ভাৰতীয় বায়ুসেনা বাহিনী আৰু অৰুণাচল প্ৰদেশৰ অসামৰিক প্ৰশাসনে সোমবাৰে বিয়লিৰ পৰা নিৰুদ্দিষ্ট হৈ থকা এএন-৩২ বিমানখনৰ উদ্ধাৰ অভিযান মঙলবাৰে পুৱাই আৰম্ভ কৰিছে।
প্ৰতিৰক্ষা বিভাগৰ জনসম্পৰ্কৰক্ষী বিষয়া উইং কমাণ্ডাৰ ৰত্নাকৰ সিঙে মঙলবাৰে কয় যে বতৰ ফৰকাল থকাৰ বাবে উদ্ধাৰ অভিযান পুনৰ আৰম্ভ কৰা হৈছে।
তেওঁ কয় যে ইতিমধ্যে সেনা আৰু আইটিবিপিৰ স্থল বাহিনীৰ সৈতে দুখন এম আই ১৭ৰ আৰু এখন এ এল এইচ বিমান নিৰুদ্দিষ্ট বিমানখন উদ্ধাৰৰ কামত নিয়োগ কৰা হৈছে। তেওঁ লগতে কয় যে প্ৰয়োজন হ’লে আৰু অধিক শক্তি নিয়োগ কৰা হ’ব।
উল্লেখযোগ্য যে যোৰহাটৰ পৰা উৰা মৰা ভাৰতীয় বিমান বাহিনীৰ বিমানখন অৰুণাচল-চীনা সীমান্তৰ আকাশমাৰ্গৰ সোমবাৰে নিৰুদ্দেশ হৈছিল।
বায়ুসেনা বাহিনীৰ সূত্ৰৰ মতে বিমানখনে যোৰহাট বিমান বন্দৰৰ পৰা সোমবাৰে ১২.২৫ বজাত চীন সীমান্তৰ কাষৰ অৰুণাচল প্ৰদেশৰ মাচুকা এডভান্স লেণ্ডিং গ্ৰাউণ্ডৰ দিশলে উৰণ কৰিছিল।
আনহাতে, বিমানখনৰ সৈতে গ্ৰাউণ্ড এজেন্সিৰ অন্তিমবাৰৰ বাবে যোগাযোগ হৈছিল সোমবাৰে ১৩:০০ বজাত। তাৰ পিছত কোনো সংযোগ ঘটা নাই।
বিমানখনত মুঠতে ৮জন বিমানকৰ্মী আৰু ৫জন যাত্ৰীৰে মুঠ ১৩জন ব্যক্তি আছিল।