১৪ জুনত আত্মহত্যা কৰা বলিউদৰ প্ৰতিভাধৰ যুৱ অভিনেতা সুশান্ত সিং ৰাজপুতে প্ৰেমিকা বলিউদৰ অভিনেত্ৰী ৰীয়া চক্ৰৱৰ্তীৰ সৈতে বিবাহপাশত আৱদ্ধ হোৱাৰ কথা আছিল।
সুশান্তৰ এজন আত্মীয়ই সংবাদ মাধ্যমৰ আগত জনাইছিল যে চলিত বৰ্ষৰ নৱেম্বৰত মুম্বাইত সুশান্তে বিয়া কৰাৰ কথা আছিল আৰু তাৰ বাবে পৰিয়ালক প্ৰস্তুত হ’বলৈ কৈছিল।
সংবাদ মাধ্যমৰ খবৰ অনুসৰি ৰীয়াৰ প্ৰ’পাৰ্টি ডিলাৰে নিশ্চিত কৰিছে বিয়াৰ পূৰ্বে ৰীয়া চক্ৰৱৰ্তী আৰু সুশান্তে এটা ঘৰ বিচাৰি আছিল।
তেওঁলোকে বিয়াৰ পিছত এটা নতুন ঘৰত থকাৰ পৰিকল্পনা কৰিছিল বুলিও ৰীয়াৰ প্ৰ’পাৰ্টি ডিলাৰজনে সদৰী কৰিছে।
“তেওঁলোক দুয়ো একেলগে ঘৰ বিচাৰি আছিল।” ৰীয়াৰ প্ৰ’পাৰ্টি ডিলাৰজনে কয়।
ৰীয়াৰ প্ৰ’পাৰ্টি ডিলাৰজনক ঘৰৰ ভাড়াৰ দিয়াত সমস্যা আছিল নেকি বুলি সোধা প্ৰশ্নৰ উত্তৰত তেওঁ কয়, “ভাড়া দিয়াত সমস্যা নাছিল। কেৱল শেহ নিশা পাৰ্টিকলৈ সমস্যা আছিল। সুশান্তে য’ত আছিল তাত শেহ নিশা পাৰ্টিৰ বাবে প্ৰতিৱেশীয়ে অভিযোগ দিছিল।”
“ৰীয়াই মোক কৈছিল, ‘মই বান্দ্ৰাত এটা ঘৰ বিচাৰি আছো আৰু মই তাত সুশান্তৰ লগত থাকিম। আমি সোনকালে বিবাহপাশত আৱদ্ধ হ’ম।” ৰীয়াৰ প্ৰ’পাৰ্টি ডিলাৰজনে কয়।
৩৪ বছৰীয়া প্ৰতিভাধৰ যুৱ অভিনেতাজন যোৱা ৬ মাহৰ পৰা মানসিক হতাশাগ্ৰস্ততাত ভুগি আছিল।
উল্লেখ্য যে, যোৱা ৬ মাহত অভিনেতাজনৰ হাতৰ পৰা প্ৰতিষ্ঠিত প্ৰডাকশ্যন হাউছৰ ছখনকৈ ছবি উলাই গৈছিল।
