উচ্চতম ন্যায়ালয়ে আজি নিৰ্বাচনী প্ৰাৰ্থীৰ অপৰাধমূলক ৰেক’ৰ্ড লুকুৱাই ৰখা দলৰ বিৰুদ্ধে ব্যৱস্থা গ্ৰহণৰ বাবে দাখিল কৰা আবেদনৰ শুনানি গ্ৰহণ কৰিবলৈ সন্মত হয়।
উল্লেখ্য যে ভাৰতৰ নিৰ্বাচন আয়োগে ৰাজনৈতিক দলসমূহৰ নিৰ্বাচনী প্ৰাৰ্থীৰ অপৰাধমূলক গোচৰ সম্পৰ্কীয় বিৱৰণ প্ৰকাশ কৰাৰ লগতে তেওঁলোকক বাছনি কৰাৰ কাৰণ উল্লেখ কৰিবলৈ নিৰ্দেশ দিছিল।
ভাৰতৰ মুখ্য ন্যায়াধীশ এন ভি ৰমনা আৰু ন্যায়াধীশ এ এছ বোপান্না আৰু হিমা কোহলীক লৈ গঠিত এখন বিচাৰপীঠক পিআইএল দাখিল কৰা অধিবক্তা অশ্বিনী উপাধ্যায়ে চলিত নিৰ্বাচন প্ৰক্ৰিয়াৰ কথা মনত ৰাখি আবেদনখন জৰুৰীভাৱে তালিকাভুক্ত কৰিবলৈ আহ্বান জনাইছিল।
“প্ৰথম পৰ্যায়ৰ নিৰ্বাচনৰ বাবে মনোনয়ন আৰম্ভ হৈছে আৰু ৰাজনৈতিক দল আৰু প্ৰাৰ্থীসকলে নিৰ্লজ্জভাৱে শীৰ্ষ ন্যায়ালয়ৰ দুটা ৰায় উলংঘা কৰিছে।” অধিবক্তাজনে কয়।
ইয়াৰ উত্তৰত মুখ্য ন্যায়াধীশ ৰমনাই এই বিষয়টো বিবেচনা কৰা হ’ব বুলি নিশ্চিত কৰে। লগতে এই সন্দৰ্ভত শুনানিৰ বাবে এটা তাৰিখ দিয়া হ’ব বুলি উল্লেখ কৰে।
আবেদনখনে প্ৰতিজন ৰাজনীতিবিদে ইলেক্ট্ৰনিক, প্ৰিণ্ট আৰু ছ’চিয়েল মিডিয়াত অপৰাধজনিত বিৱৰণ প্ৰকাশ কৰাৰ ক্ষেত্ৰত নিৰ্বাচনী পেনেলৰ এটা নিৰ্দেশনা বিচাৰিছে।
লগতে এনে নিৰ্দেশনা উলংঘা কৰা দলটোৰ সভাপতিৰ বিৰুদ্ধে অৱমাননাৰ গোচৰ ৰুজু কৰাৰ নিশ্চয়তা বিচাৰিছে আবেদন খনে।