ভাৰতীয় সেনাৰ শক্তি আৰু সুৰক্ষা বৃদ্ধি কৰাৰ লক্ষ্যৰে প্ৰতিৰক্ষা মন্ত্ৰালয়ে এক অতি গুৰুত্বপূৰ্ণ পদক্ষেপ গ্ৰহণ কৰিছে। মঙলবাৰে অৰ্থাৎ ২১ এপ্ৰিলত প্ৰতিৰক্ষা মন্ত্ৰালয়ে সেনাৰ টি-৭২ আৰু টি-৯০ টেংকৰ বাবে ট্ৰয়েল এছেম্বলী নামৰ এক বিশেষ ব্যৱস্থা কিনিবলৈ প্ৰায় ৯৭৫ কোটি টকাৰ এক বিশাল চুক্তিত স্বাক্ষৰ কৰে। এই চুক্তিখন ভাৰত আৰ্থ মুভাৰ্ছ লিমিটেড আৰু ইলেক্ট্ৰ‘ নিউমেটিক্স এণ্ড হাইড্ৰলিক্স প্ৰাইভেট লিমিটেড নামৰ দুটা কোম্পানীৰ সৈতে কৰা হৈছে। নতুন দিল্লীত প্ৰতিৰক্ষা সচিব ৰাজেশ কুমাৰ সিঙৰ উপস্থিতিত এই গুৰুত্বপূৰ্ণ চুক্তিখন সম্পন্ন হয়।
এই নতুন ট্ৰয়েল ব্যৱস্থাটো প্ৰতিৰক্ষা গৱেষণা আৰু উন্নয়ন সংস্থাই (ডি আৰ ডি অ‘) অতি উন্নত প্ৰযুক্তিৰে সাজি উলিয়াইছে। এই যন্ত্ৰটোৰ সহায়ত যুদ্ধৰ সময়ত সেনাই শত্ৰুৱে পুতি থোৱা মাইনফিল্ড বা বোমাৰ মাজেৰেও অতি নিৰাপদে আগবাঢ়ি যাব পাৰিব। ই মাটিৰ তলত থকা ভয়ংকৰ মেগনেটিক এণ্টি-টেংক মাইনসমূহ ধ্বংস কৰি সেনাৰ বাহন আৰু টেংকবোৰ যোৱাৰ বাবে এটা সুৰক্ষিত ৰাস্তা তৈয়াৰ কৰিব। ইয়াৰ ফলত যুদ্ধৰ কঠিন পৰিস্থিতিত আমাৰ সেনাৰ কাৰ্যক্ষমতা আৰু নিৰাপত্তা বহু পৰিমাণে বৃদ্ধি পাব।
এই সমগ্ৰ প্ৰকল্পটো চৰকাৰৰ আত্মনিৰ্ভৰ ভাৰত অভিযানৰ এক অংশ হিচাপে হাতত লোৱা হৈছে। এই যন্ত্ৰসমূহ সম্পূৰ্ণৰূপে ভাৰতীয় প্ৰযুক্তিৰে দেশতে প্ৰস্তুত কৰা হ‘ব, যিয়ে আমাৰ প্ৰতিৰক্ষা খণ্ডক অধিক স্বাৱলম্বী কৰি তুলিব। ইয়াৰ জৰিয়তে দেশৰ সৰু আৰু মজলীয়া উদ্যোগসমূহে যথেষ্ট লাভান্বিত হোৱাৰ লগতে দেশত বহুতো প্ৰত্যক্ষ আৰু পৰোক্ষ সংস্থাপনৰো সৃষ্টি হ‘ব বুলি আশা কৰা হৈছে। সৰ্বোপৰি, এই চুক্তিয়ে আধুনিক প্ৰতিৰক্ষা সঁজুলিৰে ভাৰতীয় সেনাক শক্তিশালী কৰাৰ দিশত চৰকাৰৰ প্ৰচেষ্টাকে প্ৰতিফলিত কৰিছে।
