শিলচৰত ১২ জানুৱাৰিত এটা অনুষ্ঠানত মুখ্য অতিথি হিচাপে ভাগ ল’বলৈ অহা পশ্চিম বংগৰ নৱ প্ৰজন্মৰ এজন প্ৰতিবাদী কবি শ্ৰীজাত বন্দোপাধ্যায়ক শিলচৰত বিজেপিৰ কৰ্মীয়ে আবদ্ধ কৰাৰ ঘটনা ঘটিছে।
‘ইশ্বো বোলি’ শীৰ্ষক এটা কাৰ্যসূচীৰ উদ্বোধনী অনুষ্ঠানত যোগদান কৰিবলৈ অহা কবিজনৰ বিৰুদ্ধে কোনো সংগত কাৰণ নোহোৱাকৈয়ে চৰম অসহিষ্ণুতা প্ৰদৰ্শন কৰি বিজেপিৰ কৰ্মী-সমৰ্থকসকলে কাৰ্য্যসূচীটোৰ মাজতে প্ৰতিবাদ সাব্যস্ত কৰে।
উপস্থিতসকলৰ ভাষ্যমতে কাৰ্য্যসূচীটো আৰম্ভ হোৱাৰ সময়তে বিজেপিৰ একাংশ কৰ্মী-সমৰ্থক হলঘৰটোত প্ৰৱেশ কৰে আৰু মাইক্ৰ’ফোনটো লৈ শ্ৰীজাত বন্দ্যোপাধ্যায়ক লক্ষ্য কৰি প্ৰশ্নবাণ কৰিবলৈ ধৰে।
বিজেপিৰ কৰ্মী-সমৰ্থকসকলৰ এই অভব্য আচৰণ ক্ষুব্ধ হৈ তাত উপস্থিতসকলৰ সৈতে তৰ্ক-বিতৰ্কত লিপ্ত হয় আৰু ফলত এটা বিশৃংখলাৰ পৰিৱেশ দেখা যায়। পিছত তাত অতিৰিক্ত আৰক্ষী অধীক্ষক ৰাকেশ ৰেড্ডি উপস্থিত হৈ পৰিস্থিতি চম্ভালি লয়।
আনহাতে বিজেপিৰ কৰ্মী-সমৰ্থকসকলে কবিজনৰ বিৰুদ্ধে তাৰ পিছতো শ্লগান দি থকা দেখা যায়। তেওঁলোকে শ্ৰীজাতক তৃণমূল কংগ্ৰেছৰ এজেণ্ট বুলি অভিযোগ কৰে। লগতে বৰাকত সাম্প্ৰদায়িক বিষবাষ্প বিয়পাবলৈ আহিছে বুলিও অভিযোগ কৰে। আনহাতে কেইবাজনো বিজেপি কৰ্মীয়ে শ্ৰীজাতে ‘ধৰ্মৰ ত্ৰিশূলত কণ্ডোম পিন্ধি ল’বা’ৰ দৰে কবিতাৰ পংক্তি উল্লেখ কৰি পশ্চিম বংগৰ কবিজনক হিন্দু বিৰোধী আখ্যা দিয়ে।
উল্লেখযোগ্য যে শ্ৰীজাতো বন্দোপাধ্যায়ক কাব্যিকতাৰ কবি হিচাপে সিমান নিচিনেলেও হিন্দু মৌলবাদী আৰু ধৰ্মীয় অসহিষ্ণুতা তথা ব্যভিচাৰবিলাকৰ বিৰুদ্ধে প্ৰতিবাদী কবিতা লিখা বাবে বেছ বহুলভাৱে জনা যায়।
তেওঁৰ ‘অভিশাপ’ শীৰ্ষক কবিতাটোত ‘মোক যিদিনা ধৰ্ষণ কৰিবা, কবৰৰ পৰা তুলি আনি, তোমাৰ ধৰ্মৰ সেই ত্ৰিশূলৰ ওপৰত কণ্ডোম পিন্ধা থাকিব’ (আমাকে ধর্ষণ করবে যদ্দিন কবর থেকে তুলে— কন্ডোম পরানো থাকবে, তোমার ওই ধর্মের ত্রিশূলে!’) -এই পংক্তিটো লৈ তীব্ৰ বিতৰ্ক হৈছিল। উত্তৰ প্ৰদেশৰ মুখ্য মন্ত্ৰী যোগী আদিত্য নাথক বিদ্ৰূপ কৰি কবিতা লিখা বাবেও চৰ্চিত হৈছিল শ্ৰীজাতো। তেওঁ তেওঁৰ উড়ন্ত সব জোকাৰ শীৰ্ষক কবিতাৰ বাবে ‘আনন্দ পুৰস্কাৰ’ লাভ কৰিছে।
