চকুৰ সন্মুখতে দাউ দাউকৈ জ্বলিছিল এটা ঘৰ।ঘৰটোৰ ভিতৰৰ পৰা ভাহি আহিছিল তিনিটি শিশুৰ আৰ্ত চিৎকাৰ। এনে পৰিস্থিতিত নিজকে চম্ভালি ৰাখিব নোৱাৰিলে সৈনিক স্কুলৰ এগৰাকী ছাত্ৰই।
বিভিন্নজনৰ বাধা নামানি তেওঁ জুইৰ মাজত সোমাই পৰিল। এটা এটাকৈ তিনিটি শিশুক জীৱন্তে উদ্ধাৰ কৰিলে।
কিন্তু দুৰ্ভাগ্যজনকভাৱে নিজকে বচাবলৈ সক্ষম নহ’ল পুৰুলিয়া সৈনিক স্কুলৰ দশম শ্ৰেণীৰ ছাত্ৰ অমিত ৰাজে।
জলন্ত জুইয়ে দগ্ধ কৰি নিলে অমিতৰ শৰীৰ। গুৰুতৰভাৱে অগ্নিদগ্ধ হৈ পৰে ছাত্ৰগৰাকী। দিল্লীৰ হাস্পাতললৈ লৈ গ’লেও জীৱন ৰক্ষা নপৰিল এই সাহসী যোদ্ধাগৰাকীৰ।
হাস্পাতলৰ বিচনাতে জীৱন যুদ্ধত হাৰ মানিলে সম্ভাৱনাপূৰ্ণ ছাত্ৰগৰাকীয়ে। জুইৰ পৰা শিশুকেইটিক বচালে যদিও নিজক বচাব নোৱাৰিলে এই প্ৰকৃত সৈনিকগৰাকীয়ে।
বিহাৰৰ নালন্দাত ঘটিছে এই ঘটনা। ঘটনা অনুসৰি, কৰ’নাৰ পৰিস্থিতিৰ বাবে অমিত ৰাজ তেওঁৰ নালন্দাৰ ঘৰত গৈ আছিল। যোৱা ৩ ডিচেম্বৰত এই কৰণ ঘটনাটো সংঘটিত হয়।
ঘটনাৰ পাছতে অমিতক পাটনাৰ হাস্পাতললৈ নিয়া হয় যদিও শাৰীৰিক অৱস্থাৰ অৱনতি ঘটাৰ বাবে ততাতয়াকৈ হেলিকপ্টাৰেৰে দিললঈৰ এখন হাস্পাতললৈ নিয়া হয়। কিন্তু তাতো জীৱন ৰক্ষা নপৰিল এই কিশোৰ সৈনিকৰ।
হাস্পাতলত প্ৰায় ১০ দিন জীৱনৰ সৈতে যুঁজ দি দেওবাৰে অমিতে শেষ নিশ্বাস ত্যাগ কৰে। অমিতৰ মৃত্যুত সৈনিক স্কুলখনত গভীৰ শোকৰ ছাঁ পৰিছে।
স্কুলখনৰ শিক্ষক-শিক্ষয়িত্ৰীসকলে মমবাতি জ্বলাই আৰু অমিতৰ ফটোত ফুলৰ মালা দি গভীৰ শ্ৰদ্ধাঞ্জলি নিবেদন কৰে। আনহাতে, এনে মৰ্মান্তিক ঘটনাৰ পাছত শোকস্তব্ধ হৈ পৰিছে অমিতৰ পৰিয়ালৰ লোকসকল।
নিজৰ জীৱনকো তুচ্ছ কৰি অমিতৰ এনে দু:সাহসী তথা মানৱীয় কামক সকলোৱে প্ৰণাম জনাইছে।
