T-20 World Cup Fight অহা দেওবাৰে টী-২০ বিশ্বকাপত ভাৰত-পাকিস্তান মুখামুখি হ’ব। ইয়াৰ পূৰ্বে পুত্ৰ ইজহানক লৈ পাকিস্তান ক্ৰিকেট দলৰ জৈৱ বলয়ত প্ৰৱেশ কৰিলে ভাৰতীয় টেনিছ তাৰকা ছানিয়া মিৰ্জা। অৱশ্যে, লগত ছোয়েব মালিকো আছে।
আইচিচিৰ নিয়ম অনুসৰি ক্ৰিকেটাৰসকলৰ পৰিয়াল তেওঁলোকৰ সৈতে বায়’-বাবলত থাকিব পাৰে।
ভাৰতৰ লগতে পাকিস্তানৰো কেইবাজনো ক্ৰিকেটাৰে নিজৰ পৰিয়াল লৈ আছে। ইয়াৰ ভিতৰত ভাৰতৰ বিৰাট কোহলি, ৰোহিত শৰ্মা আৰু অশ্বিনে পৰিয়াল লগত ৰাখিছে।
সেইদৰে জৈৱ বলয়ত নিজৰ পৰিয়াল লগত ৰাখিছে পাকিস্তানৰ মহম্মদ হাফিজ, ফকৰ জামান আৰু ছোয়েৱ মালিক। গোটেই বিশ্বকাপত পাকিস্তানী টীমৰ হোটেলত ছোয়েব মালিকৰ সৈতে থাকিব ছানিয়া মিৰ্জা।
কিন্তু বিষয়টোক লৈ বিবুধিত পৰিছে ছানিয়া। দেওবাৰে ভাৰত পাকিস্তানৰ মুখামুখি হ’ব। এইবাৰ ছানিয়াই কাক সমৰ্থন কৰিব?
প্ৰতিবাৰেই ছানিয়াই এনে মেচত ভাৰতকে সমৰ্থন কৰাৰ কথা কৈ আহিছে। পিচে, পাকিস্তানী দলৰ সৈতে বহি ভাৰতক সমৰ্থন কৰাটো সম্ভৱ হ’বনে?
ভাৰতীয় টেনিছ তাৰকাগৰাকীয়ে সেয়ে মেচখন হৈ নোযোৱালৈকে ছচিয়েল মিডিয়াৰ পৰা নিজকে অঁতৰাই ৰাখিব বিচাৰিছে।
ছানিয়াই নিজৰ ইনষ্টাগ্ৰামত ভিডিঅ’ প’ষ্ট কৰি সেইকথা জনায়ো দিছে। ছানিয়াই লিখিছে যে ভাৰত-পাকিস্তানৰ মেচৰ দিনা তেওঁ ছচিয়েল মিডিয়াৰ পৰা আঁতৰি থাকিব।
অৱশ্যে, ভাৰতৰ বিজয় বিচাৰিলেও ছানিয়াই স্বামী ছোয়েবে ভাল প্ৰদৰ্শন কৰাটো বিচাৰিছে। কিয়নো এইবাৰেই প্ৰাক্তন পাকিস্তানী অধিনায়কগৰাকীয়ে শেষ বিশ্বকাপ খেলিব।