অযোধ্যাৰ ৰাম মন্দিৰত দানপাত্ৰৰ পৰা ধন চুৰি হোৱা ঘটনাক লৈ ৰাষ্ট্ৰীয় স্বয়ংসেৱক সংঘই এক কঠোৰ প্ৰতিক্ৰিয়া ব্যক্ত কৰিছে। সংঘৰ মতে এইটো কেৱল এক সাধাৰণ চুৰিৰ ঘটনা নহয়, ই কোটি কোটি ৰাম ভক্তৰ আস্থা আৰু বিশ্বাসত এক বৃহৎ আঘাত।
ৰাষ্ট্ৰীয় স্বয়ংসেৱক সংঘৰ সাধাৰণ সম্পাদক দত্তাত্ৰেয় হোচবালেই এক বিবৃতি যোগে কয় যে শ্ৰীৰাম জন্মভূমিত নিৰ্মিত এই ভৱ্য মন্দিৰটো বহু প্ৰজন্মৰ সংগ্ৰাম আৰু কোটি কোটি ভক্তৰ ত্যাগ আৰু বলিদানৰ ফল। সেয়েহে দানপাত্ৰত হোৱা এই দুৰ্ভাগ্যজনক চুৰিৰ ঘটনাই সমগ্ৰ হিন্দু সমাজ আৰু ৰাম ভক্তসকলৰ আৱেগত গভীৰ আঘাট সানিছে। এই ঘটনাক লৈ সকলোৱে অত্যন্ত দুখী আৰু ক্ষুব্ধ হৈ পৰিছে।
তেওঁ লগতে কয় যে শ্ৰীৰাম জন্মভূমি তীৰ্থ ক্ষেত্ৰ ট্ৰাষ্টৰ অনুৰোধ মৰ্মে উত্তৰ প্ৰদেশ চৰকাৰে ইতিমধ্যে এখন বিশেষ তদন্তকাৰী দল গঠন কৰিছে আৰু তাৰ ভিত্তিতে আইনী ব্যৱস্থাও আৰম্ভ কৰিছে। তদন্তত যিয়েই দোষী সাৱ্যস্ত নহওক কিয়, তেওঁক যাতে কঠোৰতকৈ কঠোৰ শাস্তি প্ৰদান কৰা হয়, সেয়া নিশ্চিত কৰিব লাগিব।
হোচবালেই কয় যে ৰাষ্ট্ৰীয় স্বয়ংসেৱক সংঘকে ধৰি সমগ্ৰ হিন্দু সমাজৰ এয়া স্বাভাৱিক আশা যে ট্ৰাষ্টে এই নিন্দনীয় ঘটনাক অতি গুৰুত্বসহকাৰে লৈ মন্দিৰ পৰিচালনাৰ সকলো ত্ৰুটি দূৰ কৰিবলৈ ফলপ্ৰসূ ব্যৱস্থা গ্ৰহণ কৰিব। মন্দিৰ পৰিচালনা সমিতি আৰু বিশেষ তদন্তকাৰী দলে বৰ্তমানৰ এই বিভ্ৰান্তি আৰু অনিশ্চয়তাৰ পৰিৱেশ সোনকালে দূৰ কৰিব বুলি তেওঁ আশা প্ৰকাশ কৰে, যাতে ভক্তসকলৰ বিশ্বাস অটুট থাকে।
তেওঁ বিশ্বাস কৰে যে উন্নত বিত্তীয় পৰিচালনা, নিকা ব্যৱস্থা আৰু পবিত্ৰ পৰিৱেশৰ জৰিয়তে শ্ৰীৰাম জন্মভূমি তীৰ্থ ক্ষেত্ৰ ট্ৰাষ্টে পুনৰবাৰ হিন্দু সমাজৰ বিশ্বাস আৰু শ্ৰদ্ধা অধিক সুদৃঢ় কৰিবলৈ সক্ষম হ’ব।
শেষত, ৰাষ্ট্ৰীয় স্বয়ংসেৱক সংঘই সমগ্ৰ হিন্দু সমাজক এই কঠিন সময়ত ধৈৰ্য্য আৰু সংযম বজাই ৰাখিবলৈ আহ্বান জনাইছে। লগতে, এই দুৰ্ভাগ্যজনক ঘটনাৰ সুযোগ লৈ হিন্দু ধৰ্ম আৰু সমাজক বদনাম কৰিবলৈ চেষ্টা কৰা হিন্দু বিৰোধী আৰু ৰাষ্ট্ৰ বিৰোধী শক্তিসমূহৰ ষড়যন্ত্ৰ ব্যৰ্থ কৰিবলৈ সকলোকে অনুৰোধ জনাইছে।
