গোৱালপাৰা জিলাৰ কৃষ্ণাইৰ কাষৰীয়া পশ্চিম ভেলাখামাৰ বাকৰিত বিগত বছৰসমূহৰ দৰে এইবেলিও থলুৱা খেল-ধেমালি ভিত্তিক গ্ৰাম্য ক্ৰীড়া সমাৰোহখনিৰ আয়োজন কৰা হৈছে ৷ হালোৱা সংগ্ৰাম সমিতিৰ উদ্যোগত অহা ৪,৫ আৰু ৬ জানুৱাৰীত তিনিদিনীয়া কাৰ্যসূচীৰে সমাৰোহখনি অনুষ্ঠিত হ’ব।
উল্লেখ্য যে বিভিন্ন থলুৱা ক্ৰীড়া প্ৰতিযোগিতা অনুষ্ঠিত হ’বলগীয়া এই সমাৰোহৰ প্ৰস্তুতি সম্প্ৰতি একেবাৰে তুংগত। অনুষ্ঠান সন্দৰ্ভত জানিবলৈ দি হালোৱা সংগ্ৰাম সমিতিৰ সম্পাদক আনোৱাৰ হুছেইনে কয় যে এইবেলি মুঠ তিনিদিনীয়াকৈ আয়োজিত সমাৰোহখনিৰ প্ৰথম দিনা পুৱা পতাকা উত্তোলন কৰিব সদ্য নিৰ্বাচিত পঞ্চায়ত সদস্য ৰেজাবুদ্দিন আহমেদে ৷ ৮:৩০ বজাত খেল ধেমালি প্ৰতিযোগিতা উদ্বোধন কৰিব কাৰাটে খেলুৱৈ মুস্তাক হুছেইনে। ৫ জানুৱাৰীৰ দিনটোত অনুষ্ঠিত হ’ব বিভিন্ন প্ৰতিযোগিতামূলক খেল-ধেমালি।
আনহাতে অন্তিম দিনা অৰ্থাৎ ৬ জানুৱাৰীৰ পুৱা ৯ বজাত অনুষ্ঠিত হ’ব ভেশচন প্ৰতিযোগিতা। সিদিনা আবেলি ২ বজাৰ পৰা মকবুল হুছেইনৰ সভাপতিত্বত মুকলি সভা অনুষ্ঠিত হ’ব।
উল্লেখ্য যে গোৱালপাৰা পূব বিধানসভা সমষ্টিৰ বিধায়ক এ কে ৰছিদ আলম, হাব্ৰাঘাট মহাবিদ্যালয়, কৃষ্ণাইৰ অধ্যক্ষ ড° মন্টু কুমাৰ দাস, অঁনাতাৰ শিল্পী ৰহিমা বেগম কলিতা আৰু সাংবাদিক চৈয়দ ৰবিউল হকে মুকলি সভাৰ আমন্ত্ৰিত অতিথি হিচাপে উপস্থিত থাকিব। তদুপৰি মুকলি সভাতে প্ৰতিযোগিতাৰ বঁটাসমূহ বিতৰণ কৰা হ’ব ৷
