গোৱালপাৰা জিলাৰ অসম-মেঘালয় সীমান্তবৰ্তী অঞ্চলত এতিয়া আতংকৰ অন্য এটা নাম “ডিঙি কটা মানুহ” ৷ সন্ধিয়া এন্ধাৰ নামি অহাৰ লগে লগে হাতত চোকা অস্ত্ৰ লৈ সীমান্তবৰ্তী গাঁৱসমূহত প্ৰৱেশ কৰে ডিঙি কটা মানুহৰ এটি দলে (গলা কটা মানুহ)৷ ঘৰৰ দৰ্জাত টুকুৰিয়াই দি দৰ্জা খোলা মাত্ৰেই গৰাকীৰ ডিঙি কাটি দিয়ে দলটোৱে ৷
হয়, অসম মেঘালয় সীমান্তত ডিঙি কটা মানুহৰ এই উৰাবাতৰিয়ে ব্যাপক আতংকৰ সৃষ্টি কৰিছে ৷ একংবিশ শতিকাতো এনে উৰাবাতৰিৰ বশৱৰ্তী হৈ কোনো কোনো গাঁৱত ৰাইজে নিশা পহৰা দিয়াৰো ব্যৱস্থা কৰিছে ৷ এই ডিঙি কটা মানুহৰ ভয়ত এতিয়া ইপাৰ সিপাৰ নেদেখা হৈছে অসম-মেঘালয় সীমান্তৱৰ্তী গাৰো অধ্যষিত অঞ্চল সমূহৰ লোকে ৷
উৰাবাতৰিত ভোল গৈ বহু লোকে ঘৰ বাৰী এৰি মেঘালয়ৰ সম্পৰ্কীয় লোকৰ ঘৰত আশ্ৰয় লোৱাৰো খবৰ লাভ কৰিব পৰা গৈছে ৷ একাংশ লোকৰ মতে, মেঘালয়ৰ পাহাৰৰ পৰা নামি আহে ডিঙি কটা দলটি ৷ চোকা অস্ত্ৰৰে সজ্জিত দলটি ঘৰত প্ৰবেশ কৰি শৰীৰৰ আন কোনো ঠাইত আঘাত নকৰি কেৱল ডিঙিটোহে লক্ষ্য কৰে ৷ ডিঙি কাটি মূৰটো লৈ যায় দলটিয়ে ৷
একাংশ অশিক্ষিত লোকৰ মতে কাটি নিয়া মূৰটো কোনো দেৱতাৰ ওচৰত অৰ্পণ কৰে। আন একাংশৰ মতে শিৰচ্ছেদ কৰা মুৰটোৰে ব্যৱসায় কৰে ৷ মূঠৰ ওপৰত ডিঙি কটা মানুহৰ উৰা বাতৰিয়ে গ্ৰাস কৰিছে সীমান্তবৰ্তী গাৰো গাঁৱ সমূহ ৷ কেৱল গাৰো গাঁৱসমূহতহে প্ৰৱেশ কৰে ডিঙি কটা দলটি ৷ লক্ষ্য কেৱল গাৰো অধ্যষিত গাঁৱসমূহ ৷ এনেধৰণৰ অন্ধবিশ্বাসৰ বশৱৰ্তী হৈ এতিয়া সীমান্তৱৰ্তী কেতবোৰ গাঁৱত তীব্ৰ আতংকই বিৰাজ কৰিছে ৷
অৱশ্যে অশিক্ষিত একাংশ লোকে এই উৰাবাতৰিত ভোল গৈ নিজৰ নিৰাপত্তাৰ বাবে বিভিন্ন কাৰ্যব্যৱস্থা গ্ৰহণ কৰিছে যদিও শিক্ষিত লোকসকলে এই উৰাবাতৰি বিৰুদ্ধে সচেতন হৈছে ৷ সীমান্তৱৰ্তী কাছুমাৰী গাঁৱৰ গাঁওবূঢ়া ট্ৰুমেন মাৰাকে এই উৰাবাতৰিৰ সন্দৰ্ভত কয় যে বৃহত্তৰ কাছুমাৰী,বায়দা,নোৱাপাৰা,কাছীঘাগ্ৰা,ডেকৰী, হুদাকনা,কালাইটুলী,ঝাৰীখান্দী, খংখাল আদি গাঁৱসমূহত এই উৰাবাতৰি বিয়পিছে ৷ প্ৰতিদিনে অনুষ্ঠিত হৈছে সজাগতা সভা ৷
উৰাবাতৰিয়ে যাতে কোনো কাৰণতে প্ৰশ্ৰয় নাপায় তাৰ বাবে সজাগ হৈছে সকলো ৷ নিশা আৰক্ষীৰ সহযোগত গাঁৱসমূহত নৈশ পহৰাৰ ব্যৱস্থা কৰা হৈছে ৷ ইফালে গাৰো গাঁৱসমূহক লক্ষ্য কৰি কোনো দুষ্ট চক্ৰই যে উৰাবাতৰি বিয়পাইছে সেয়া নিশ্চিত ৷ কোনে কি কাৰণত এনেধৰণৰ উৰাবাতৰি বিয়পাইছে তাক লৈয়ো চিন্তিত গোৱালপাৰা প্ৰশাসন কিম্বা সচেতন মহল ৷
জানিব পৰা মতে, কৃষ্ণাই থানাৰ আৰক্ষীয়ে এই উৰাবাতৰিৰ বিৰুদ্ধে যথেষ্ট তৎপৰ হৈছে ৷ আৰক্ষীয়ে প্ৰতিনিশা গঞা ৰাইজৰ সহোযোগত নৈশ তালাচী বহুৱাইছে স্পৰ্শকাতৰ কেতবোৰ এলেকাত ৷ এতিয়া কোনে কি কাৰণে কি উদ্যেশ্যৰে সীমান্তৱৰ্তী সাধাৰণ খাটি খোৱা মানুহক আতংকৰ বীজ বিয়পাইছে সেয়া চিন্তনীয় বিষয় ৷
