মণিপুৰত মানৱ সৰবৰাহকাৰীৰ পৰা উদ্ধাৰ কৰা শতাধিক নেপালী কিশোৰী, যুৱতীক স্বগৃহলৈ প্ৰেৰণ কৰা হ’ব : মেনকা গান্ধী
মণিপুৰৰ ইম্ফলত অলপতে মানৱ সৰবৰাহকাৰীৰ কবলৰ পৰা উদ্ধাৰ কৰা নেপালৰ ১৪৭গৰাকী কিশোৰী আৰু ৩২জন কিশোৰক শীঘ্ৰেই নিজ দেশলৈ প্ৰেৰণ কৰাৰ ব্যৱস্থা কৰিছে ভাৰত চৰকাৰে। কেন্দ্ৰীয় মহিলা আৰু শিশু উন্নয়ন মন্ত্ৰী মেনকা গান্ধীয়ে বৃহস্পতিবাৰে টুইটাৰ যোগে এই কথা সদৰী কৰিছে।
বৈদেশিক মন্ত্ৰ্যালয়ে ইতিপূৰ্বে ইয়াৰ বাবে প্ৰয়োজনীয় অনুমতি দিয়া বুলি টুইটটোত গান্ধীয়ে উল্লেখ কৰে।
ইতিমধ্যে ভাৰত চৰকাৰৰ বিভাগীয় কৰ্তৃপক্ষ আৰু নেপাল চৰকাৰৰ সহযোগত উদ্ধাৰ হোৱা কিশোৰ-কিশোৰীসকলক চিনাক্তকৰণ কৰা হৈছে। নিজ দেশলৈ প্ৰেৰণ কৰাৰ পিছত এই দুৰ্ভগীয়া কিশোৰ-কিশোৰী সকলৰ পুনৰ্বাসৰো ব্যৱস্থা ভাৰত চৰকাৰে গ্ৰহণ কৰিছে বুলি কেন্দ্ৰীয় মন্ত্ৰীগৰাকীয়ে টুইটটোত উল্লেখ কৰে।
The identity of all the trafficked children has been verified by the authorities in #Imphal, in collaboration with #Nepal Govt officials. The trafficked children will shortly be sent back to #Nepal & reunited with their families. We are ensuring their rehabilitation. https://t.co/Sy2TUA7Mtu
— Maneka Sanjay Gandhi (@Manekagandhibjp) February 13, 2019
উল্লেখযোগ্য যে এই মাহৰ আৰম্ভণিতেই বেচৰকাৰী সংগঠনৰ সহায়ত মণিপুৰ আৰক্ষীয়ে ইম্ফল, ম’ৰেকে ধৰি ইয়াৰ বিভিন্ন ঠাইৰ পৰা মানৱ সৰবৰাহকাৰীৰ কৱলৰ পৰা এই বৃহৎ সংখ্যক নেপালী কিশোৰী, যুৱতী আৰু কিশোৰক উদ্ধাৰ কৰিছিল। আৰক্ষীৰ সূত্ৰৰ মতে এওঁলোকৰ বয়স ১৯-অৰ পৰা ৩১ বছৰৰ ভিতৰত। তেতিয়াৰ পৰাই এওঁলোকক আৰক্ষীয়ে এটা আশ্ৰয়গৃহত ৰাখিছে।
মন কৰিব লগীয়া যে আন্তঃৰাষ্ট্ৰীয় মানৱ সৰবৰাকাৰী চক্ৰই বৃহৎ সংখ্যক নেপালী যুৱক-যুৱতীক মধ্য প্ৰাচ্যলৈ গোপনে চালান দি আহিছে। এই উদ্ধাৰ কৰা কিশোৰী, যুৱতী, যুৱকসকলক ম্যানমাৰ হৈ ডুবাইলৈ নিবলৈ ঠিক কৰা হৈছিল।