জুবিন গাৰ্গৰ সপোনৰ প্ৰকল্প ‘ৰৈ ৰৈ বিনালে’ মুক্তিৰ পথত। ছবিখনৰ মুক্তিৰ পূৰ্বে অসমৰ ছবি গৃ্হত টিকটৰ অগ্ৰীম বুকিং আৰম্ভ হৈছিল। আকস্মিকভাৱে টিকটৰ মুল্য বৃদ্ধি হোৱাত বিষয়টো চৰ্চালৈ আহে। ৩১ অক্টোবৰত ৰাজ্যৰ লগতে বহিঃৰাজ্যতো মুক্তি পাবলগীয়া এই ছবিখনৰ আগতীয়াকৈ বুকিং মুকলি হোৱাৰ কিছু ঘণ্টাৰ ভিতৰতে প্ৰতিটো ছবিগৃহৰ প্ৰতিটো দৰ্শনী হাউচফুল হৈ পৰিছে। কিন্তু টিকটৰ মূল্যত আকস্মিক বৃদ্ধিক লৈ সৰৱ চৰ্চা চলিছে। অৱশ্যে নিৰ্মাতা গোষ্ঠীৰ তৰফৰ পৰা ছবিগৃহসমূহৰ সৈতে আলোচনাৰ পিছত মূল্য স্থিৰ ৰখাৰ সিদ্ধান্ত গ্ৰহণ কৰিছে ।
উল্লেখ্য যে ২৪ অক্টোবৰৰ পৰা বুক মাই শ্ব’ৰ জৰিয়তে ছবিখনৰ আগতীয়াকৈ বুকিংৰ ব্যৱস্থা আৰম্ভ হোৱাৰ কিছু ঘণ্টাৰ পিছতে প্ৰতিটো ছবিগৃহৰ সকলো দৰ্শনী হাউচফুল হৈ পৰিছে। জুবিনবিহীন বেদনাৰ মাজত অনুৰাগীসকলে শিল্পীগৰাকীৰ শেষৰখন ছবি চাবলৈ উল্লাসিত হৈ থাকিলেও, টিকিটৰ মূল্যত আকস্মিক বৃদ্ধিয়ে ক্ষোভৰ সৃষ্টি কৰিছে। গুৱাহাটী মহানগৰীৰ Cinepolis-এ আসনখনৰ মূল্য পুৱা ৬.০৫ বজাৰ পৰা ৬০০ টকালৈ বৃদ্ধি কৰা হৈছিল। একেটা ছবিগৃহত আবেলি ৪ বজাৰ পৰা সেই মূল্য ৬৫০ টকালৈ উঠিছে। ঠিক একেদৰে City Centre-ৰ PVR-য়ে আসনৰ মূল্য বিয়েলি ২.১৫ বজাৰ পৰা ৭৮০ টকালৈ বৃদ্ধি কৰিছে। এই বৃদ্ধিয়ে অনুৰাগীসকলৰ মাজত তীব্ৰ প্ৰতিক্ৰিয়াৰ সৃষ্টি কৰিছে।
এই প্ৰতিক্ৰিয়াৰ পিছত নিৰ্মাতা গোষ্ঠীয়ে সামাজিক মাধ্যমত এক বিবৃত্তি প্ৰকাশ কৰিছে। তেওঁলোকে উল্লেখ কৰিছে, “ৰৈ ৰৈ বিনালেৰ টিকিট মূল্য বৃদ্ধিৰ চৰ্চা দেখি আমি ছবিগৃহৰ কৰ্তৃপক্ষৰ সৈতে কথা পাতিছোঁ। এই মূল্য বৃদ্ধিৰ কাৰণ Dynamic Pricing, অৰ্থাৎ যেতিয়া কোনো ছবিৰ বুকিং ৬০% সম্পূৰ্ণ হয়, তেতিয়া টিকিটৰ দাম বৃদ্ধি পায়। পৰৱৰ্তী ৮০% বুকিংতো আকৌ বৃদ্ধি পায়। এই নিয়ম সকলো ছবিৰ বাবে প্ৰযোজ্য। কিন্তু আমি এই সময়ত ছবিগৃহ কৰ্তৃপক্ষক অনুৰোধ জনাইছোঁ যে ‘ৰৈ ৰৈ বিনালে’ৰ ক্ষেত্ৰত Dynamic Pricing প্ৰযোজ্য নকৰিব। কৰ্তৃপক্ষই এই কথাত সন্মতি জনাইছে আৰু আগন্তুক ১-২ ঘণ্টাৰ ভিতৰত আপোনাৰ লোকে পূৰ্ব নিৰ্ধাৰিত দামতেই টিকিট সংগ্ৰহ কৰিব পাৰিব।”
https://www.facebook.com/share/p/1aQ3sKPZf8
