কাজিৰঙা ৰাষ্ট্ৰীয় উদ্যানৰ সমীপত এটা গঁড়ৰ মৰ্মান্তিক মৃত্যুৱে ব্যাপক চাঞ্চল্যৰ সৃষ্টি কৰিছে। কাজিৰঙাৰ সমীপৱৰ্তী এখন ধাননি পথাৰত সোমবাৰে সন্ধিয়া উদ্ধাৰ হয় গঁড়টোৰ মৃতদেহ। কাজিৰঙা ৰাষ্ট্ৰীয় উদ্যানৰ পৰা ওলাই অহা গঁড়টোৱে পথ হেৰুৱাই এইদৰে মৃত্যুক সাবটিবলগীয়া হৈছে।
প্ৰকাশিত খবৰ অনুসৰি সোমবাৰে সন্ধিয়া গোলাঘাট জিলাৰ পদুমনি অঞ্চলৰ সমীপৰ ধাননি পথাৰত স্থানীয় ৰাইজে মৃত গঁড়টো প্ৰত্যক্ষ কৰে। এই খবৰ পোৱাৰ লগে লগে বন বিষয়া আৰু পশু চিকিৎসকৰ এটা দল সেই স্থানত উপস্থিত হৈ গঁড়টোৰ মৃতদেহ উদ্ধাৰ কৰে।
কিছুদিন পূৰ্বে কাজিৰঙা ৰাষ্ট্ৰীয় উদ্যানৰ পৰা বাহিৰলৈ ওলাই অহা গঁড়টোৱে পথ হেৰুৱাই অঞ্চলটোত বিচৰণ কৰি ফুৰিছিল। গঁড়টোৰ এনে মুক্ত বিচৰণে পদুমনি অঞ্চলৰ বাসিন্দাসকলৰ মাজত আতংকৰ সৃষ্টি কৰিছিল।
বিগত দুদিন ধৰি অঞ্চলটোত বিচৰণ কৰি থকা গঁড়টোৱে বন বিষয়াসহ চাৰিজন লোকক আক্ৰমণ কৰে। ইফালে গঁড়টোক স্থানীয় লোকসকলেও খেদি খেদি আক্ৰমণ কৰে বুলি জানিব পৰা গৈছে।
এই সন্দৰ্ভত এগৰাকী বন বিষয়াই কয়, “যোৱা পাঁচ দিন ধৰি স্থানীয় লোকসকলে গঁড়টোক খেদি ফুৰা দেখা গৈছিল। সম্ভৱতঃ জন্তুটোৱে জিৰণি লোৱাত কষ্ট পোৱাৰ লগতে খাদ্যও খাব পৰা নাছিল।”
ইফালে মৰণোত্তৰ পৰীক্ষাৰ প্ৰতিবেদনত অত্যধিক ৰক্তক্ষৰণ আৰু হৃদযন্ত্ৰ বন্ধ হোৱাৰ বাবে গঁড়টোৰ মৃত্যু হৈছে বুলি উল্লেখ কৰা হৈছে।
গঁড়টোৰ মৃত্যুৰ পাছতে ৰাজ্যজুৰি চৰ্চা আৰম্ভ হোৱাৰ পিছত খুমটাইৰ বিধায়ক মৃণাল শইকীয়াই গঁড়টোৰ মৃত্যুৰ বাবে স্থানীয় বাসিন্দা আৰু আৰক্ষী প্ৰশাসনক জগৰীয়া কৰিছে।
এক টুইটযোগে বিধায়কগৰাকীয়ে বন বিষয়াসকলে গঁড়টোক ৰাজহুৱা অত্যাচাৰৰ পৰা বচাবলৈ চেষ্টা কৰিছিল যদিও গোলাঘাট আৰক্ষীয়ে সহযোগ কৰা নাছিল বুলি অভিযোগ কৰিছে।
The stray #rhino is most probably dead and I hold the insensitive crowd nd Golaghat Administration solely responsible for it.Forest Officials tried to save it from public atrocities but @GolaghatPolice did not co-operate.I demand punitive action.@himantabiswa sir pic.twitter.com/Lc4fODbCcK
— Mrinal Saikia (@Mrinal_MLA) February 6, 2023
ইতিমধ্যে অসম আৰক্ষীয়ে গঁড়টোৰ মৃত্যুৰ তদন্তৰ নিৰ্দেশ দিছে।