‘লক্ষ্য ভাৰতীয় দলৰ ফিনিচাৰৰ ভূমিকা’! এই এটা মাত্ৰ বাক্য আৰু আই পি এলৰ কেইখনমান মেচত ধাৰাবাহিক ব্যৰ্থতা। তাৰ পিছত সমালোচনা কিম্বা ট্ৰলৰ উজান। এক সম্ভাৱনাপূৰ্ণ তাৰকাৰ ব্যৰ্থতাত ক্ষুণ্ণ হৈছিল ৰাজ্যৰ ক্ৰিকেটপ্ৰেমীও।
পিছে ব্যৰ্থতা সাময়িক; প্ৰতিভা চিৰস্থায়ী। সেয়াই যেন মিলিছে ৰিয়ানৰ ক্ষেত্ৰত। এসময়ত সমালোচনাৰে থকা-সৰকা কৰা এই খেলুৱৈজনৰ ওপৰত বহুতেই দেখিছে আশা; ৰাজ্যৰ ক্ষুণ্ণ ক্ৰিকেট প্ৰেমীয়েও দেখিছে সম্ভাৱনা, ৰিয়ানেই হ’ব ভাৰতীয় দলত প্ৰথমগৰাকী অসমীয়া!
ক্ৰিকেট প্ৰেমীক অতীত পাহৰাই এতিয়া প্ৰশংসাৰ বাণী মুখত উলিয়াবলৈ যেন বাধ্য কৰাইছে ৰিয়ানে। ফ্ৰেন্সাইজি ক্ৰিকেট আই পি এলত ব্যৰ্থ হ’লেও ৰঞ্জী, বিজয় হাজাৰে, দেওধৰ ট্ৰফীত অনবদ্য প্ৰদৰ্শনৰ পিছত এইবাৰ চলিত ছৈয়দ মুস্তাক আলী ট্ৰফীত অপ্ৰতিৰোধ্য হৈ উঠিছে ৰিয়ান।
ইটোৰ পিছত সিটোকৈ ধাৰাবাহিকভাৱে সাতখন মেচত অভিলেখ সাতটা অৰ্ধশতকীয় ইনিংছৰ লগতে বলিঙতো সমান পাৰদৰ্শিতাৰে চমক সৃষ্টি কৰিছে ৰিয়ানে। সাতটাকৈ ক্ৰমাগত টি-২০ অৰ্ধশতকেৰে ভংগ কৰিছে সেহৱাগ, ৱাৰ্ণাৰ, বাটলাৰৰ দৰে তাৰকাৰ নামত থকা অভিলেখ।
যুৱ তাৰকাগৰাকীৰ এই দুৰ্দমনীয় প্ৰদৰ্শনৰ সুবাদতে চলিত চৈয়দ মুস্তাক আলী ট্ৰফীৰ কোৱাৰ্টাৰ ফাইনেলত প্ৰৱেশ কৰিছে অসমে। মঙলবাৰে প্ৰ-কোৱাৰ্টাৰত অসমে পৰাস্ত কৰে শক্তিশালী বংগক। ৰিয়ানৰ চমৎকাৰী অলৰাউণ্ড প্ৰদৰ্শনৰ সহায়ত অসম জয়ী হয় ৮ উইকেটৰ ব্যৱধানত।
প্ৰথমে বেটিং কৰি বংগই ৮ উইকেটত সংগ্ৰহ কৰিছিল ১৩৮ ৰাণ। নিয়ন্ত্ৰিত বলিঙেৰে অসমে এই কম স্ক’ৰতে বান্ধি ৰাখিবলৈ সক্ষম হৈছিল তাৰকাসমৃদ্ধ বংগক। আকাশ সেনগুপ্তাই ৩টা, ৰিয়ানে ২টা, মৃন্ময়, শিৱশংকৰ আৰু সৌৰভ দেই লাভ কৰে এটাকৈ উইকেট।
এই সহজ লক্ষ্ আগত লৈ অসমে ৰিয়ানৰ অপৰাজিত ৫০ ৰাণৰ (৩১ বল, ২টা চাৰি আৰু ৪ টা ছয়) লগতে বিশাল ৰয়ৰ ৪৫ ৰাণ (৩৬ বল, ৬টা চাৰি আৰু এটা ছয়) আৰু ঋষভ দাসৰ ৩১ ৰাণৰ (২৬ বল, ৩টা চাৰি) সহায়ত দুই উইকেট হেৰুৱাই লক্ষ্যত উপনীত হয়।
অপেনাৰ ডেনিছ দাসৰ বেটৰ পৰা আহে ১০ ৰাণ। বংগৰ হৈ ইতিমধ্যে ভাৰতীয় দলত সুযোগ পোৱা দুই তাৰকা মুকেশ কুমাৰ আৰু শ্বাহবাজ আহমেদে এটাকৈ উইকেট লাভ কৰে।
উল্লেখ্য যে, এইপৰ্যন্ত প্ৰতিযোগিতাখনত নিজৰ চমকপ্ৰদ প্ৰদৰ্শন অব্যাহত ৰখা ৰিয়ানে ৮ খন মেচত ১৮৯.১৯ ষ্ট্ৰাইক ৰেটেৰে ৪৯০ ৰাণ সংগ্ৰহ কৰি সৰ্বাধিক ৰাণ সংগ্ৰহ কৰোঁতা হিচাপে পৰিগণিত হৈছে।
সমান্তৰালভাৱে বল হাতত লৈয়ো ৰিয়ানে দখল কৰিছে ১১টাকৈ উইকেট। চলিত প্ৰতিযোগিতাখনত এইপৰ্যন্ত দাঙি ধৰা এনে অলৰাউণ্ড প্ৰদৰ্শনৰ লগতে ঘৰুৱা প্ৰতিযোগিতাসমূহত আগবঢ়োৱা প্ৰদৰ্শনৰ সুবাদত ৰিয়ানৰ ৰাষ্ট্ৰীয় দললৈ আমন্ত্ৰণৰ সম্ভাৱনা বৃদ্ধি পাইছে।
