দেশৰ বিভিন্ন প্ৰান্ত কোভিডে ইজনৰ পিছত সিজনকৈ সাংবাদিকৰ প্ৰাণ কাঢ়ি নিছে।
শেহতীয়াকৈ দিল্লীত কৰ্মৰত অসমৰ সাংবাদিক নীলক্ষি ভট্টাচাৰ্যৰ কোভিডত মৃত্যু হোৱাৰ সময়তে আজি পুনৰ এগৰাকী সাংবাদিকে মৃত্যুক সাৱটি লয়।
টেলিভিছন চেনলে ‘আজটক’ৰ সাংবাদিক ৰোহিট চৰদানিৰ আজি দিল্লীত মৃত্যু ঘটে।প্ৰাপ্ত খবৰ অনুসৰি কিছুদিন পূৰ্বে সাংবাদিক গৰাকী ক’ভিডত আক্ৰান্ত হৈছিল।
শেহতীয়াকৈ তেওঁ সুস্থ হৈ উঠিছিল যদিও আজি হঠাতে তেওঁ মৃত্যুক সাৱটি লয়।মৃত্যুৰ সময়ত তেওঁৰ বয়স হৈছিল ৪১ বছৰ।
সাংবাদিক চৰদানিৰ হৃদৰোগত আক্ৰান্ত হৈ মৃত্যু ঘটা বুলিও এটা সূত্ৰই প্ৰকাশ কৰিছে।
জি নিউজত বহু বছৰ ধৰি কাম কৰা চৰদানিয়ে ২০১৭ চনত আজটকত যোগদান কৰিছিল।আজটকত তেওঁ দাংগল নামৰ এটা জনপ্ৰিয় অনুষ্ঠান পৰিচালনা কৰিছিল।
উৎকৃষ্ট সাংবাদিকতাৰ স্বীকৃতি স্বৰূপে ২০১৮ চনত চৰদানিক ভাৰত চৰকাৰে গণেশ শংকৰ বিদ্যাৰ্থী পুৰস্কাৰেৰে পুৰস্কৃত কৰিছিল।
বিগত ২৮ টা দিনত দেশত ৫২ গৰাকী সাংবাদিকে কোভিডত প্ৰাণ হেৰুৱাইছে।উল্লেখ্য আজি দিল্লীত অসমৰ এগৰাকী জ্যেষ্ঠ সাংবাদিক নীলাক্ষী ভট্টাচাৰ্যৰ কোভিড-১৯ত আক্ৰান্ত হৈ মৃত্যু হৈছে।
দিল্লীৰ প্ৰতীক্ষা হাস্পাতালত চিকিৎসাধীন অৱস্থাত শুকুৰবাৰে পুৱা টাইমছ অফ ইণ্ডিয়াৰ সাংবাদিক ভট্টাচাৰ্যই শেষ নিশ্বাস ত্যাগ কৰে।
আনহাতে, নীলাক্ষীৰ ভট্টাচাৰ্যৰ স্বামী দ্য আছাম ট্ৰিবিউন কাকতৰ দিল্লীত থকা জ্যেষ্ঠ সাংবাদিক কল্যান বৰুৱাও কৰ’নাত আক্ৰান্ত হৈ চিকিৎসাধীন হৈ আছে।
মৃত্যুৰ সময়ত নীলাক্ষী ভট্টাচাৰ্যই স্বামী কল্যান বৰুৱাৰ লগতে একমাত্ৰ কন্যাক এৰি গৈছে। নীলাক্ষীৰ এনে অকাল মৃত্যুত ৰাজ্যখনত শোকৰ ছাঁ পৰিছে।