যোৱা ৫ ছেপ্তেম্বৰত হোৱা ব্ৰহ্মপুত্ৰৰ নাও দুৰ্ঘটনাত নিৰুদ্দেশ হোৱা কমল ৰজক নামৰ যুৱকজনৰ এতিয়ালৈকে কোনো সন্ধান নাই। এছ ডি আৰ এফে ভটীয়নিৰ ব্যাপক অংশত যোৱা ৫ দিন ধৰি অভিযান চলায়ো যুৱকজনৰ কোনো শুংসূত্ৰ লাভ নকৰিলে।
আজি এছ ডি আৰ এফে ভাৰত-বাংলাদেশ সীমান্তত থকা ব্ৰহ্মপুত্ৰৰ অংশত উদ্ধাৰ অভিযান চলায়। এই অভিযানৰ সময়ত এছ ডি আৰ এফৰ লগত আছিল কমল ৰজকৰ পৰিয়াল। অৱশ্যে হতাশ হ’ব লগীয়া হয় অভিযানকাৰী দলটো। ফলত সন্দেহ কৰা হৈছে ৰজকৰ মৃতদেহ ব্ৰহ্মপুত্ৰেৰে উটি গৈ বাংলাদেশৰ অংশত পৰিলগৈ নেকি?
উল্লেখযোগ্য যে এতিয়ালৈকে দুৰ্ঘটনাটোত পতিত ৫জন লোকৰ মৃতদেহ উদ্ধাৰ কৰা হৈছে।
মন কৰিব লগীয়া যে কমল ৰজকৰ উপৰি উৎপল চমুৱা নামৰ এজন অধিবক্তা নিখোজ হৈ আছে বুলি খবৰ প্ৰচাৰ হৈ আছে।
আনহাতে এই সন্দৰ্ভত স্পষ্ট তথ্য নাই আৰক্ষীৰ হাতত। আজি আমাৰ সাংবাদিকে পাণ্ডুস্থিত নদী আৰক্ষীলৈ ফোন কৰি দুৰ্ঘটনাটোত আজিৰ দিনটোলৈকে উদ্ধাৰ হোৱা মুঠ মৃতদেহৰ সংখ্যা সোধাত চৰকাৰী তথ্য মতে তিনিটা মৃতদেহ বুলিহে কয়।
নলবাৰীৰ চৰত উদ্ধাৰ হোৱা ৰাহুল আলীৰ মৃতদেহটোৰ কথা তেওঁলোকে গম নাপায় বুলিহে কয়।