অসম সৰ্বশিক্ষা অভিযান মিছনৰ অধীনত পৰিচালিত গুণোৎসৱ-অসম, ২০১৮ দ্বিতীয় বৰ্ষৰ প্রস্তুতি আৰম্ভ হৈছে। দুটা পৰ্যায়ত অনুষ্ঠিত হ’ব লগা গুণোৎসৱে অহা ৩ অক্টোবৰৰ পৰা ৬ অক্টোবৰলৈ প্রথম পৰ্যায় আৰু ৩১ অক্টোবৰৰ পৰা ৩ নৱেম্বৰলৈ দ্বিতীয় পৰ্যায়ত অসমৰ ৩৩ খন জিলাক সামৰি লব।
দ্বিতীয় পৰ্যায়ত অন্তভূক্ত হোৱা বিশ্বনাথ জিলাত গুণোৎসৱৰ প্রস্ততি আৰম্ভ হৈছে। আজি জিলাখনৰ তিনিওটা শিক্ষাখণ্ডৰ মুঠ ৯১ গৰাকী গুণোৎসৱৰ সমন্বয়ৰক্ষী বিষয়া আৰু মণ্ডল সমল কেন্দ্র সমন্বয়ক সকলৰ এদিনীয়া প্রশিক্ষণ অনুষ্ঠিত হয়।
বিশ্বনাথ কৃষি মহাবিদ্যালয়ৰ সভাকক্ষত অনুষ্ঠিত হোৱা প্রশিক্ষণ কাৰ্যসূচী পৰিচালনা কৰে সৰ্বশিক্ষা অভিযানৰ জিলা আঁচনি বিষয়া তথা গুণোৎসৱৰ নডেল বিষয়া মনোজ কুমাৰ গোহাঁই আৰু বেদব্রত বৰাই।
জিলা মিছন সমন্বয়ক প্রদীপ সূত্ৰধৰে উদ্বোধন কৰা প্রশিক্ষণ কাৰ্যসূচীত শেনিতপুৰ শিক্ষণ প্রশিক্ষণ প্রতিষ্ঠানৰ প্রৱক্তা চন্দন ভূঞাই আগতে হৈ যোৱা গুণোৎসৱ আৰু এই বৰ্ষত হ’ব লগা গুণোৎসৱৰ বিভিন্ন দিশ পৰ্যালোচনা কৰাৰ লগতে ইয়াৰ প্রস্ততি সন্দৰ্ভত বহল ভাৱে ব্যাখ্যা কৰে।
আজিৰ উক্ত কাৰ্যসূচীত বিশ্বনাথ জিলা সৰ্বশিক্ষাৰ আঁচনি বিষয়া গুলজাৰ হুছেইন, মৃনাল দত্ত, প্রগ্রেমাৰ নেপলৰনজিত বৰুৱাই গুণোৎসৱৰ বিভিন্ন দিশৰ পৰ্যালোচনা কৰে।
অহা ২৫ আগষ্টৰ পৰা মণ্ডল পৰ্যায়ত শিক্ষকসকলৰ প্রশিক্ষণ আৰম্ভ হ’ব বুলি নডেল বিষয়া মনোজ কুমাৰ গোহাঁইয়ে জানিবলৈ দিয়ে।
