আজি পুৱা প্ৰায় ৯.৩০ বজাত শিৱসাগৰ জিলাৰ ডিমৌৰ ৩৭ নং ৰাষ্ট্ৰীয় ঘাইপথত সংঘটিত এক ভয়ংকৰ পথ দুৰ্ঘটনাত এজন যুৱকে থিতাতে প্ৰাণ হেৰুৱা লগীয়া হয়।
ঘটনাৰ বিৱৰণী মতে শিৱসাগৰ জিলাৰ জয়ৰামপুৰৰ পৰা নুমলীগড়লৈ আহি থকা এ এছ ২৩ বি চি- ০১৯১ নম্বৰৰ এখন তীব্ৰ বেগত অহা টেংকাৰে এজন চাইকেল আৰোহীক প্ৰচণ্ড জোৰত খুন্দা মাৰে। ফলত যুৱকজনে থিতাতে প্ৰাণ হেৰুৱাৰ লগতে আন এজন চাইকেল আৰোহী বহু দূৰৈত উফৰি পৰেগৈ।
দুৰ্ঘটনাটোত নিহত যুৱকজন ডিমৌ দিখাৰী চাহ বাগিচাৰ বৰ লাইনৰ সঞ্জয় ভূমিজ(১৭) বুলি জানিব পৰা গৈছে। ইফালে দুৰ্ঘটনা সংঘটিত কৰি টেংকাৰখনে ডিমৌ থানাত আত্মসমৰ্পণ কৰে।
আনহাতে দুৰ্ঘটনাটোত নিহত সঞ্জয় ভূমিজৰ দেউতাকে সংঘটিত দুৰ্ঘটনাটোৰ ক্ষেত্ৰত এক উচিত ব্যৱস্থা ল’বলৈ ডিমৌ আৰক্ষী থানাত এজাহাৰ দাখিল কৰে।
