অসমৰ চাবুৱাৰ সমীপত আজি এক পথ দুৰ্ঘটনা সংঘটিত হয়। এই দুৰ্ঘটনাত কেন্দ্ৰীয় মন্ত্ৰী সৰ্বানন্দ সোণোৱাল আৰু ৰাজ্যসভাৰ সাংসদ ৰামেশ্বৰ তেলী কথমপি ৰক্ষা পৰে। চাবুৱাৰ হাতিয়ালি বাইপাছত মন্ত্ৰীগৰাকীৰ কনভয়ৰ তিনিখন বাহনৰ মাজত এই সংঘৰ্ষ সংঘটিত হয়।
প্ৰাপ্ত খবৰ অনুসৰি, আজি কেন্দ্ৰীয় মন্ত্ৰীগৰাকীয়ে ডিব্ৰুগড়ৰ পৰা নিজৰ পূৰ্বপুৰুষৰ গাঁও বিন্ধাকটালৈ যাত্ৰা কৰি থকা অৱস্থাত এই দুৰ্ঘটনাটো সংঘটিত হয়। সেই সময়ত কনভয়ৰ ভিতৰতে সোণোৱালৰ সৈতে ৰাজ্যসভাৰ সাংসদ ৰামেশ্বৰ তেলীও আছিল। স্থানীয় প্ৰশাসনে নিশ্চিত কৰিছে যে দুৰ্ঘটনাত পতিত হোৱা তিনিখন বাহনৰ ভিতৰত থকা সকলো যাত্ৰী সুৰক্ষিত আছে।
দুৰ্ঘটনাৰ সঠিক কাৰণ এতিয়াও স্পষ্ট হোৱা নাই। ব্যস্ত পথটোত কি পৰিস্থিতিত কনভয়ৰ বাহনকেইখনৰ মাজত সংঘৰ্ষ হ’ল, সেই সন্দৰ্ভত আৰক্ষীয়ে তদন্ত আৰম্ভ কৰিছে। এই পৰ্যন্ত আৰক্ষীয়ে কোনো আনুষ্ঠানিক তথ্য প্ৰকাশ কৰা নাই। উল্লেখ্য যে দুৰ্ঘটনাটোৰ পাছত হাতিয়ালি বাইপাছত কিছু সময়ৰ বাবে যান-বাহন চলাচল ব্যাহত হৈ পৰে।
