অন্তিম অভাৰ, হাতত আছে তিনিটা উইকেট; জয়ৰ বাবে প্ৰয়োজন ২৯ ৰান। স্বাভাৱিকতেই এনে অৱস্থাত জয়ৰ আশা প্ৰায় এৰি দিয়াৰ দৰেই হৈছিল কলকাতা নাইট ৰাইডাৰ্ছে, আশা এৰি দিছিল হয়তো দলটোৰ একেবাৰে ‘অন্ধ অনুৰাগী’গৰাকীয়েও! তাতে ক্ৰীজত নাছিল তেতিয়া দলটোৰ আটাইতকৈ মাৰমুখী বেটাৰ ৰাছেল।
ইতিপূৰ্বেই ফ্লপ হৈছিল ৰাছেলৰ বিস্ফোৰণ; আফগানী স্পিনাৰ তথা গুজৰাট টাইটানছৰ তদাৰকী অধিনায়ক ৰছিদ খানে পেভিলিয়নলৈ উভতাই পঠালে ‘স্বভাৱী’ কেৰিবিয়ানগৰাকীক। ক্ৰীজত তেতিয়া উমেশ যাদৱ আৰু আনটো মূৰত বাওঁহতীয়া বেটাৰ ৰিংকু সিং। বল হাতত তুলি দিয়া হৈছে য়শ দয়ালক।
কোৱা হয়, ঘূৰণীয়া বলৰ কথা; মুহূৰ্তৰ ভিতৰতে সলনি হ’ব পাৰে ২২ গজৰ জল্পনা-কল্পনা! নিশাটোৰ ভিতৰতে হয়তো কোনো এগৰাকী খেলুৱৈৰ উত্তৰণ ঘটিব পাৰে মহানায়কৰ শাৰীলৈ, মহাতাৰকাৰ অৱনতি ঘটিব পাৰে খলনায়কৰ শাৰীলৈ। কাৰ্যত: আজি মটেৰাত কলকাতাৰ বাবে মহানায়কৰ ৰূপতে আত্মপ্ৰকাশ কৰিলে ৰিংকু সিঙে। কৰি তুলিলে অসম্ভৱকো সম্ভৱ!
বিগত মেচৰ এক গুৰুত্বপূৰ্ণ ইনিংছেৰে আত্মবিশ্বাসী ৰিংকুৱে যেন ক্ৰীজৰ মাজত কৰি লৈছিল এক মহাপণ: তৰিম কিম্বা মৰিম! প্ৰথমটো বলত যাদৱে এক ৰান এটা সংগ্ৰহ কৰি ক্ৰীজ এৰি দিলে ৰিংকুক। তাৰ পাছতেই ক্ৰিকেট বিশ্ব সাক্ষী হ’ল এক অবিস্মৰণীয়, অনাকাংক্ষিত আৰু মহাক্ৰিকেটীয় পৰিঘটনাৰ।
এটা এটাকৈ অভাৰ তথা ইনিংছৰ অন্তিম পাঁচটা বলত পাঁচটা ছয় কোবাই কলকাতা নাইট ৰাইডাৰ্ছৰ ত্ৰাণকৰ্তাৰ ৰূপত প্ৰকাশ ঘটিল ৰিংকুৰ। চমকিত কৰি তুলিলে ক্ৰিকেট বিশ্বক, তাৰ বিপৰীতে মূক দৰ্শক হৈ পৰিল ডিফেণ্ডিং চেম্পিয়ন তথা চলিত প্ৰতিযোগিতাখনত মেচখনলৈকে অপৰাজিত হৈ ৰোৱা গুজৰাট টাইটানছ।
এয়াই ক্ৰিকেট, অনিশ্চয়তা আৰু আত্মবিশ্বাসৰ যুগলবন্দীৰে চমকি উঠা ক্ৰিকেট। মুহূৰ্তৰ ভিতৰতে নিশ্চিত বিজয়ৰ পথত গতি কৰা গুজৰাটৰ ঘটিল পথচ্যুতি। মুখৰ পৰা জয়ৰ স্বাদ কাঢ়ি কলকাতাৰ শিৰৰ কিৰীটি হৈ পৰিল ৰিংকু সিং। মাত্ৰ ২১ টা বলত ৬ টা ছয় আৰু ১ টা চাৰিৰে বিজয়ৰ মহানায়কৰ ৰূপত অপৰাজিত হৈ ৰ’ল ৰিংকু।
ৰোমাঞ্চকৰ এই মেচখনত প্ৰথমে বেটিং কৰি গুজৰাটে সংগ্ৰহ কৰিছিল ৪ উইকেটত ২০৪ ৰান। দলৰ এই শক্তিশালী স্ক’ৰৰ মূলতে আছিল বিজয় শংকৰৰ বিস্ফোৰক বেটিং। ২৪ বলত ৫ টা ছয় আৰু ৪ টা চিৰিৰে ৬৩ ৰানত অপৰাজিত হৈ ৰৈছিল শংকৰ। উদীয়মান তাৰকা ছাই সুদৰ্শনৰ বেটৰ পৰাও আহে ৫৩ ৰানৰ এক অৰ্ধশতকীয় ইনিংছ।
২০৫ ৰানৰ লক্ষ্য অনুসৰণ কৰি প্ৰথমতেই উজুটি খায় কলকাতাই। ২৮ ৰানতে হেৰুৱায় দুই অপেনাৰ গুৰবাজ আৰু জগদীশনৰ উইকেট। অৱশ্যে তৃতীয় উইকেটত ভেঙ্কটেশ আয়াৰ আৰু অধিনায়ক নীতিশ ৰানাই ১০০ ৰান যোগ দি দলক এক মজবুত স্থিতি প্ৰদান কৰে। ৰানাই সংগ্ৰহ কৰে গুৰুত্বপূৰ্ণ ৪৫ ৰান। দুৰন্ত বেটিঙেৰে মাত্ৰ ৪০ টা বলত ৮ টা চাৰি আৰু ৫ টা ছয়েৰে ৮৩ ৰান সংগ্ৰহ কৰি পেভিলিয়নলৈ উভতে আয়াৰ।
কিন্তু ইয়াৰ পাছতে যেন ছন্দপতন ঘটে দলটোৰ। ত্ৰাসৰ কাৰণ হৈ পৰে প্ৰতিপক্ষৰ তদাৰকী অধিনায়ক তথা তাৰকা স্পিনাৰ ৰছিদ। চলিত ছিজনৰ আই পি এলৰ প্ৰথমটো হেট্ৰিকৰ ৰূপত ৰছিদে ক্ৰমাগত তিনিটা বলত দুই কেৰিবিয়ান ৰাছেল আৰু সুনীল নাৰাইন আৰু কলকাতাৰ বিগত মেচৰ জয়ৰ নায়ক শাৰ্দুল ঠাকুৰৰ উইকেট দখলেৰে দলটোক শলঠেকত পেলোৱাৰ লগতে নিজ দলৰো গতিপথ সলনি কৰি তোলে।
কিন্তু ইয়াৰ পিছতেই ঘটে ৰিংকু সিঙৰ সেই অবিস্মৰণীয় বেটিং বিক্ৰম। নিশ্চিত জয়ৰ কাষ চাপিও থমকিবলগৈ বাধ্য হয় ডিফেণ্ডিং চেম্পিয়ন গুজৰাট। এই নান্দনিক ইনিংছটোৰে কলকাতাক জয়ী কৰোৱা ৰিংকু স্বাভাৱিকতেই বিবেচিত হয় মেচৰ শ্ৰেষ্ঠ খেলুৱৈৰূপে।
