ভাৰতৰ ৰাজপথৰ এটা সাধাৰণ কুকুৰৰ পৰা বৌদ্ধ সন্যাসীসকলৰ সৈতে হাজাৰ হাজাৰ মাইল ভ্ৰমণ কৰি সমগ্ৰ বিশ্বৰে মৰম বুটলি বলৈ সক্ষম হোৱা আলোক নামৰ শান্তিৰ কুকুৰটো পুনৰ ভাৰতলৈ ঘূৰি আহিছে। শেহতীয়াকৈ হাৰিয়ানাৰ গুৰুগ্ৰামৰ এখন হোটেলত আয়োজিত এক অনুষ্ঠানত আলোকক দেখা কৰিবলৈ আৰু আদৰণি জনাবলৈ শ শ লোকৰ সমাৱেশ ঘটে। আলোকৰ নিজা সামাজিক মাধ্যমৰ একাউণ্টত প্ৰকাশ পোৱা এটা ভিডিঅ’ত দেখা গৈছে যে উপস্থিত ৰাইজে তাক মৰমেৰে সাৱটি ধৰিছে, মৰম কৰিছে আৰু তাৰ সৈতে আলোকচিত্ৰ উঠিছে। আলোক নামৰ কুকুৰটোৱেও অতি শান্তভাৱে সকলোৰে মৰম গ্ৰহণ কৰিছে।
এই বিশেষ অনুষ্ঠানটোত আলোকক বৌদ্ধ ধৰ্মালম্বী সন্যাসীসকলৰ এটা দলৰ সৈতে এখন সভাত অংশগ্ৰহণ কৰাও দেখা গৈছে। সন্যাসীসকলৰ কাষতে অতি শান্তভাৱে বহি থকা আলোকৰ ব্যৱহাৰে সকলোকে আকৰ্ষিত কৰিছে। সি অতি ধৈৰ্য্যৰে সভাৰ কাৰ্যসূচী প্ৰত্যক্ষ কৰিছে আৰু সন্যাসীসকলৰ সৈতে সমগ্ৰ স্থানতে ঘূৰি ফুৰিছে। তাক দেখি সভাত উপস্থিত থকা লোকসকলৰ মুখত এক প্ৰশান্তিৰ হাঁহি বিৰিঙি উঠিছে আৰু বহুতে তাক অতি আদৰেৰে স্পৰ্শ কৰি প্ৰশংসা কৰিছে।
আলোকৰ এই জীৱন যাত্ৰাৰ আৰম্ভণি হৈছিল ২০২২ চনত, যেতিয়া সি ভাৰতৰ ৰাজপথত আশ্ৰয়হীন হৈ ঘূৰি ফুৰিছিল। কিন্তু তাৰ জীৱনলৈ তেতিয়াই এক ডাঙৰ পৰিৱৰ্তন আহে, যেতিয়া সি ভাৰত আৰু নেপালত খোজকাঢ়ি ভ্ৰমণ কৰা এদল বৌদ্ধ সন্যাসীৰ সংস্পৰ্শলৈ আহে। সন্যাসীসকলৰ শান্তিপূৰ্ণ সান্নিধ্যৰ প্ৰতি আকৰ্ষিত হৈ আলোক নামৰ কুকুৰটোৱে তেওঁলোকৰ পিছে পিছে খোজ ল’বলৈ ধৰে আৰু একেৰাহে এশ দিনতকৈও অধিক সময় তেওঁলোকৰ লগ এৰা নাছিল। কুকুৰটোৰ এই নিষ্ঠা দেখি সন্যাসীসকলে তাক আলোক বুলি নামকৰণ কৰে, যাৰ অৰ্থ হৈছে পোহৰ।
যাত্ৰাৰ অন্তত বৌদ্ধ সন্যাসী বিখু পাক্ৰাই আলোকক নিজৰ সৈতে আমেৰিকা যুক্তৰাষ্ট্ৰৰ টেক্সাছত থকা এটা বৌদ্ধ মন্দিৰলৈ লৈ যায়। তেতিয়াৰে পৰা আলোকে আমেৰিকা আৰু শ্ৰীলংকাত ২৩০০ মাইলতকৈও অধিক পথ খোজকাঢ়ি ভ্ৰমণ কৰিছে আৰু শান্তিৰ কুকুৰ হিচাপে জনাজাত হৈ পৰিছে। এই সমগ্ৰ পৰিৱৰ্তনৰ ভিডিঅ’টোৱে ইণ্টাৰনেটত ব্যাপক সঁহাৰি লাভ কৰিছে। এসময়ত পৰিত্যক্ত অৱস্থাত থকা এটা বাটৰ কুকুৰে নিজৰ জন্মভূমিত লাভ কৰা মৰম আৰু সন্মানে সকলোকে আৱেগিক কৰি তুলিছে। ইয়াৰ দ্বাৰা প্ৰমাণ হয় যে মৰম আৰু আশাই এটা জীৱন কেনেকৈ সম্পূৰ্ণ সলনি কৰি দিব পাৰে।
আলোকৰ এই হৃদয়স্পৰ্শী কাহিনীটোৱে ইণ্টাৰনেটত বহুতৰে মন স্পৰ্শ কৰি গৈছে। বহুতো লোকে মন্তব্য কৰিছে যে আলোকৰ এই ঘটনাই ভাৰতবৰ্ষৰ প্ৰতিজন নাগৰিককে বাটৰ আশ্ৰয়হীন কুকুৰবোৰৰ প্ৰতি মৰম আৰু দয়া দেখুৱাবলৈ অনুপ্ৰাণিত কৰা উচিত। সামাজিক মাধ্যমত একাংশই আশা প্ৰকাশ কৰিছে যে এই কাহিনীয়ে দেশৰ লাখ লাখ গৃহহীন কুকুৰৰ জীৱন সুৰক্ষিত কৰাত সহায় কৰিব আৰু মানুহে এই থলুৱা কুকুৰবোৰক মৰমেৰে আদৰি ল’বলৈ আগবাঢ়ি আহিব। বহুতে আলোকক এটা পবিত্ৰ আত্মা বুলি অভিহিত কৰিছে আৰু তাৰ এই ৰূপান্তৰক লৈ গৌৰৱ প্ৰকাশ কৰিছে।
