তেল আৰু প্ৰাকৃতিক গেছ নিগম চমুকৈ অ’এনজিচিৰ ভটীয়াপাৰস্থিত ১৪৭ নং তেলখাদলৈ অহা যোৱা কৰা একমাত্ৰ পথটো দিখৌৰ গৰাখহনীয়াত জাহ যোৱাৰ উপক্ৰম ঘটিছে। কিন্ত এই মূল পথটো অ’এনজিচি কৰ্তৃপক্ষই নিৰ্মাণ কৰাৰ পৰিবৰ্তে আন এটা বিকল্প পথ নিৰ্মাণ কৰিবলৈ লোৱাত ক্ষোভিত হৈ পৰিছে কৃষক মুক্তি সংগ্ৰাম সমিতিৰ ৰূদ্ৰসাগৰ আঞ্চলিক সমিতি। অ’এনজিচিৰ অসম সম্পদৰ ৰূদ্ৰসাগৰ তৈলক্ষেত্ৰৰ অন্তৰ্গত উক্ত তৈলখাদটো ভটীয়াপাৰ বাৰীচুকৰ দিখৌ নদীৰ মথাউৰিৰ সংযোগী ঐতিহাসিক দুবৰণী আলিৰ কাষত অৱস্থিত।
উল্লেখ্য যে তৈলখাদটোলৈ দুৱৰণী আলি সংযোগী দিখৌ নদীৰ মথাউৰিয়েদি নিগমৰ যান বাহন সমূহ অহা যোৱা কৰে। আশানুৰূপ উৎপাদনক্ষম তৈলখাদটো বহু বছৰৰ পূৰ্বে স্থাপন কৰা হৈছিল। তাৰোপৰি তৈলখাদটোৰ কাষতে থকা দিখৌ নদীৰ মথাউৰি সদৃশ পথটোও দীৰ্ঘদিনৰ পৰা গৰাখহনীয়াৰ কৱলত পৰি আহিছে। খহনীয়াৰ কৱলত পৰি পথ সদৃশ মথাউৰিটোৰ এটা বৃহৎ অংশ নিশ্চিহ্ন হোৱাৰ লগতে বৃহত্তৰ শ’লগুৰি আৰু মেটেকা বনগাওঁ মৌজাৰ প্ৰায় দুই শতাধিক গাৱঁলৈ ভাবুকি কঢ়িয়াই আনিছে।
বাৰিষা দুয়োটা মৌজাৰ জনসাধাৰণে নিতৌ আতংকত দিন কটাবলগীয়া হৈ আহিছে। অসম চৰকাৰৰ জলসম্পদ বিভাগৰ শিৱসাগৰ সংমণ্ডলৰ অধীনত থকা মথাউৰি সদৃশ পথটো নিৰ্মাণৰ বাবে দুয়োটা মৌজাৰ ৰাইজে বাৰম্বাৰ দাবী জনাই আহিছে যদিও জলসম্পদ বিভাগে বাহঁৰ বুৰুজ মাৰিয়েই দায়িত্ব সামৰি থয় প্ৰতি বছৰে।
আনহাতে তৈলখাদটো উক্ত স্থানত স্থাপন কৰাৰ পিছৰে পৰা নিগমে উক্ত পথটোৰ চোৱাচিতা দায়িত্ব বহন কৰি আহিছে। যাৰ বাবে জলসম্পদ বিভাগে মথাউৰিটো মেৰামতি কৰাৰ ক্ষেত্ৰত হোঁহোকা পিছলা কৰি আহিছে। নিগমে উক্ত খহনীয়া হোৱা অংশছোৱা মেৰামতি নকৰি তাৰ পৰিবৰ্তে তৈলখাদটোলৈ নিগমৰ যানবাহন অহা-যোৱাৰ বাবে খেতিয়ক ৰাইজৰ কৃষিভূমি অধিগ্ৰহণ কৰি বিকল্প আন এটা উপপথ নিৰ্মাণ কৰাৰ বাবে যো-জা কৰাত অ’এনজিচি কৰ্তৃপক্ষৰ বিৰুদ্ধে ক্ষোভিত হৈ উঠিছে কৃষক মুক্তি সংগ্ৰাম সমিতিৰ আঞ্চলিক সমিতি।
কালি আঞ্চলিক সমিতিৰ সম্পাদক মনজিৎ দাসৰ দ্বাৰা স্বাক্ষৰিত এখনি স্মাৰকপত্ৰ শিৱসাগৰ জিলা উপায়ুক্তগৰাকীৰ হাতত প্ৰদান কৰে। স্মাৰকপত্ৰখনত অতি সোনকালে নিগমক এনে জনবিৰোধী সিদ্ধান্ত বাতিল কৰিবলৈও দাবী জনোৱা হয়। বিকল্প উপপথটো নিৰ্মাণ কৰাৰ পৰিবৰ্তে উক্ত খহনীয়া অংশ অতি শীঘ্ৰে মেৰামতি কৰি দুয়োটা মৌজাৰ ৰাইজৰ জীৱন আৰু সা-সম্পত্তি ৰক্ষা কৰিবৰ বাবেও স্মাৰক পত্ৰখনতআহ্বান জনোৱা হয় ।
তদুপৰি স্মাৰকপত্ৰখনত স্পষ্টকৈ উল্লেখ কৰে যে যদিহে অ’এনজিচিয়ে এনে জনবিৰোধী সিদ্ধান্ত বাতিল নকৰে তেতিয়া অনাগত দিনত হ’ব পৰা যিকোনো পৰিস্থিতিৰ বাবে অ’এনজিচি কৰ্তৃপক্ষই জগৰীয়া হ’ব বুলিও সকীয়াই দিছে স্থানীয় ৰাইজে। অসমৰ ভূ-গৰ্ভৰ পনীয়া সোণ সদৃশ খাৰুৱা তেল আহৰণ কৰি অহা অ’এনজিচিৰ এনে হঠকাৰী ভূমিকাক তীব্ৰ ভাষাৰে গৰিহণা দিছে সংগঠনটোৱে।
ইতিমধ্যে, অ’এনজিচিয়ে গ্ৰহণ কৰা জনবিৰোধী সিদ্ধান্ত বাতিল কৰাৰ দাবী জনাই অলপতে ভটীয়াপাৰ অঞ্চলৰ সমাজকৰ্মী তথা সাংস্কৃতিক কৰ্মী ভোলা কাকতিৰ নেতৃত্বত গাঁৱৰ ৰাইজৰ দ্বাৰা স্বাক্ষৰিত এখন স্মাৰকপত্ৰ নিগমৰ কায্যবাহী সঞ্চালকৰ উপৰিও,মাননীয় মূখ্যমন্ত্ৰী,জলসম্পদ মন্ত্ৰী আদিলৈ প্ৰেৰণ কৰা হৈছে।
