শুকুৰবাৰে নাৰ্ক’টিকছ কন্ট্ৰ’ল ব্যুৰ’(NCB)এ বলিউদৰ ড্ৰাগছ কাণ্ডৰ সৈতে জড়িত থকাৰ অভিযোগত অভিনেত্ৰী ৰীয়া চক্ৰৱৰ্তীসহ ৩২ গৰাকী লোকৰ বিৰুদ্ধে চাৰ্জশ্বীট দাখিল কৰিছে।
NCBৰ চাৰ্জশ্বীটত ৰীয়াৰ ভাতৃ শৌভিক চক্ৰৱৰ্তীৰো নামো অন্তভুৰ্ক্ত আছে।
উল্লেখ্য যে যোৱা বৰ্ষত বলিউদৰ জনপ্ৰিয় অভিনেতা সুশান্ত সিং ৰাজপুতৰ মৃত্যুৰ পিছতে বলিউদৰ ড্ৰাগছ কাণ্ড পোহৰলৈ আহে আৰু NCBএ সমগ্ৰ বিষয়টো অনুসন্ধান আৰম্ভ কৰে।
সুশান্ত সিৃং ৰাজপুতৰ আত্মহত্যা কাণ্ডৰ সৈতে ড্ৰাগছৰ সংযোগ লাভ কৰাৰ পিছতে NCBএ বলিউদৰ বহু অভিনেতা-অভিনেত্ৰীৰ লগতে কলা-কুশলীসহ অন্যান্য লোকক জেৰা চলায়।
ইয়াৰ ভিতৰত দীপিকা পাড়ুকন, শ্ৰদ্ধা কাপুৰ, চাৰা আলী খান, অৰ্জুন ৰামপাল, আৰু তেওঁৰ দক্ষিণ আফ্ৰিকান প্ৰেয়সীৰ ভাতৃ আদিও আছে।
ইফালে ড্ৰাগছ কাণ্ডত জড়িত থকাৰ অভিযোগত সুশান্ত সিং ৰাজপুতৰ ব্যক্তিগত মেনেজাৰৰ লগতে অভিনেত্ৰী ৰীয়া চক্ৰৱৰ্তী আৰু ভাতৃ শৌভিক চক্ৰৱৰ্তীক গ্ৰেপ্তাৰ কৰি কাৰাগাৰলৈও নিক্ষেপ কৰা হয়। অৱশ্যে পৰৱৰ্তী সময়ত তেওঁলোকক জামিনত মুকলি কৰি দিয়া হয়।
NCBএ তদন্ত প্ৰক্ৰিয়াটোত ২০০ৰো অধিক সাক্ষীক জেৰা কৰি প্ৰায় ১২,০০০ হাজাৰ পৃষ্ঠাৰ চাৰ্জশ্বীট শুকুৰবাৰে মুম্বাই ক’ৰ্টত দাখিল কৰিছে।
NCBএ অনুসন্ধানৰ সময়ত কেইবাবিধো পদাৰ্থ, ইলেক্ট্ৰনিক গ্ৰেজেট আৰু ভাৰতীয় আৰু বিদেশী মুদ্ৰা জব্দ কৰিছিল।
চাৰ্জশ্বীটত কোৱা হৈছে যে NCBএ লাভ কৰা পদাৰ্থবোৰৰ লগতে অন্যান্য সামগ্ৰীসমূহ ড্ৰাগছৰ সৈতে জড়িত বুলি পৰীক্ষাত প্ৰমাণিত হৈছে।
ইয়াৰ ভিতৰত এনডিপিএছ আইনৰ অধীনত অন্তৰ্ভুক্ত কৰা চাৰছ গাঞ্জা, এলএছডি, একষ্টেচি, আৰু চাইকোট্ৰপিক পদাৰ্থ যেনে আলপ্ৰোজ’লাম আৰু ক্লোনজেপামও অন্তৰ্ভুক্ত আছে।
