দৰং জিলাৰ খাৰুপেটীয়াত সংঘটিত হৈছে এক ভয়ংকৰ পথ দুৰ্ঘটনা।
ঘটনাৰ বিৱৰণীৰ মতে, বুধবাৰে খাৰুপেটীয়া আৰক্ষী থানাৰ অন্তৰ্গত বালুগাঁও(আলিকাশ বজাৰ)ৰ ১৫ নং ৰাষ্ট্ৰীয় ঘাইপথৰ পাচলিৰ পাইকাৰী বজাৰত সংঘটিত হৈছে উক্ত দুৰ্ঘটনাটো।
দুৰ্ঘটনাটোত থিতাতে দুজন লোক নিহত হোৱাৰ লগতে অন্য তিনিজন আহত হৈছে।
এখন বাইকে বিপৰীত দিশৰ পৰা আহি থকা এএছ০১ ডিডি৬৩৩৩ নম্বৰৰ এখন ট্ৰাকত মুখামুখিকৈ প্ৰচণ্ড জোৰেৰে খুন্দা মৰাৰ ফলতে উক্ত দুৰ্ঘটনাটো সংঘটিত হয়।
ঘটনাস্থলীতে থিতাতে দুই বাইক আৰোহীৰ মৃত্যু হয় আৰু আহত হয় তিনিগৰাকী লোক। আহত লোক কেইগৰাকীক ততাতৈয়াকৈ চিকিৎসালয়ত ভৰ্তি কৰোৱা হৈছে।
দুৰ্ঘটনাটো সংঘটিত হোৱাৰ পিছতে স্থানীয় লোকে ৰাষ্ট্ৰীয় ঘাইপথটো অৱৰোধ কৰি পৰিৱেশ উত্তাল কৰি তোলে।
অৱেশ্যে আৰক্ষীয়ে তৎপৰতাৰে আধা ঘণ্টা মানৰ ভিতৰতে পথ অৱৰোধ কৰা স্থানীয় লোকসকলক শান্ত কৰাই ৰাষ্ট্ৰীয় ঘাইপথটো মুকলি কৰবিলৈ সক্ষম হয়।
বাতৰি প্ৰস্তুত কৰি থকালৈকে আৰক্ষীয়ে নিহতদ্বয়ৰ পৰিচয় উদ্ধাৰ কৰিবলৈ সক্ষম হোৱা নাই বুলি জানিবলৈ দিছে।
