বহু প্ৰতিশ্ৰুতিয়েই দিছিল তেওঁ। ২০১৪ লোকসভা নিৰ্বাচনৰ সময়ত মোদীয়ে প্ৰতিশ্ৰুতি দিছিল চুইছ বেংকত জমা থকা ভাৰতীয়ৰ ক’লা ধন উভতাই আনি প্ৰত্যেক ভাৰতীয়ৰে বেংক একাউণ্টত ১৫ লাখকৈ টকা দিব বুলি। তেওঁ কৈছিল প্ৰতিবছৰে ২ কোটি নিবনুৱাক চাকৰি দিব বুলি। কিন্তু সময়ত সকলো ফুটুকাৰ ফেন। এতিয়া পুনৰ গুজৰাট, হিমাচল প্ৰদেশৰ নিৰ্বাচন আহিছে। সেয়ে মোদীৰ মুখতো পুনৰ শুনা গৈছে কেতবোৰ অতি ভাললগা প্ৰতিশ্ৰুতি। মোদীয়ে পূৰ্বে কোৱা ২ কোটি নিবনুৱাৰ সংখ্যাটো এতিয়া ১০ লাখলৈ নামিছে। তাকো ওবছৰত নহয়, ডেৰ বছৰতহে ১০ লাখ নিবনুৱাক মোদীৰ চৰকাৰে চৰকাৰী চাকৰি দিব।
প্ৰধানমন্ত্ৰী নৰেন্দ্ৰ মোদীয়ে শেহতীয়াকৈ এইবুলি ঘোষণা কৰিছে যে অহা ডেৰ বছৰত অৰ্থাৎ ২০২৩ চনৰ ডিচেম্বৰৰ ভিতৰত ১০ লাখ যুৱক-যুৱতীক চাকৰি প্ৰদান কৰা হ’ব।
কাইলৈ অৰ্থাৎ ধনতেৰাছৰ দিনটোতেই এই বৃহৎ নিযুক্তি অভিযান আৰম্ভ কৰা হ’ব আৰু ৭৫০০০ নিবনুৱাক নিযুক্তি পত্ৰ প্ৰদান কৰা হ’ব।
প্ৰধানমন্ত্ৰীৰ কাৰ্যালয়ে প্ৰকাশ কৰা মতে, প্ৰধানমন্ত্ৰী নৰেন্দ্ৰ মোদীয়ে এই বছৰৰ জুন মাহত ৩৮ টা মন্ত্ৰালয়/বিভাগত মানৱ সম্পদৰ বিষয়ত পৰ্যালোচনা কৰিছিল। ইয়াৰ পিছতে তেওঁ ঘোষণা কৰিছিল যে চৰকাৰে অহা ডেৰ বছৰত অৰ্থাৎ ২০২৩ চনৰ ডিচেম্বৰৰ ভিতৰত ১০ লাখ চাকৰি প্ৰদান কৰিব। এই সকলোবোৰ নিযুক্তি ইউপিএছচি, এছএছচি, ৰে’লৱে নিযুক্তি ব’ৰ্ড আৰু অন্যান্য কেন্দ্ৰীয় সংস্থাৰ জৰিয়তে কৰা হ’ব।
ইয়াত ১০ নিযুত চাকৰি থাকিব।প্ৰধানমন্ত্ৰীৰ কাৰ্যালয়ে কৈছে যে কেন্দ্ৰীয় চৰকাৰৰ ৩৮ টা মন্ত্ৰালয় আৰু বিভাগৰ জৰিয়তে ১০ লাখ চাকৰি পূৰণ কৰা হ’ব। বৰ্তমান, গ্ৰুপ এ (ৰাজপত্ৰিত) শ্ৰেণীত ২৩৫৮৪ টা পদ খালী আছে, গ্ৰুপ বি (ৰাজপত্ৰিত) শ্ৰেণীত ২৬২৮২ টা পদ খালী আছে, আনহাতে গ্ৰুপ চিৰ অ-ৰাজপত্ৰিত শ্ৰেণীৰ ৮.৩৬ লাখ পদ খালী আছে।
কেৱল প্ৰতিৰক্ষা মন্ত্ৰালয়ত, গ্ৰুপ বি(নন-গেজেটেড)ৰ ৩৯৩৬৬টা পদ আৰু গ্ৰুপ চি-ৰ ২.১৪ লাখ পদ খালী আছে। গৃহ মন্ত্ৰালয়ত গ্ৰুপ চি-ৰ ২.৯১ লাখ খালী পদ আৰু গ্ৰুপ চি অ-ৰাজপত্ৰিত শ্ৰেণীৰ অধীনত ১.২১ লাখ পদ খালী আছে।এই পদবোৰত নিযুক্তি দিয়া হ’ব ।
প্ৰধানমন্ত্ৰীৰ এই বৃহৎ চাকৰি অভিযানৰ অধীনত প্ৰতিৰক্ষা মন্ত্ৰালয়, ৰে’ল মন্ত্ৰালয়, ডাক বিভাগ, গৃহ মন্ত্ৰালয়, শ্ৰম আৰু নিযুক্তি মন্ত্ৰালয়, কেন্দ্ৰীয় ঔদ্যোগিক সুৰক্ষা বাহিনী (চিআইএছএফ), কেন্দ্ৰীয় অনুসন্ধান ব্যুৰো (চিবিআই), শুল্ক আৰু বেংকিং, সশস্ত্ৰ বাহিনী, উপ-পৰিদৰ্শক, কনিষ্টবল, এলডিচি, আয়কৰ পৰিদৰ্শককে ধৰি ৩৮ টা বিভাগত সমগ্ৰ দেশৰ নিৰ্বাচিত যুৱক-যুৱতীসকলক চাকৰি প্ৰদান কৰা হ’ব।
