বিশ্বৰ এক প্ৰতিস্থিত সংবাদ সংস্থা ৰয়টাৰৰ মুখ্য ‘এক্স’ একাউণ্ট বৰ্তমান ভাৰতত ব্যৱহাৰকাৰীৰ বাবে উপলব্ধ নহয়। প্লেটফৰ্মটোৰ এটা বাৰ্তাত উল্লেখ কৰা অনুসৰি এটা “আইনী দাবী”ৰ বাবে ভাৰতত সংবাদ গোষ্ঠীটোৰ এক্স একউণ্ট বন্ধ কৰি ৰখা হৈছে।
ইয়াৰ প্ৰতিক্ৰিয়া প্ৰকাশ কৰি ভাৰত চৰকাৰে স্পষ্টকৈ কয় যে, ৰয়টাৰৰ একাউণ্ট ব্লকৰ বাবে তেওঁলোকে কোনো নিৰ্দেশ প্ৰদান কৰা নাছিল। চৰকাৰৰ এগৰাকী মুখপাত্ৰই সদৰী কৰা অনুসৰি ভাৰত চৰকাৰে ৰয়টাৰৰ একাউণ্ট ব্লকৰ প্ৰয়োজন বোধ কৰা নাই, আৰু এই সমস্যাৰ সমাধানৰ বাবে আমি প্লেটফৰ্ম ‘এক্স’-ৰ সৈতে সক্ৰিয়ভাৱে কাম কৰি আছে।
প্ৰাপ্ত তথ্যানুসৰি, এই কাৰ্য্য এটা পুৰণি অনুৰোধৰ সৈতে জড়িত হ’ব পাৰে, যিটো বৰ্তমান অৱসান হোৱাৰ পিছতো প্রযুক্তিগতভাৱে কাৰ্যকৰী হৈ পৰিছে। চৰকাৰে এই ঘটনাৰ বাবে ‘এক্স’ক স্পষ্টীকৰণ বিচাৰি পত্ৰ প্ৰেৰণ কৰাৰ লগতে, ৰয়টাৰৰ একাউণ্ট পুনৰুদ্ধাৰ কৰাৰ অনুৰোধ জনাইছে বুলি জানিবিলৈ দিয়ে।
উল্লেখযোগ্য যে, ‘অপাৰেছন সিন্দুৰ’ নামৰ এটা দমনমূলক অভিযান চলি থকাৰ সময়তে বহু ছ’চিয়েল মিডিয়া একাউণ্ট ব্লক কৰাৰ অনুৰোধ জনোৱা হৈছিল, যদিও সেই সময়ত ৰয়টাৰৰ একাউণ্টৰ ওপৰত কোনো প্ৰভাৱ পৰা নাছিল।
এই মুহূর্তত ভাৰতত ৰয়টাৰৰ মুখ্য দুটা অফিচিয়েল একাউণ্ট ব্লক হৈ আছে, যদিও ৰয়টাৰ টেক নিউজ আৰু ৰয়টাৰ ফেক্ট-চেকৰ দৰে একাউণ্টসমূহ সাৱলীলভাৱে ব্যৱহাৰযোগ্য হৈ আছে। ব্ৰিটেইনত অৱস্থিত ৰয়টাৰ সংবাদ সংস্থাটোৱে এই সন্দৰ্ভত এতিয়ালৈকে কোনো ৰাজহুৱা মন্তব্য প্ৰকাশ কৰা নাই।
ইফালে ‘এক্স’ প্লেটফৰ্মে কয় যে, স্থানীয় আইন, আদালতৰ আদেশ বা চৰকাৰী আইনী দাবীৰ বাবে কেতিয়াবা একাউণ্ট বা নিৰ্দিষ্ট সামগ্ৰীৰ ওপৰত নিষেধাজ্ঞা আৰোপ কৰা হয়।
