প্ৰায় ডেৰ বছৰজোৰা ‘বাধ্যতামূলক বিৰতি’ৰ অন্তত অৱশেষত খেলপথাৰলৈ প্ৰত্যাৱৰ্তন ঘটাবলৈ সাজু হৈছে তাৰকা ক্ৰিকেটাৰ ঋষভ পণ্ট। আগন্তুক ইণ্ডিয়ান প্ৰিমিয়াৰ লীগত খেলুৱৈজনক পুনৰ খেলপথাৰত দেখিবলৈ পোৱা যাব।
এক ভয়ানক দুৰ্ঘটনাত প্ৰাণ হেৰুওৱাৰ পৰা কথমপি ৰক্ষা পৰাৰ পিছত পুনৰ ক্ৰিকেটলৈ প্ৰত্যাৱৰ্তনৰ সময়ছোৱাত স্বাভাৱিকতেই আৱেগিক হৈ পৰিছে পণ্ট। আৱেগিক পণ্টে তেওঁৰ প্ৰত্যাৱৰ্তনক লৈ কয়, “আকৌ এবাৰ অভিষেক ঘটোৱা যেন অনুভৱ হৈছে।”
২০২২ চনৰ ডিচেম্বৰ মাহত পথ দুৰ্ঘটনাৰ পিছত খেলপথাৰৰ পৰা আঁতৰত থকা পণ্টক বিচিচিআইয়ে ১২ মাৰ্চত ক্লীন চিট প্ৰদান কৰিছিল। ১৪ মাহৰ বিৰতিৰ অন্তত উইকেটকীপাৰ বেটাৰগৰাকীয়ে আজি নিজ ফ্ৰেন্সাইজি দিল্লী কেপিটেলছৰ শিবিৰত যোগদান কৰে।
ক্ৰিকেটলৈ ঘূৰি আহি ভাবুক হৈ পৰা পণ্টে কয় যে তেওঁ এতিয়া যিদৰে উচ্ছাসিত, একেদৰে যথেষ্ট নাৰ্ভাচো। বিশেষকৈ দীৰ্ঘসময়ৰ পিছত পুনৰ ক্ৰিকেট খেলাটো এক অলৌকিক ঘটনা যেন লাগে বুলি মন্তব্য কৰে তাৰকাগৰাকীয়ে।
বিগত সময়ছোৱাত তেওঁলৈ সহায় তথা সমৰ্থন আগবঢ়োৱা বিচিচিআই আৰু নেশ্যনেল ক্ৰিকেট একাডেমীৰ কৰ্মচাৰীসকলৰ লগতে অনুৰাগীসকলকো ধন্যবাদ তথা কৃতজ্ঞতা প্ৰকাশ কৰে পণ্টে। “সকলোৰে মৰম আৰু সমৰ্থনে মোক অপৰিসীম শক্তি প্ৰদান কৰিছে।”- পণ্টে কয়।
