বিতৰ্কিত আৰ টি আই কৰ্মী দুলাল বৰাৰ তিনিমহলীয়া বিলাসী অট্টালিকাত বুলডেজাৰৰ আঁচোৰ।
আজি পুৱা প্ৰায় ১০ বজাত দুলাল বৰাৰ মহানগৰীৰ ৰুক্মিণীগাঁওস্থিত বাসগৃহত উচ্ছেদ চলায় গুৱাহাটী পৌৰ নিগমে।
GMC প্ৰশাসন আৰু দিছপুৰ আৰক্ষী উপস্থিত হৈ আজি পুৱা উচ্ছেদ অভিযান চলাই বৰাৰ বাসগৃহত।
GMC ৰ এক উচ্চস্তৰীয় সূত্ৰ অনুসৰি বৰাই গুৱাহাটী পৌৰ নিগমৰ পৰা কোনোধৰণৰ অনুমতি নোলোৱাকৈ গৃহটো নিৰ্মাণ কৰিছিল। ইয়াক লৈ বৰা উচ্চ ন্যায়ালয়ৰ দ্বাৰস্থ হৈছিল যদিও আদালতে বৰাক GMC ৰ অনুমতি পত্ৰ দেখুৱাবলৈ নিৰ্দেশ দিয়ে।
দীৰ্ঘদিন ধৰি পাৰ হৈ যোৱাৰ পাছতো বৰাই অনুমতি পত্ৰ দেখুৱাব নোৱাৰাত আজি তেওঁৰ গৃহ উচ্ছেদ কৰাৰ সিদ্ধান্ত লয় GMC প্ৰশাসনে।
ইপিনে, দুলাল বৰাৰ জীয়ৰীয়ে আদালতৰ ষ্টে’ অৰ্ডাৰ আছে বুলি কয় যদিও উপস্থিত GMC বিষয়াই সেয়া মিছা বুলি কয়।
৫৪৯/২০ নম্বৰ গোচৰৰ ভিত্তিত নিয়ম বহিৰ্ভূতভাৱে গৃহ নিৰ্মাণ কৰা অভিযোগত ভঙা হৈছে গৃহটো।
উল্লেখযোগ্য যে, বৰাৰ বিৰুদ্ধে বিভিন্ন সময়ত আৰ টি আই শক্তিৰ অপপ্ৰয়োগ কৰি উচ্চপদস্থ বিষয়াক ব্লেক মেইলিংৰ জৰিয়তে ধন সংগ্ৰহ কৰাৰ অভিযোগ উত্থাপিত হৈ আহিছিল।
ৰাজ্যৰ বহু কেইখন থানাত তেওঁৰ বিৰুদ্ধে বিভিন্ন গোচৰ ৰুজু হৈ আছে।
যোৱা ১৭ মাৰ্চৰ দিনা খানাপাৰা কইনাধৰাস্থিত তিনিমহলীয়া বাসগৃহত উচ্ছেদ চলাইছিল প্ৰশাসনে। তাৰ পাচৰে পৰা বৰাৰ পৰিয়ালে থাকিবলৈ লয় আজি উচ্ছেদিত বাসগৃহত।