ল’কডাউনৰ মাজতে সীমিত সংখক শ্ৰমিকেৰে কাম আৰম্ভ কৰা চাহ বাগিচাত শ্ৰমিকৰ অৱস্থাৰ বুজ ল’বৰ বাবে মঙলবাৰে বোকাখাত চাহ বাগিচাত অসম চৰকাৰৰ ৰাজ্যিক শ্ৰম মন্ত্ৰী সঞ্জয় কিষাণ উপস্থিত হয়।
শ্ৰম মন্ত্ৰী গৰাকীয়ে বাগিছাখনৰ শ্ৰমিক সকলৰ মাজত মাস্ক আৰু চাবোন বিতৰণ কৰে।
বাগিচাত সাংবাদিকৰ সৈতে হোৱা বাৰ্তালাপত বেংকত ধন উলিয়াবৰ বাবে শ্ৰমিক সকলে কৰা জনসমাগমক লৈ মন্ত্ৰীজনে উদ্বিগ্নতা প্ৰকাশ কৰাৰ লগতে এই প্ৰসংগত বেংকৰ কৰ্মচাৰীয়ে নিজে গৈ বাগিচাত শ্ৰমিকক ধন দিয়াৰ ব্যৱস্থা কৰিবৰ বাবেও তেওঁ নিৰ্দেশ দিয়া বুলি জনায় ৷
আনহাতে, শ্ৰম কাৰ্যালয়ত পঞ্জীয়ণ থকা সকলো শ্ৰমিকেই এক হাজাৰ টকাকৈ সাহায্য লাভ কৰিব বুলিও মন্ত্ৰী গৰাকীয়ে জনায় আৰু নগৰাঞ্চলৰ ৰিক্সা চালক বা ঠেলা চালক বা ক্ষুদ্ৰ ব্যৱসায়ী সকলকো চৰকাৰী সাহায্য দিয়াৰ বাবে শ্ৰম বিভাগে কাম কৰা বুলিও শ্ৰম মন্ত্ৰী গৰাকীয়ে জানিবলৈ দিয়ে।
তদুপৰি, শ্ৰমিকৰ উপৰিও বাগিচা কৰ্তৃপক্ষৰ সৈতেও মন্ত্ৰী গৰাকীয়ে আলোচনা কৰে। বাগিচাত ল’কডাউনৰ সময়ত কৰ্মৰত শ্ৰমিকে শান্তপূৰ্ণ আৰু সামাজিক দুৰত্ব বজাই কাম কৰাৰ বাবে তেওঁ সন্তোষ প্ৰকাশ কৰে।
