আগন্তুক এক-ডেৰ মাহৰ ভিতৰত ধুবুৰীত আৰ টি পি চি আৰ পৰীক্ষাৰ লেবৰেটৰী কাৰ্যক্ষম হৈ উঠিব৷
জিলা ঔষধ পণ্যাগাৰৰ ওপৰ মহলাত লেবৰেটৰীটোৰ নিৰ্মাণ কাৰ্য চলি আছে৷
আজি এখন সংবাদমেলত ধুবুৰীৰ জিলা উপায়ুক্ত অন্বামুথন এম পিয়ে এই কথা সদৰি কৰে৷
জিলা উপায়ুক্ত কাৰ্যালয়ৰ সভাকক্ষত আয়োজিত সংবাদমেলখনত ধুবুৰীৰ উপাযুক্ত হিচাপে প্ৰথমখন সংবাদমেল সম্বোধন কৰি অন্বামুথন এম পিয়ে কয় যে আগন্তুক ছমাহৰ ভিতৰত ধুবুৰী চিকিৎসা মহাবিদ্যালয়ৰ নিৰ্মাণকাৰ্য সম্পূৰ্ণ হোৱাৰ পূৰ্ণ সম্ভাৱনা আছে৷
ইতিমধ্যে নিৰ্মাণকাৰ্য প্ৰায়খিনি হৈ উঠিছে৷ মুখ্যমন্ত্ৰীৰ নিৰ্দেশত ৰাষ্ট্ৰীয় স্বাস্থ্য অভিযানৰ অসমৰ কাৰ্যবাহী সঞ্চালকে ইতিমধ্যে চিকিৎসা মহাবিদ্যালয়খনৰ নিৰ্মাণৰ কাম কাজ বুজ লৈ গৈছে৷
জিলা উপায়ুক্তগৰাকীয়ে কয় যে ধুবুৰীত বৰ্তমান প্ৰতিষেধকৰ কোনো নাটনি নাই আৰু প্ৰতিষেধক প্ৰদান কাৰ্য সুচাৰুৰূপে চলি আছে৷
ধুবুৰীত থকা তিনিখন চাহ বাগিচাৰ শ্ৰমিকক অনলাইন পঞ্জীয়ন নকৰাকৈ ভেকচিন দিয়াৰ ব্যৱস্থা কৰা বুলি উপায়ুক্তগৰাকীয়ে সদৰি কৰে৷
আনহাতে শীঘ্ৰে গ্ৰামাঞ্চলৰ ঘৰে ঘৰে গৈ কোভিড লক্ষণযুক্ত ৰোগী চিনাক্ত কৰাৰ ব্যৱস্থা কৰা হ’ব বুলি সদৰি কৰে জিলা উপায়ুক্তই৷
এইকাম বিগত বৰ্ষতো কৰা হৈছিল আৰু সেয়ে বিগত বৰ্ষৰ মেকানিজম এইবাৰ ব্যৱহাৰ কৰা হ’ব বুলি তেওঁ জনায়৷ জিলা উপায়ুক্তগৰাকীয়ে ধুবুৰীৰ সৰ্বসাধাৰণ ৰাইজক কোভিডৰ সামান্য লক্ষণ দেখা দিলেই ওচৰৰ স্বাস্থকেন্দ্ৰলৈ গৈ পৰীক্ষা কৰাবলৈ আহ্বান জনায়৷
বান নিয়ন্ত্ৰণৰ বাবে জলসম্পদ বিভাগৰ কাম কাজ খৰতকীয়া কৰিবলৈ নিৰ্দেশ দিয়া বুলি সদৰি কৰে জিলা উপায়ুক্ত অন্বামুথন এম পিয়ে৷
ক’ৰ’না মহামাৰী আৰু বান নিয়ন্ত্ৰণৰ কামত প্ৰশাসন ব্যস্ত থকাৰ সময়ত জিলাখনৰ আন আন উন্নয়ণমূলক কামবোৰ যাতে স্তব্ধ নহয় তাৰ প্ৰতি চকু ৰখা বুলি কয় নৱনিযুক্ত উপায়ুক্তগৰাকীয়ে৷
তেওঁ ৰাষ্ট্ৰীয় ঘাইপথকে ধৰি পথ নিৰ্মাণৰ কামবোৰৰ শীঘ্ৰে পৰ্যালোচনা কৰিব বুলি সদৰি কৰে৷
ছিণ্ডিকেটকে ধৰি কোনোধৰণৰ অবৈধ কাৰ্যকলাপ ধুবুৰীত চলিবলৈ দিয়া নহ’ব বুলি সংবাদমেলত স্পষ্ট কৰি দিয়ে উপায়ুক্তগৰাকীয়ে৷
