কলিয়াবৰৰ এজন শিল্পীৰ হাতৰ পৰশত প্ৰাণ পাই উঠিছে বাঁহ, কাঠ আৰু পেলনীয়া নানা ধৰণৰ সামগ্ৰীৰে তৈয়াৰ কৰা নানা ধৰণৰ ভাস্কৰ্য শিল্পই।
কলিয়াবৰৰ মাজ পূৱথৰীয়া গাঁৱৰ নিত্যানন্দ বৰুৱা নামৰ এইজন ভাস্কৰ্য শিল্পীয়ে বাঁহ, কাঠ, নাৰিকলৰ খোলাকে ধৰি বিভিন্ন পেলনীয়া বস্তুৰে বিভিন্ন ধৰণৰ ভাস্কৰ্য শিল্প তৈয়াৰ কৰি বৰ্তমান ৰাইজৰ প্ৰশংসা বুটলিবলৈ সক্ষম হৈছে।
প্ৰাথমিক বিদ্যালয়ৰ অৱসৰ প্ৰাপ্ত সহকাৰী শিক্ষক নিত্যানন্দ বৰুৱাই তেওঁৰ পিতৃ স্বগীয় গংগাধৰ বৰুৱাৰ পৰা পোৱা প্ৰাৰম্ভিক শিক্ষা তথা পিতৃৰ আশীৰ্বাদ আৰু প্ৰেৰণা লাভ কৰি সৰু কালৰে পৰা দুই এটাকৈ ভাস্কৰ্য নিৰ্মাণ কৰি বৰ্তমান এজন ভাস্কৰ্য শিল্পী হিচাপে প্ৰতিষ্ঠা লাভ কৰিবলৈ সক্ষম হৈছে।
বৰ্তমান তেওঁৰ হাতৰ পৰশত বাঁহ আৰু কাঠৰে নিৰ্মাণ কৰা ভাৰতৰ প্ৰধান মন্ত্ৰী নৰেন্দ্ৰ মোদীৰ স্বচ্ছ ভাৰতৰ এক আৰ্হি প্ৰস্তুত কৰাৰ লগতে অসমীয়াৰ বাপতি সাহোন ৰঙালী বিহুৰ অন্যতম শ্ৰেষ্ঠ আকৰ্ষণ ঢুলীয়া আৰু নাচনী প্ৰস্তুত কৰি উলিয়াইছে।
ইয়াৰ উপৰি বিভিন্ন ধৰণৰ চৰাই, ফুল দানী, এশিঙীয়া গঁড়ৰ লগতে বৰ্তমান হনুমান আৰু ৰামৰ মূৰ্ত্তি কাঠ আৰু বাঁহৰে নিৰ্মাণ কৰি আছে এইজন শিল্পীয়ে।
অৱশ্যে প্ৰধানমন্ত্ৰী নৰেন্দ্ৰ মোদীৰ ৰাজনৈতিক কাৰ্যকলাপৰ প্ৰতি আকৰ্ষিত হৈ প্ৰধানমন্ত্ৰী গৰাকীৰ প্ৰতিমূৰ্তি প্ৰস্তুত কৰি এতিয়া নিজ হাতেৰে প্ৰধানমন্ত্ৰী নৰেন্দ্ৰ মোদীক শ্ৰদ্ধা জনাবলৈ বহুত আশাৰে বাট চাই ৰৈছে শিল্পী গৰাকীয়ে।
ইয়াৰোপৰি নৱপ্ৰজন্মৰ যুৱক-যুৱতীসকলক এই শিল্পকলাৰ শিক্ষা প্ৰদান কৰা লগতে এই শিল্পবিধৰ প্ৰতি আকৰ্ষিত কৰিবলৈ তথা আধ্যাত্মিক জ্ঞানৰ পৰিসৰ বৃদ্ধি কৰিবলৈ ৰাম আৰু হনুমানৰ প্ৰতিমূৰ্তি নিৰ্মাণ কৰিছে বুলিও জানিবলৈ দিয়ে শিল্পী গৰাকীয়ে।
যদিহে নৱপ্ৰজন্মই এই শিল্প বিধৰ প্ৰতি আকৰ্ষিত হয় তেনেহ’লে অনাগত দিনত নৱপ্ৰজন্মৰ বাবে এই ভাস্কৰ্য শিল্পৰ শিক্ষা প্ৰদানৰ ব্যৱস্থা গ্ৰহণ কৰিব শিল্পী গৰাকীয়ে।
