৈছে যে বৰ্তমান চলি থকা ৰাজনৈতিক সংকট আৰু বেছিদিন ধৰি ৰাখিব নোৱাৰে বুলি প্ৰধানমন্ত্ৰী ষ্টাৰমাৰে এতিয়া বুজি পাইছে।
প্ৰতিবেদন অনুসৰি তেওঁ অতি সন্মানজনকভাৱে আৰু নিজৰ চৰ্তত পদত্যাগ কৰিব বিচাৰে। ষ্টাৰমাৰে অতি সোনকালে তেওঁৰ পদত্যাগৰ এটা সময়সীমা নিৰ্ধাৰণ কৰাৰ সম্ভাৱনা আছে। বৰ্তমান ব্ৰিটেইন চৰকাৰ বহুতো সমস্যাৰ সন্মুখীন হৈছে আৰু চৰকাৰৰ বিৰুদ্ধে জনসাধাৰণৰ অসন্তুষ্টি ক্ৰমান্বয়ে বাঢ়ি গৈছে। পিটাৰ মেণ্ডেলছনৰ নিযুক্তি আৰু আমেৰিকাৰ অপৰাধী জেফ্ৰী এপষ্টিনৰ সৈতে থকা সম্পৰ্কৰ বিতৰ্কই চৰকাৰখনৰ বাবে ডাঙৰ সমস্যাৰ সৃষ্টি কৰিছে। ইয়াৰ উপৰি শেহতীয়া স্থানীয় নিৰ্বাচনত লেবাৰ পাৰ্টীৰ বেয়া প্ৰদৰ্শনেও প্ৰধানমন্ত্ৰীগৰাকীৰ ওপৰত চাপ বহুগুণে বৃদ্ধি কৰিছে।
পৰিস্থিতি তেতিয়া অধিক বেয়া হৈ পৰে যেতিয়া কেবিনেটৰ প্ৰ প্রাক্তন স্বাস্থ্য মন্ত্ৰী ৱেছ ষ্ট্ৰীটিঙে নিজৰ পদৰ পৰা পদত্যাগ কৰে। ষ্ট্ৰীটিঙে স্পষ্টকৈ কৈছে যে ভৱিষ্যতে যদি লেবাৰ পাৰ্টীত নেতৃত্বৰ বাবে নিৰ্বাচন হয়, তেন্তে তেওঁ ষ্টাৰমাৰক প্ৰত্যাহ্বান জনাব। তেওঁ ষ্টাৰমাৰক পদত্যাগৰ সময়সীমা ঠিক কৰিবলৈও দাবী জনাইছে। আনহাতে ইউগভ নামৰ এক সমীক্ষা সংস্থাৰ মতে ব্ৰিটেইনৰ প্ৰায় ৬৯ শতাংশ নাগৰিকৰ ধাৰণা ষ্টাৰমাৰৰ প্ৰতি নেতিবাচক হৈ পৰিছে। তেওঁক বৰ্তমান আটাইতকৈ অপ্ৰিয় প্ৰধানমন্ত্ৰী হিচাপে অভিহিত কৰা হৈছে, যাৰ বাবে বহুতে তেওঁক পূৰ্বৰ প্ৰধানমন্ত্ৰী লিজ ট্ৰাছৰ সৈতে তুলনা কৰিছে, যিয়ে মাত্ৰ ৪৯ দিনহে শাসন কৰিছিল।
কেৱল জনসাধাৰণেই নহয়, লেবাৰ পাৰ্টীৰ বহুতো সাংসদো এতিয়া ষ্টাৰমাৰৰ নেতৃত্বক লৈ চিন্তিত হৈ পৰিছে। দলৰ নেতাসকলে ভয় কৰিছে যে যদি তেওঁৰ জনপ্ৰিয়তা এইদৰেই তললৈ নামি থাকে, তেন্তে ভৱিষ্যতে লেবাৰ চৰকাৰ পুনৰ ক্ষমতালৈ অহাটো কঠিন হৈ পৰিব। ইয়াৰ পোনপটীয়া লাভ নাইজেল ফাৰাজৰ নেতৃত্বত থকা সোঁপন্থী দল ৰিফৰ্ম ইউকে-ই লাভ কৰিব পাৰে বুলি এতিয়া আশংকা কৰা হৈছে।
