“স্বাধীনতাৰ ৭৫ তম বৰ্ষ হোৱা উপলক্ষে চৰকাৰে ঘোষণা কৰা ‘আজাদী কা অমৃত মহোৎসৱ’ যদি আমি নিৰপেক্ষ বিশ্লেষণ কৰোঁ যে তেন্তে দেখা যায় যে দেশে স্বাধীনতা পোৱাৰ পৰা ৬৭ বছৰত প্ৰকৃতাৰ্থত জনসাধাৰণে অমৃত পাইছিল, কিন্তু যোৱা ৮ বছৰত জনসাধাৰণে অমৃতৰ পৰিৱৰ্তে বিষহে পান কৰি আছে। ” সংবাদমেলত আজাদী কা অমৃত মহোৎসৱৰ বিৰোধিতা কৰি তৃণমূল কংগ্ৰেছৰ সভাপতি ৰিপুন বৰাই এইদৰে কয়।
তাৰ কাৰণ বাখ্যা কৰি তেওঁ কয়
ক) “বিগত আঠ বছৰত পূৰ্বৰ সকলো অভিলেখ ভংগ কৰি মূল্যবৃদ্ধি আৰু মূদ্ৰাস্ফীতিয়ে জনসাধাৰণ জীৱন দূৰ্বিসহ কৰি তুলিছে।
খ) নিত্য ব্যৱহাৰ্য সকলো সামগ্ৰীৰ নিয়ন্ত্ৰণহীনভাৱে আকাশলঘী মূল্যবৃদ্ধি, বিমূদ্ৰাকৰণ , সকলোবিলাক সামগ্ৰীৰ ওপৰত উপৰ্যুপৰি আৰোপ কৰা জি.এছ.টি., ক’ভিড কালত ঘোষণা কৰা অপৰিকল্পিত লকডাউনে দেশৰ অৰ্থনীতি বিধ্বস্ত কৰাৰ ফলত জনসাধাৰণৰ ক্ৰয়ক্ষমতা ব্যাপকভাৱে হ্ৰাস হৈছে। দেশৰ জনমূৰি আয় এনেধৰণে হ্ৰাস হৈছে যে ২০২১ চনত ৯৪,৯৫৪ টকাৰ বিপৰীতে ২০২২ চনত ৯২,০০০ টকা হৈছে। ইয়াৰ ফলত ভাৰতৰ প্ৰতিজন নাগৰিকৰ দৈনিক উপভোক্তা ব্যয় ১১ শতাংশলৈ হ্ৰাস পাইছে আৰু এবছৰত গঢ়ে প্ৰতিজন নাগৰিকৰ ৮,৫০০ টকাকৈ উপাৰ্জন হ্ৰাস হৈছে। এনে বিধ্বস্ত অৰ্থনীতি কেতিয়াও অমৃত হ’ব নোৱাৰে।
গ) দেশৰ নিবনুৱা সমস্যাই এনে ভয়াৱহ ৰূপ ধাৰণ কৰিছে যে স্বাধীনতাৰ পিছত যোৱা আঠ বছৰত বিজেপিৰ শাসনকালত আমাৰ দেশৰ নিবনুৱাৰ হাৰ ২৮ শতাংশলৈ অৱনমিত হৈ সৰ্বকালৰ অভিলেখ ভংগ কৰিছে। বছৰি ২ কোটি চাকৰি দিম বুলি প্ৰতিশ্ৰুতি দি ক্ষমতা দখল কৰা বিজেপিৰ ৮ বছৰীয়া শাসনকালত ২২.০৫ কোটি চাকৰিৰ আবেদনৰ বিপৰীতে মাত্ৰ ৭.২২ লাখ যুৱক-যুৱতীকহে চাকৰি প্ৰদান কৰিব পৰিছে বুলি অলপতে লোকসভাত কেন্দ্ৰীয় মন্ত্ৰী জীতেন্দ্ৰ সিঙে এক প্ৰশ্নৰ উত্তৰত স্বীকাৰ কৰিছে। অৰ্থাৎ এই আঠ বছৰত নিযুক্তিৰ হাৰ এক শতাংশতকৈও কম। এইয়া দেশৰ কোটি কোটি নিবনুৱা যুৱক-যুৱতী আৰু তেওঁলোকৰ পৰিয়ালৰ বাবে বিষপানৰ বাহিৰে কেতিয়াও অমৃত হ’ব নোৱাৰে।
ঘ) ঠিক এনেদৰে বিজেপি চৰকাৰৰ ভুল নীতিৰ ফলত আমাৰ দেশৰ বৈদেশিক ঋণৰ বোজা ২০১৪ চনলৈকে ৫৪,৯০,৭৬৩ কোটি টকাৰ বিপৰীতে ২০২২ চনত অৰ্থাৎ যোৱা ৮ বছৰত এই বৈদেশিক ঋণ ১২৮,৪০,৫৩১ কোটি টকালৈ (প্ৰায় ৩ গুণ) বৃদ্ধি হোৱাৰ ফলত প্ৰতিজন নাগৰিকৰ মূৰত যি বৃহৎ ঋণৰ বোজা পৰিছে, এয়া বিজেপি চৰকাৰৰ কেনেধৰণ অমৃত মহোৎসৱ?
একেদৰে অসমত মুখ্যমন্ত্ৰী ড. হিমন্ত বিশ্ব শৰ্মাৰ আমোলাত ২০১৬ চনত অসমৰ ঋণ ৩৫ হাজাৰ কোটি টকাৰ বিপৰীতে ১,৩৬,০০০ কোটি টকালৈ বৃদ্ধি পোৱাৰ ফলত অসমত প্ৰতিজন নাগৰিকৰ জনমূৰি ঋণৰ বোজা ৩৭,০০০ টকালৈ বৃদ্ধি পাইছে বুলি তেওঁ দাবী কৰে।
স্বাধীনতাৰ অমৃত মহোৎসৱৰ নামত এয়া বিষপান কৰাৰ বাহিৰে আন একো নহয় বুলি বৰাই পুনৰ উল্লেখ কৰে।
